देशको प्रधानमन्त्रीको मुख्य ध्यान विकासको गतिविधिमा हुनुपर्ने हो । प्रशासनबाट जनतालाई के कतिको सुविधा भइरहेको विषयमा अनुगमन तथा अनुसन्धान गरी समस्याको गाँठो फुकाउने कामतिर लाग्नुपर्ने हो । तर प्रधानमन्त्री केपी शर्मा ओलीको पछिल्लो गतिविधि त्यस्तो देखिन्न ।
कहिले आफ्नै दलका नेताहरुको बारेमा राजनीतिक उछाल ल्याएर त कहिले बालुवाटारमै पार्टीका नेता कार्याकर्ता बोलाएर विपक्षी दलका नेताहरुलाई धम्क्याउनसम्म पछि पर्दैनन् ओली । अहिले युवाहरु रोजगारीको खोजीमा चौतर्फी भौतारिरहेका छन् । कुनै विषयमा स्थिरता नहुँदा उनीहरु निराश छन् । सामाजिक सञ्जालमा युवाहरुले आक्रोश पोख्छन् । वडाध्यक्ष नै भावुक सन्देश छाडेर विदेश छाड्न विवश बनेका छन् । यी विषयमा प्रधानमन्त्री ओलीले विशेष ध्यान दिनुपर्ने हो । युवा पुस्ताको विषयमा कुनै योजना बनाउनुपर्ने हो । तर ओली दैनिकजसो सत्ता जोगाउनतिरमात्र लागेको देखिन्छ । उनको दैनिक रटान हुन्छ, सरकार ढल्दैन । अघिल्लोपटक मन्त्रीहरुसँग कार्यसम्पादन गरेका ओलीले यसपटक पनि मन्त्रीहरुसँग कार्यसम्पादन सम्झौता गरेका छन् ।
तर उक्त कार्यसम्पादनको ‘रिपोर्ट कार्ड’ प्रधानमन्त्रीसँग छैन । अहिले देशको आर्थिक अवस्था संकटग्रस्त छ । भूमिसम्बन्धी कानुन बनाउन नसक्दा कित्ताकाट खुल्ला गर्न नसक्दा अहिले जग्गा कारोबार ठप्प छ । जसका कारण एक त देशभरको घरजग्गा कारोबार ओरालो लागेको छ । यसले राजश्व संकलनमा पनि कमी आएको छ ।
सहकारी ठगी प्रकरणका कारण अहिले देशभरको बैंकिङ क्षेत्र त्रास्त छ । बैंकमा गैरबैंकिङ सम्पत्ति थुप्रिएर बिक्री हुन सकेको छैन । जसका कारण ब्याजदरमा असर परेको छ । यही कारण ऋण लिनेहरु पनि घटिरहेका छन् । उखु किसानहरुलाई सधैं झुक्याएर परिबन्दमा पार्ने गरिन्छ । निजमती विधेयकमा छलछाम गरी ‘कुलिङ पिरियड’ नै गायब गर्नतिर लाग्दा निकै समय गोलमाल भयो ।
अहिले शिक्षा विधेयक किनारा लगाउन नसक्दा शिक्षकहरु फेरि आन्दोलनमा उत्रने तयारीमा छन् । दशैं नजिकिएको छ । अब विभिन्न बाहनामा व्यवसायीले मुल्य बढाएर सर्वसाधारणलाई दुख दिने क्रम चल्नेछ । सुशासनको मुद्दा लिएर दुई ठुला दल मिलेर बनेको यो सरकारले देशको शासनप्रतिको वितृष्णाको सम्बोधन गर्नुपर्ने हो । तर सुशासनको नाम लिनेबित्तिकै सरकार तर्कन थाल्छ । अहिले देशभरको कार्यालयमा चरम ढिलासुस्ती छ । बजेट विनियोजनदेखि बजेट कार्यान्वयनसम्म सरकारले जनताको माग सम्बोधन गर्न सकेको छैन । प्रधानमन्त्री र मन्त्रीहरु बढीजसो विदेश सयरमै रमाएको देखिन्छ । दलगत स्वार्थ र झगडा भन्दा पनि सरकार यी विषयमा सम्बोधन गर्न लागोस् । सुशासनलाई प्राथमिकता दिनु नै आजको प्रमुख आवश्यकता हो ।
