हेटौंडा । बागमतीका मुख्यमन्त्री ईन्द्रबहादुर बानियाँले तामाङ पत्रकार संघ, बागमती प्रदेश समितिलाई अक्षयकोष स्थापनार्थ २ लाख रुपैयाँ सहयोग गरेका छन् । नेपाल तामाङ पत्रकार संघ, बागमती प्रदेश र मकवानपुर जिल्ला समितिको संयुक्त आयोजनामा आइतबार हेटौंडामा आयोजित ३१ औं तामाङ प्रसारण दिवसको अवसरमा मुख्यमन्त्री बानियाँले उक्त रकम प्रदान गरेका हुन् ।
कार्यक्रममा तामाङ डाजाङका प्रकाशक अर्जुनबहादुर तामाङ र पत्रकार भुवन घलान पुरस्कृत भए । अर्जुनलाई ‘आईतेसिं–बुद्धिमाया रुम्बा स्मृति तामाङ पत्रकारिता’ पुरस्कारबाट नगद १० हजार १ सय रुपैयाँसहित दोसल्ला र सम्मानपत्र प्रदान गरिएको थियो । पत्रकार घलानलाई मकवानपुर जिल्ला शाखाले स्थापना गरेको ‘तामाङ पत्रकारिता पुरस्कार’बाट पुरस्कृत भएका हुन् । उनलाई नगद ५ हजार रुपैयाँसहित सम्मानपत्र प्रदान गरिएको थियो ।
संस्कृति तथा पर्यटन मन्त्रालको सहकार्यमा सम्पन्न कार्यक्रममा ‘सरकारी कामकाजी भाषाका रूपमा तामाङ भाषाको प्रभावकारी कार्यान्वयनमा सञ्चारमाध्यम तथा सरोकारवालाको भूमिका’ विषयक अन्तरक्रिया समेत गरिएको थियो ।
कार्यक्रममा संस्कृति तथा पर्यटन मन्त्रालयका सचिव दिपेन्द्र सुवेदीले मन्त्रालयतर्फबाट भाषा ऐन कार्यान्वयनका काम तीब्र गतिमा भइरहेको जानकारी दिंदै नियमावली तयार भएको बताए । उनले नेपाल तामाङ घेदुङ र नेवादयः दबूको सहकार्यमा सरकारी कार्यालयका कर्मचारीका लागि भाषा प्रशिक्षण प्याकेज बनाइएको समेत बताए ।
पत्रकार संघ, बागमती प्रदेशका अध्यक्ष ज्ञानेन्द्र तामाङको सभापतित्वमा भएको सो कार्यक्रमा कैलाश गाउँपालिकाका अध्यक्ष लोकबहादुर मोक्तान, वरिष्ठ पत्रकार प्रताप बिष्ट, नेपाल पत्रकार महासंघ बागमती प्रदेश अध्यक्ष कृष्ण सारु मगर र नेपाल तामाङ घेदुङका संघीय सदस्य मेम्बर लो तामाङलगायत प्रमुख वक्ताका रूपमा थिए ।
त्यसैगरी संविधानसभा सदस्य गोविन्द्रराम चेपाङ, जिल्ला समन्वय समिति, मकवानपुरको प्रमुख ललितबहादुर घलान, तामाङ पत्रकार संघका संघीय सचिव आदर्श थोकर, नेपाल पत्रकार महासंघ, मकवानपुरका अध्यक्ष बालकृष्ण अधिकारी, नेपाल तामाङ घेदुङको जिल्ला अध्यक्ष कालु घलानलगायतले मन्तव्य राखेका थिए ।
