काठमाडौं। बालवाङ्मय तथा अनुसन्धान केन्द्रको १० औं वार्षिक साधारणसभाले अनन्त वाग्लेको अध्यक्षतामा नयाँ कार्यसमिति चयन गरेको छ । काठमाडौंको साप फाल्चामा शनिबार सम्पन्न साधारण सभाले वाग्लेलाई दोस्रो कार्यकालका लागि अध्यक्षमा सर्वसम्मत चयन गरेको हो ।
कार्यसमितिको उपाध्यक्षमा मन्जु ज्ञवाली, महासचिवमा शान्ति सापकोटा, सचिवमा सन्जोग ठकुरी र कोषाध्यक्षमा मनोजकुमार श्रेष्ठ चयन भएका छन् । सदस्यहरूमा नेत्र तामाङ, रवीन्द्र मानन्धर, सुशीला तामाङ र हिक्मत दाहाल चयन भए ।
निर्वाचनका लागि प्रमोद प्रधानको संयोजकत्वमा सिर्जना शर्मा र प्रा.डा. तारानिधि भट्टराई रहेको तीन सदस्यीय अध्यक्ष मण्डल गठन गरिएको थियो ।
साधारणसभाअघि केन्द्रद्वारा प्रकाशित "अपराजिता - जीवन बदल्ने छोरीहरु" कृतिको लोकार्पण भएको छ । कृतिमा ट्रेल म्याराथन धावक मिरा राई, आइटी इन्जिनियर श्रीती श्रेष्ठ, तेस्रो लिंगी अभियन्ता पिङ्की गुरुङ, पहिलो महिला रक ब्यान्ड संस्थापक अभया सुब्बा र शिक्षा कर्मी रित काफ्लेको जीवनी समेटिएको छ । अनन्त वाग्लेको लेखनमा रहेको किताब नेदरल्यान्डको हिरोइन मुभमेन्टसँग सहकार्यमा प्रकाशन भएको केन्द्रले जनायो ।
