काठमाडौं– विश्व सम्पदा सूचीमा सूचीकृत ऐतिहासिक पशुपतिनाथ मन्दिर परिसरमा ‘दिव्य पशुपतिनाथ अभियान’ को औपचारिक सुरुवात गरिएको छ । प्लास्टिक फोहोर व्यवस्थापनको समस्या र हरित वातावरण पवर्द्धनलाई ध्यान केन्द्रित गर्दै मंगलबार वृक्षारोपणमार्फत अभियानको थालनी गरिएको हो ।
संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले वृक्षारोपण गरेर अभियानको उद्घाटन गरेका थिए। उद्घाटन कार्यक्रममा दुई सयभन्दा बढीको उपस्थिति रहेको थियो । कार्यक्रममा पशुपति क्षेत्र विकास कोषका कार्यकारी सदस्य सचिव सुवास चन्द्र जोशी, गौशाला प्रहरी प्रभागका डीएसपी सुकदेव खनाल, काठमाडौं महानगरपालिकाका प्रतिनिधिहरू, मैनादेवी फाउन्डेसनका अध्यक्ष केपी खनाल, अनुसन्धान तथा दिगो विकास केन्द्र नेपाल (क्रिएसन) की महासचिव तथा क्लाइमेट स्मार्ट सिटीज परियोजनाकी टिम लिडर सुजाता कोइराला लगायतको उपस्थिति रहेको थियो ।
अभियान अन्तर्गत वृक्षारोपण, सरसफाइ, फ्रन्टलाइन कर्मचारीका लागि व्यावसायिक सुरक्षा तालिम, प्लास्टिक फोहोरको पुनःप्रयोग र पुनःचक्रणमा केन्द्रित जनचेतनामूलक कार्यक्रम सञ्चालन गरिने बताइएको छ। मन्त्री पाण्डेले अभियानलाई वार्षिक रूपमा निरन्तरता दिनुपर्नेमा जोड दिँदै भने, ‘यो अभियानले हाम्रो पवित्र सम्पदालाई स्वच्छ र हरियाली बनाउने दिशामा महत्वपूर्ण योगदान पुर्याउनेछ। साथै, यसले दिगो र समावेशी शहरी विकासको दृष्टिकोणलाई पनि प्रतिविम्बित गर्छु ।’
मैनादेवी फाउन्डेसनका अध्यक्ष केपी खनालले वर्षभरि सञ्चालन हुने कार्यक्रमहरूमा समुदायको सक्रिय सहभागिता सुनिश्चित गरिने र वातावरणीय संरक्षणमा ध्यान केन्द्रित गरिने जानकारी दिए। क्रिएसनकी महासचिव कोइरालाले प्लास्टिक फोहोर व्यवस्थापनको दीर्घकालीन समाधानका लागि जनचेतनाको भूमिका अपरिहार्य रहेको बताउँदै भनिन्, ‘पशुपतिनाथ क्षेत्रमा जस्तै वातावरणमैत्री अभियान भरतपुरमा पनि प्रारम्भ गरिनेछ।’
क्रिएसनले लिड गरेको ‘क्लाइमेट स्मार्ट सिटीज’ परियोजनाअन्तर्गत सञ्चालनमा आएको ‘दिव्य पशुपतिनाथ अभियान’ दीर्घकालीन रूपमा अगाडि बढाउने भएको छ । यस अभियानले फोहोर व्यवस्थापन, प्लास्टिक प्रयोग न्यूनीकरण, पुनः प्रयोग र पुनः चक्रण पवर्द्धनजस्ता गतिविधि समेट्नने जनाएको छ ।
