दलहरुले सत्ताको प्रयोग आफू अनुकूल गर्न थालेको यो पहिलो घटना होइन । कहिले राष्ट्रिय सभाको अध्यक्ष माओवादीको बनाउने त कहिले उपसभामुख राष्ट्रिय स्वतन्त्र पार्टीको बनाउने । यो खेलको मुख्य भूमिकामा देखिएको दल हो नेकपा एमाले । अहिले सत्ताको नेतृत्वमा यही दलका अध्यक्ष केपी शर्मा ओली छन् । सत्ताको सौदाबाजीमा अरुका स्वार्थ पनि त पूरा गरिदिनपर्छ । अहिले एमाले आफूभन्दा बलियो दल नेपाली कांग्रेससँग सत्ता समीकरणमा छ । यही बेला संवैधानिक परिषद्सम्बन्धी विधेयक राष्ट्रपति रामचन्द्र पौडेलले फिर्ता पठाएको समय हो ।
स्वार्थसिद्ध गर्न एमालेले छ सदस्यीय संवैधानिक परिषद्मा तीन जना उपस्थित भए पनि दुई जनाको बहुमत मान्न मिल्ने खालको प्रावधान राखेर विधेयक अघि बढाएको थियो । उक्त विधेयक फिर्ता पठाएपछि एमाले अहिले उपसभामुख इन्दिरा राना मगरलाई हटाउनैपर्ने निर्णयमा पुग्नुपर्याे । वर्ष दिनअघि नै पाँच जनालाई अमेरिकी दूतावासमा भिसाका लागि सहयोग मागेको विषयमा कांग्रेसले राना मगरमाथि प्रश्न उठाएको थियो । त्यतिबेला एमालेले कांग्रेसको कुरा सुनेन । अहिले भने कांग्रेसको ट्र्यापमा परेसँगै एमालेले आचरणको अभियोग लगाउँदै उपसभामुखबाट राना मगरलाई हटाउन लागि परेको हो । संवैधानिक परिषद्मा प्रधानमन्त्री अध्यक्ष रहन्छन् । त्यसपछि प्रधानन्यायाधीश, विपक्षी दलका नेता, सभामुख, राष्ट्रिय सभाका अध्यक्ष र उपसभामुख सदस्य हुन्छन् । यीमध्ये अहिले तीन जना प्रतिपक्षी दलबाट भएसँगै सरकार अप्ठेरोमा परेको देखिन्छ । कुनै कारण प्रधानन्यायाधीश तटस्थ बसिदिए प्रधानमन्त्री ओली अल्पमतमा पर्छन् । यसकारण पनि सरकारले गर्नुपर्ने संवैधानिक निकायसम्बन्धी विभिन्न निर्णय र काम रोकिएका छन् ।
यही विषयमा शक्ति आर्जनका लागि अहिले एमाले कांग्रेससँग झुक्नुपरेको देखिन्छ । कुनै बेला गल्ती गरेकै भए पनि संरक्षण गरिराख्ने, अहिले आफू अनुकूल नभएपछि भने रातारात हटाउने निर्णय गर्नु आफैंमा शक्तिको उन्मादको खेलमा लागेका प्रस्ट हुन्छ । केही समयअघिसम्म मौन बसेको सत्तारुढ दल किन एकाएक यो खेलमा लाग्यो त ? यससम्बन्धी विभिन्न प्रश्नहरु उब्जेका हुन् । अहिले कुनै बेला ओलीले अध्यादेशमार्फत ५२ जना संवैधानिक आयोगका पदाधिकारी नियुक्त गरेका थिए । अहिले यो विषय अदालतमै पुग्यो । अदालतले तत्कालका लागि यो निर्णयलाई निरन्तरता दिए पनि थप के हुने भन्नेमा अन्योल छ । यस्ता विषयमा ‘डेडलक’ खोल्न र संवैधानिक आयोगमा नयाँ पदाधिकारी चयन गर्न कांग्रेस एमालेले इन्दिरालाई उपसभामुखबाट हटाउन खोजेको देखिन्छ । शक्तिको उन्मादमा स्वार्थअनुकूल यसरी अभियान चलाउनु राम्रो अभ्यास होइन ।
