बर्खाको समयमा मुलुकका अधिकांश राजमार्गहरु जोखिमपूर्ण हुन्छन् । ठूलो वर्षात्का कारण आउने बाढीपहिरोले हरेक वर्ष राजमार्गमा ठूलो धनजनको क्षति पुर्याउँछ । जसको उदाहरण २०८१ असोज दोस्रो साता बिपी राजमार्गमा बाढीपहिरोले पुर्याएको क्षतिलाई लिँदा काफी हुन्छ । उक्त राजमार्गअन्तर्गत भकुण्डे-सिन्धुली सडकखण्ड क्षतविक्षत बन्यो । सयौं सवारीसाधनका हजारौं यात्रीलगायत अलपत्रमा परे । राजमार्गको विभिन्न स्थानमा बाढीपहिरोले सडक अवरुद्ध हुँदा सडकखण्डका बीचमा अलपल परेका यात्रीलाई स्थानीय तह र जिल्ला प्रशासन कार्यालयको पहलमा हवाई उद्धार गर्नुपरेको थियो ।
बिपी राजमार्गमात्रै होइन, अन्य राजमार्गहरुको अवस्था हरेक बर्खाको समयमा यस्तै हुने गर्दछ । हरेक वर्ष ठूलो धनजनको क्षति पुर्याउँदै आएको भए पनि यस्तो क्षति न्यूनीकरणमा सरकारले प्रभावकारी काम गर्न सकेको देखिँदैन । जोखिम न्यूनीकरणका लागि काम गरिरहेको दाबी गरे पनि नतिजा देखिएको छैन । त्यसो त सरकारले विपद् जोखिम न्यूनीकरणका लागि छुट्टै प्राधिकरण नै गठन गरेको छ । उक्त प्राधिकरणले बाढीपहिरो, हावाहुरीजस्ता विपद्को सम्भावित जोखिमबारे पूर्वसूचना प्रवाह गर्दै आएको छ । यस्तै मौसमसम्बन्धी पूर्वानुमान जल तथा मौसम विज्ञान विभागले दिँदै आएको छ । तर, यस्ता पूर्वसूचनाहरु अपेक्षाकृत प्रभावकारी बन्न सकेको छैन । जसले गर्दा धेरै क्षति हुने गरेका घटनाहरु प्रशस्त छन् ।
अर्को महŒवपूर्ण कुरा राजमार्गहरुमा यात्रीलाई सूचित गराउने आकष्मिक सूचना प्रणालीलाई चुस्त बनाउनुपर्ने हो । तर, जोडिएका सूचना प्रणालीसमेत सरकारले समयमा मर्मत नगर्दा प्रयोगहीन बनेको पाइएको छ । यस्तो अवस्था बिपी राजमार्गमासमेत देखिएको हो । सिन्धुलीबाट काठमाडौंतर्फ आउने र काठमाडौंबाट त्यसतर्फ जाने यात्रीलाई सडक अवरुद्ध एवं जोखिमपूर्ण रहेको सूचना दिन जडान गरिएको सूचना प्रणाली विगत पाँच वर्षदेखि नै प्रयोगविहीन बनेको पाइएको छ । यो सडक विभागको ठूलो लापारवाही हो । गत वर्षको बाढीको समयमा उक्त राजमार्ग भएर यात्रारत यात्रुहरुलाई आकष्मिक सूचना प्रवाह गरेको भए उनीहरुले सास्ती बेहोर्नुपर्ने थिएन ।
राजमार्गलाई सुरक्षित बनाउने योजना कार्यान्वयनमा जिम्मेवार नबन्दा यस्तो बेथिति देखिएको हो । जसको मारमा जनता परिरहेका छन् । राजमार्गमा डिजिटल बोर्ड देखाउनलाई मात्रै जडान गर्ने होइन, त्यसलाई अद्यावधिक गरी प्रभावकारी सूचना प्रवाह गर्ने माध्यम बनाउन जरुरी छ । नागरिकको सुरक्षाका लागि त्यस्तो सूचना प्रणाली अत्यावश्यक छ । सबै राजमार्गहरुमा सूचना प्रणालीलाई चुस्त बनाइ सुरक्षित यात्रा सुनिश्चित गर्न र सम्भावित जोखिमबाट बचाउन राज्य जिम्मेवार बन्नुपर्छ । यसतर्फ सरकारको ध्यान जाओस् ।
