मंगलबार प्रधानमन्त्री केपी शर्मा ओलीले १२ लाखभन्दा बढी भूमिहीनलाई चाँडोभन्दा चाँडो लालपुर्जा बाँडेर इतिहास रच्न निर्देशन दिए । यो निर्देशनको उद्देश्य प्रस्टै देखिन्छ- भूमिहीनलाई लोभ्याउनु । सुकुम्बासीलाई जमिनको लालपुर्जा बाँड्ने लोभ सरकारमा बस्नेहरुले यसरी नै बाँड्ने गर्छन् । यसअघि सरकारको नेतृत्व गरेका दलका नेताहरुले पनि बेलाबेला लोभ देखाएका हुन् । तर यो समस्या सुल्झने अवस्था देखिँदैन ।
प्रस्टै छ, सुकुम्बासी को हुन् को हैनन् भन्ने विधि जाँच्ने प्रविधि नेपालमा छैन । प्रशस्त जमिन भएकै मानिसहरु पनि नयाँ ठाउँको लालपुर्जा पाइने आशमा सुकुम्बासी बनेका घटना बेलाबेला सार्वजनिक भएकै हो । यस्तो घटनाले वास्तविक सुकुम्बासी भने पीडामा परेका छन् । फेरि जमिन पाउन सजिलो पनि छैन । जमिनका लागि सरकारी वन फाँड्नुपर्छ । यो वन कानुनविपरीत हुन जान्छ । यसका लागि वैज्ञानिक बन्दोवस्ती मालपोत पनि सक्षम देखिँदैन । अझ भूमि समस्या समाधान आयोग आफैं कर्मचारी नभएर समस्यामा परेको देखिन्छ ।
१२ लाखभन्दा बढीलाई लालपुर्जा बाँड्नेगरी गठन भएको आयोगलाई न त पुग्दो कर्मचारीको सुविधा छ न त प्रविधिको । त्यसैले बाँके बर्दियाबाहेक धेरै ठाउँमा दिने जमिनको टुंगो लागेको छैन । कार्यकर्ता भर्ती केन्द्र बनेको आयोगका जिल्ला समितिमा कसको मान्छे हाल्ने भन्नेमै हानथाप छ । यसरी जग नै नहालेको आयोगको वार्षिक समीक्षामा ओलीले छुमन्तरमा काम सकिनेझैं गरी काम चाँडो सक्न निर्देशन दिए । निर्देशन दिन निकै सजिलो छ । तर वातावरण यति बिग्रिएको अवस्था छ कि भूमि समस्या समाधानका लागि बनेको भूमि विधेयक शक्तिशाली सरकारकै सांसदहरुले पारित गर्न सकेका छैनन् ।
अहिले सरकारमा एमाले र कांग्रेस छ । एमालेको मन्त्री बलराम अधिकारीले अघि बढाएको विधेयक अहिले कांग्रेसले अड्काएर राखेको छ । कारण प्रधानमन्त्री ओलीकै गतिविधिमा शंका छ उसलाई । नेताहरु ‘म कुटेजस्तो गर्छु, तिमी रोएजस्तो गर’ शैलीमा भूमिहीनमाथि राजनीति गर्दै छन् । अहिलेको आयोगका पदाधिकारीको म्याद जम्मा तीन वर्षको हो । लगभग एक वर्ष त पदाधिकारीले पूरा गरिसकेका छन् । अबको दुई वर्षमा आयोगले यो काम गर्नसक्ने सम्भावना न्यून देखिन्छ ।
अझ नेपालको राजनीति कति बेला के हुन्छ पत्तो हुन्न । सरकार फेरिए पदाधिकारी पनि फेरिन्छन् । अनि त कामको सुरुआत फेरि शून्यबाट । यसरी नै राजनीतिक दलका नेताहरुले हरेक चुनावमा आफ्नो भोट सुरक्षित पार्न लालपुर्जाको आश देखाउँछन् । प्रधानमन्त्री ओलीले मंगलबार यसरी नै मतदाता लोभ्याउन लालपुर्जाको सपना देखाएका हुन् ।
