नेपाली राजनीति यस वर्ष गाईजात्रामय भयो । पहिलो र दोस्रो दलले सरकार गठन नगर्ने संसदीय परम्परालाई ध्वस्त पार्दै कांग्रेस-एमालेले सरकार गठन गरे । सुशासन कायम गर्ने वाचा गरे । तर, गिरिबन्धु प्रकरण, भुटानी शरणार्थी प्रकरण र बाँसबारीप्रकरण सामसुम पारे । यो भन्दा अर्को गाईजात्रा के हुन सक्ला र ?
अझ उधेकलाग्दो त प्रधानमन्त्री केपी शर्मा ओलीकै नेतृत्वमा सुशासन आयोग गठन भयो । जबकि, उनकै मन्त्रिपरिषद्मा संघीय मामिला तथा सामान्य प्रशासनमन्त्री रहेका राजकुमार गुप्ताले घुसकाण्डमा मुछिएर सत्ताबाट हात धुनुप¥यो । भूमि व्यवस्थामन्त्री बलराम अधिकारी पनि घुसकाण्डमा मुछिए । गृहमन्त्री रमेश लेखक भिजिट भिसामा मानव तस्करी गर्ने प्रकरणमा जोडिए । ऊर्जामन्त्री दीपक खड्काको नाम सेटिङ प्रकरणमा आयो । तर, पनि प्रधानमन्त्री ओली सुशासन आयोगको अध्यक्ष बने । ‘म भ्रष्टाचार गर्दिनँ, अरुलाई पनि गर्न दिन्नँ’ भनेर हाँक दिने ओली सरकारको यो भन्दा रोचक गाईजात्रा के चाहिँ होला र ?
दलहरूतर्फ हेर्दा यस वर्ष गाईजात्रारुपी दुई लाइने संघर्ष हरेक दलमा देखियो । प्रधानमन्त्री ओलीको दल एमालेमा त पूर्वराष्ट्रपति विद्यादेवी भण्डारीले रडाको मच्चाइन् । अन्ततः ओलीले एमालेको गेटबाटै उनलाई आउट गरे । दुई कार्यकाल अध्यक्ष र ७० वर्षे उमेर हद हटाए । अरुलाई नेतृत्वमा छेक्न बनाइएको यस्तो प्रावधान आफ्ना लागि भने हटाएर खुला गरे । जहिले गाईजात्रा देखिने कांग्रेसमा यसपटक पनि नदेखिने कुरै भएन । कांग्रेसको शेखर कोइराला समूह त स्थायी प्रतिपक्षीजस्तो देखियो । चुनावमा अन्तर्घातको आरोपमा अनुशासनको कारबाही सभापति देउवापक्षले गर्दा यो समूहका नेताहरूले तीन फिट उफ्रिँदै विरोध गरे । बागमतीमा आफ्नै सरकार ढाले ।
माओवादीको पार्टी सत्तामा ३६ वर्षदेखि विराजमान पुष्पकमल दाहालले पार्टी फुटाउन लागेको आरोप लगाएर जनार्दन शर्मालाई कमजोर बनाए । उनै दाहालले भने सत्ताका लागि जहिल्यै खुट्टा उचालिरहे । उनी सत्ताको छटपटिमा देखिए । सरकार ढल्ने दिनगिन्ती गरे । स्टन्टवाजी दल रास्वपाले हालै अदालतलाई चुनौती दिँदै सहकारी ठगी आरोपी रवि लामिछानेको नाममा हस्ताक्षर संकलन गर्यो । शनिबार त रविको कटआउटमै रक्षा बन्धन बाँधी दिए । यी सबै गाईजात्रालाई मात खुवाउने गतिविधि हुन् । संसद्को पाँचौ दल राप्रपा र राजावादी शक्तिहरू ज्ञानेन्द्र शाहलाई फेरि राजा बनाउन तम्सिए । ज्ञानेन्द्र पनि राजा भइएला कि भन्नेमा थिए । सडकमा केही हजार जनता पनि देखिए । तर, यतिबेला राजा ल्याउने भन्ने ठूलो दल राप्रपा फुटको डिलमा छ । अध्यक्ष राजेन्द्र लिङ्देन र महामन्त्री धवलशमशेर जबरा आपसी शक्ति संघर्षमा छन् ।
नेकपा एकीकृत समाजवादीमा हालै अध्यक्ष माधवकुमार नेपाल र झलनाथ खनालको भीषण संघर्ष चलिरहेको छ । एकले अर्कालाई ‘पार्टीबाट बाहिर जा’ भन्न थालेका छन् । साना दलका ठूला विवाद भन्ने यो दलमा देखिएको छ । नयाँ भनिएका दुई दल जनमत र नागरिक उन्मुक्तिमा पारिवारिक झगडा देखियो । जनमत अध्यक्ष डा. सिके राउतले त श्रीमतीसँग सम्बन्ध विच्छेद नै गरे । नाउपा अध्यक्ष रञ्जिता श्रेष्ठ र संरक्षक रहेका श्रीमान् रेशमलाल चौधरीबीच कटुतापूर्ण सम्बन्ध छ । अलग हुने स्थितिमा दुई नेता पुगेका छन् र पार्टीलाई छिन्नभिन्न बनाउनेतिर उनीहरूको झगडा केन्द्रित छ । यी दृष्टान्तले नेपाली राजनीतिक दलहरू वर्षैभरि गाईजात्रा देखाउनमै व्यस्त भएको प्रस्ट देखाउँछ । अनि यी ‘गाईजात्रे’ दलहरुबाट के आशा गर्नु ?
-1752335779.jpg)
