काठमाडौं- खानेपानी तथा सरसफाइ क्षेत्रको अनुसन्धान, नवप्रवर्तन तथा मानव स्रोत विकासमा थप योगदान पुर्याउने उद्देश्यसहित नगरकोटमा स्थापना गरिएको छ । राष्ट्रिय खानेपानी तथा सरसफाइ अनुसन्धान, नवप्रवर्तन तथा क्षमता अभिवृद्धि केन्द्रको शुक्रबार उद्घाटन गरिएको हो ।
खानेपानीमन्त्री यादवले आज एक विशेष समारोहबीच सो केन्द्रको उद्घाटन गरेका हुन् । उद्घाटन कार्यक्रममा मन्त्री यादवले केन्द्रले खानेपानी तथा सरसफाइ क्षेत्रमा कार्यरत कर्मचारी, प्राविधिक र सरोकारवालालाई अनुसन्धानमा आधारित, व्यावहारिक तथा दक्षता अभिवृद्धिका तालिम प्रदान गर्न महत्वपूर्ण भूमिका खेल्ने अपेक्षा लिइएको बताए ।‘यो केन्द्रबाट देशभरिका खानेपानी तथा सरसफाइसम्बन्धी जनशक्ति प्रशिक्षित भई सेवा प्रवाहलाई अझ प्रभावकारी, जनमुखी र नवप्रवर्तनमैत्री बनाउन मद्दत पुग्नेछ,’उनले भने,‘ आजको बदलिँदो प्रविधि र बढ्दो जनसङ्ख्याको सन्दर्भमा स्वच्छ, सुरक्षित र दिगो खानेपानी तथा सरसफाइ सेवाप्रवाहको आवश्यकता झन् बढेकाले यस्तो अवस्थामा यो केन्द्र अनुसन्धान र अभ्यासमा आधारित तालिम, नवप्रवर्तन र नीतिनिर्माणमा समेत सहयोगी बनेको छ ।
केन्द्रको संरचनागत व्यवस्थापनलाई सुदृढ बनाउने उद्देश्यले कार्यकारी निर्देशकका रूपमा सहसचिवस्तरको दरबन्दीको व्यवस्था गरिएको र यस केन्द्रको नेतृत्व सहसचिवले गर्ने व्यवस्था गरेपछि सञ्चालन व्यवस्थापनमा थप प्रभावकारी हुने विश्वास गरिएको मन्त्रालयका सचिव इञ्जिनियर प्रमिलादेवी शाक्य बज्राचार्यले जानकारी दिए ।
