कार्यवाहक अध्यक्ष बनाउन हाम्रो विधानले कहीँ कतैबाट मिल्दैन तर अध्यक्षले कार्यवाहक अध्यक्ष बनाउनुभयो । विधानविपरीतको काम गरेपछि उहाँमाथि हामीले ‘एक्सन’ लियौं ।
ठाकुरसिंह थारु
महासचिव, नाउपा
काठमाडौं- पारिवारिकसँगै पार्टीमा निम्तिएको कलहबीच रञ्जिता श्रेष्ठ चौधरी नागरिक उन्मुक्ति पार्टी (नाउपा)को अध्यक्षबाट बर्खास्त भएकी छन् । उनको साधारण सदस्यतासमेत खोसिएको छ । उनी १९ पुस २०७८ मा अध्यक्ष बनेर नाउपा दर्ता गरेकी थिइन् ।
साढे तीन वर्षपछि भने उनलाई श्रीमान् रेशमलाल चौधरी पक्षीय नाउपाको राष्ट्रिय भेलाले बुधबार बर्खास्त ग¥यो । रञ्जिता पछिल्लो समय विवादैविवादमा मुछिएकी छन् । तर, अध्यक्षबाट बर्खास्तीमा पर्नुको कारण भने कार्यवाहक अध्यक्ष तोकिनु हो । स्वास्थ्यको समस्या देखाउँदै उनले आफूनिकट वरिष्ठ नेता शिव बाँस्तोलालाई सोमबार कार्यवाहक अध्यक्षको जिम्मेवारी तोकेकी थिइन् । रञ्जिताको यो कदमलाई रेशमपक्षले विधानविपरीत भन्यो । रेशमका अनुसार कार्यवाहक तोक्ने रञ्जिताको कदमले आफू र पार्टी सदस्यहरूको चित्त अत्यन्तै दुख्यो । त्यही भएर रञ्जिताविरुद्ध पार्टीले गम्भीर कदम चाल्न सक्ने बताउँथे । नभन्दै बुधबार रेशमपक्षको राष्ट्रिय भेलाले रञ्जितालाई अध्यक्षबाट बर्खास्त गरेको हो ।
पार्टी महासचिव ठाकुरसिंह थारुले प्रभावसँग भने, ‘कार्यवाहक अध्यक्ष बनाउन हाम्रो विधानले कहीँ कतैबाट मिल्दैन तर अध्यक्षले कार्यवाहक अध्यक्ष बनाउनुभयो । विधानविपरीतको काम गरेपछि उहाँमाथि हामीले एक्सन लियौं ।’ रञ्जिताले ‘राष्ट्रिय भेला’लाई सानो सर्कलको स्वार्थी जमघट भनेकी थिइन् । त्यस्तो सर्कलले आफूलाई अध्यक्षबाट हटाउने विषय हास्यास्पद हुने उनले टिप्पणी गरिन् । ‘मलाई केन्द्रीय अध्यक्षबाट हटाउने ? यो आफैंमा हास्यास्पद कुरा हो । केन्द्रीय अध्यक्षको जिम्मेवारी विधानअनुसार हुन्छ, कुनै व्यक्तिको चित्त नबुझेर हुँदैन,’ रेशमलक्षित रञ्जिताको भनाइ थियो ।
मलाई केन्द्रीय अध्यक्षबाट हटाउने ? यो आफैंमा हास्यास्पद कुरा हो ।
रञ्जिता श्रेष्ठ चौधरी
नाउपा अध्यक्षबाट पदमुक्त
बर्खास्त भएकी रञ्जिता नाउपाकी संस्थापक अध्यक्ष हुन् । श्रीमान् रेशम संरक्षकको भूमिकामा छन् । २०८० को पुसमा भएको पार्टीको पहिलो महाधिवेशनबाट रञ्जितालाई अध्यक्षबाट हटाइएको थियो । पछि उनलाई सहअध्यक्ष मनोनीत गरिएको थियो । रञ्जिताले स्वीकारिनन् । त्यसबेला रेशम अध्यक्ष बनेका थिए । तर, निर्वाचन आयोगले रेशमलाई अध्यक्ष हुन अयोग्य ठहर गर्याे । रञ्जिता स्वयंले पनि आफूविरुद्ध सर्वोच्च अदालतमा परेको एक मुद्दामा लिखित जवाफमा भनेकी थिइन्, ‘...जन्मकैदको सजाय भोगी कारागारमा बसेको अवस्थामा राजनीतिक दलको सदस्यता प्रदान हुने अवस्था थिएन, र छैन । महाधिवेशनबाट केन्द्रीय अध्यक्ष चुनिने कुरा त परै जाओस् निजले संगठित सदस्यता प्राप्त गरी महाधिवेशनमा भाग लिन पाउने अवस्थासमेत छैन ।’
तर, नाउपाको रेशमपक्षीय केन्द्रीय सदस्य, संघ र प्रदेशका सांसद लगायतको बुधबारको भेलाले रञ्जितालाई पदमुक्त गरिएको हो । नाउपाका नेताहरूका अनुसार पदमुक्त गर्न हुँदैन भन्ने आवाज भेलामा सुनिएन । अध्यक्ष रञ्जिता र उनीपक्षीय कोमल ज्ञवाली भेलामा थिइनन् । बर्खास्तीअघि रञ्जितालाई पार्टीको अनुशासन आयोगले स्पष्टीकरण सोधेको थियो । स्पष्टीकरण दिने अवधि २४ घण्टा थियो । त्यस अवधिमा रञ्जिताले स्पष्टीकरण नदिएको महासचिव थारुले बताए । उनका अनुसार स्पष्टीकरण नआएपछि उनलाई पदमुक्त गरिएको हो ।
रञ्जितामाथि कारबाही गर्नुको पछाडि विविध घटनाक्रम जोडिएका छन् । त्यसमध्येको एउटा हो– भूमि व्यवस्था, सहकारी तथा गरिबी निवारणमन्त्री भएको बेला उनले कास्कीको भूमि आयोग अध्यक्ष र मालपोत प्रमुख सरुवा प्रकरणमा घुस लिएको अडियो बाहिरिनु । दुई निकायका प्रमुखको सरुवा बहुचर्चित लिचीबारी प्रकरण हो । यसमा रञ्जिता मुछिएकी छन् । हुन पनि पूर्वसामान्य प्रशासनमन्त्री राजकुमार गुप्ता, रञ्जिता र मन्त्रीलाई पैसा बुझाउने व्यक्तिसँग निरन्तर संवाद भएको अडियो नै सार्वजनिक भइसकेको छ । कतिसम्म भने रञ्जिताले पोखराका विचौलियासँग निरन्तर फोन र म्यासेज गरेर काम अघि बढाइदिने आश्वासन दिएको खुलेको छ । यसबारे अख्तियारले रञ्जितासँग बयान लिइसकेको छ ।
यो प्रकरणपछि रेशमले रञ्जितालाई पार्टी बैठकमा स्पष्टीकरण दिन दबाब दिएका थिए । रञ्जिता यो प्रकरणमा जिम्मेवार बन्नुपर्ने उनको मत थियो । यस्तोमा स्वास्थ्य समस्याको कारण देखाउँदै आफूनिकट शिव बाँस्तोलालाई कार्यवाहक अध्यक्षको जिम्मेवारी दिएर चलाखीपूर्वक सम्भावित कारबाहीबाट जोगिन उनले रणनीति अख्तियार गरिन् । भलै उनी कारबाहीबाट जोगिनन् । अर्को, रेशम–रञ्जिता सम्बन्ध ठीकठाक छैन । टीकापुर घटनामा दोषी ठहरिएर जेल परेका रेशम सरकारको सिफारिसमा राष्ट्रपति रामचन्द्र पौडेलबाट आममाफी पाएर छुटेदेखि नै श्रीमान्–श्रीमतीको राजनीतिक र पारिवारिक दुवै सम्बन्धमा दरार पैदा भयो । उनीहरूबीचको टकराव सार्वजनिकरूपमै प्रकट हुँदै आयो । त्यसको असर प्रदेश र संघीय सरकारमै पटक–पटक देखियो ।
जनमत पार्टी र नाउपाबीचको एकता प्रक्रियामा पनि रेशम–रञ्जिताको फरक–फरक धारणा थियो । तर, पार्टी एकता भएन । पार्टी सञ्चालन प्रणालीमै पनि दुईबीच मतान्तर थियो । मतान्तर बढ्दै जाँदा दुई पक्षबीच केही महिनाअघि पार्टी कार्यालयमै हात हालाहाल भएको थियो । त्यसपछि पार्टीमा समानन्तर गतिविधि बढ्दै थियो । त्यहीबीच रेशमले एकपटक रञ्जिताकै कारण आफू आत्महत्या गर्ने तहसम्म पुगेको बताएका थिए । उनै रञ्जितालाई अध्यक्षबाट बुधबार बर्खास्त गरिएको हो ।
अबको अध्यक्ष को ?
रञ्जिता श्रेष्ठको बर्खास्तीपछि नाउपा अध्यक्षमा तीन जना नेताको नाम चर्चामा छ– रामलाल डगौरा, लालवीर चौधरी र गंगा चौधरी । टीकापुरका मेयरसमेत रहेका रामलाल पार्टीको निर्वाचन आयोग एवं अनुशासन आयोगका अध्यक्ष छन् । उनकै अध्यक्षतामा पार्टीको राष्ट्रिय भेला बसेको हो । रेशमलाल चौधरीका बुबा लालवीर र गंगा प्रतिनिधिसभा सदस्य हुन् ।
यसअघि महाधिवेशनबाट रेशम अध्यक्ष हुँदा गंगा महासचिव निर्वाचित भएका थिए । उनी पनि यसपटक अध्यक्षको दाबेदार देखिएका छन् । आज भने यिनै तीन नेता रामलाल, लालवीर र गंगामध्ये एक जनालाई अध्यक्ष छनोट गर्ने स्रोतको दाबी छ ।
भेलाबाट एक वरिष्ठ उपाध्यक्ष, सात प्रदेशका संयोजक रहनेगरी सात उपाध्यक्ष, एक महासचिव र सात सहमहासचिव तोकिने भएको छ । महाधिवेशनबाट निर्वाचित सिंगो टिमलाई ब्युउँताउने रेशमपक्षको रणनीति छ । त्यसका लागि निर्वाचन आयोगसँग छलफल गरिरहेको नाउपा महासचिव थारुले बताए ।
