ठुला र पुराना दलका नेताका कार्यशैलीका कारण जनता आक्रोशित छन् । नौ–नौ महिनामा सरकार फेरिइरहने, भ्रष्टाचार, सेटिङजस्ता काण्डका कारण रुष्ट जनताले वैकल्पिक शक्ति खोजिरहेका छन् । २०७९ को निर्वाचनमा यसरी नै राष्ट्रिय स्वतन्त्र पार्टी, मधेसमा जनमत पार्टी र सुदूरपश्चिममा नागरिक उन्मुक्ति पार्टीको उदय भए । यी तीन दललाई जनताले अप्रत्यासितरुपमा समर्थन पनि गर्यो ।
तर तिनै दल अहिले मन्त्रीको भागबण्डादेखि भ्रष्टाचार काण्डमा फस्न थालिसकेका छन् । कतिसम्म भने जनताको मन जितेर संघदेखि प्रदेशको सरकारमा पुग्न सफल नागरिक उन्मुक्तिका मन्त्री र सांसदहरु भ्रष्टाचार मुद्दाका कारण सरकारबाट बाहिरिनुपर्यो । । अहिले नागरिक उन्मुक्तिकी अध्यक्ष रञ्जिता श्रेष्ठ भ्रष्टाचारको आरोपमा मुछिएकी छन् । उनको दलमा परिवारवाद लागू भएको छ । श्रेष्ठका श्रीमान् रेशम चौधरीदेखि उनका ससुरा लालवीर चौधरीको पार्टीमा बोलवाला छ ।
यता मधेस प्रदेशमा जनता समाजवादी पार्टीलाई टक्कर दिनेगरी उदायको हर्न छापवाला जनमत पार्टी पनि अहिले सत्ताको स्वादमा डुबेको छ । सिके राउत नेतृत्वको जनमतले मधेस प्रदेशको मुख्यमन्त्रीदेखि संघको मन्त्रीसम्मको स्वाद चाखिसकेको छ । तर, यही दल अहिले विवादमा तानिएको छ । आफ्नो पार्टीको समानुपातिक सांसद फिर्ता बोलाउन जोडबल गरेर जनमत विवादमा तानियो ।
वैकल्पिक शक्तिको नेतृत्व गरिरहेको राष्ट्रिय स्वतन्त्र पार्टी (रास्वपा)का सभापति रवि लामिछाने सहकारीको बचत रकम अपचलन अभियोगमा थुनामा छन् । उनको दलका कार्यवाहक सभापति डोलप्रसाद अर्याललाई वैदेशिक रोजगारीका क्रममा ठगी गरेको आरोप अरु दलका नेताहरुले लगाउन थालेका छन् । ढाकाकुमार श्रेष्ठले मन्त्री बन्न दुई करोड रुपैयाँ मागेको घुस प्रकरणका कारण सांसद पद नै गुमाएका छन् । मुकुल ढकाललाई महामन्त्रीबाट हटाएर कविन्द्र बुर्लाकोटीलाई महामन्त्री बनाएको अवस्था छ । यो मुद्दा निर्वाचन आयोगबाट किनारा लाग्न सकेको छैन । मन्त्री बनिसकेकी सुमना श्रेष्ठले असन्तुष्टि जनाउँदै सहमहामन्त्री पदबाट राजीनामा दिइसकेकी छन् । यसरी वैकल्पिक शक्तिका रुपमा उदाएका दलका नेताहरु छिन्नभिन्न हुन थालेका छन् ।
वैकल्पिक दललाई जनताले साथ दिइरहँदा यी दलका नेताहरु भने आपसी मनमुटावमा लागिसकेका छन् । जुन दलबाट विकास सम्भव छैन भनेर बुलन्द आवाज निकालेर प्रतिनिधिसभामा आइपुग्यो, यी दलहरु उनै पुराना दलको पिछालग्गु भएका छन् । पुरानै दलको सिको गर्दै विवाद र भ्रष्टाचारमा मुछिएका छन् । वैकल्पिक भनिएका दलमा पनि पुरानै रोग सल्किएको छ । जनताले विश्वास गर्ने गरी यी वैकल्पिक दल सुध्रिएलान् त ? यो आजको गम्भीर प्रश्न बनेको छ ।
