बेइजिङ - व्यापारदेखि युक्रेन द्वन्द्वसम्मका विभिन्न विवादलाई सुल्झाउने प्रयास गरिरहेका चीन र युरोपेली सङ्घ (इयु) का शीर्ष नेताहरूले यस साता बेइजिङमा शिखर सम्मेलन गर्ने भएका छन् । बेइजिङ र ब्रसेल्सले आफ्नो कूटनीतिक सम्बन्ध स्थापनाको ५०औँ वार्षिकोत्सव मनाउन तयारी गरिरहेका छन्, तर राज्य अनुदान, बजारमा पहुँच र युद्धकालीन प्रतिबन्धहरूमाथि भएको झगडाले वार्षिकोत्सवलाई कमजोर बनाएको छ ।
चिनियाँ विदेश मन्त्रालयका प्रवक्ताले सोमबार युरोपेली परिषद्का अध्यक्ष एन्टोनियो कोस्टा र युरोपेली आयोगका अध्यक्ष उर्सुला भोन डेर लेयनले बिहीबार भ्रमण गर्ने पुष्टि गरेका छन् । बुधबार जापानमा छुट्टै बैठकको समापनपछि कोस्टा र भोन डेर लेयनले बेइजिङमा हुने इयु–चीन शिखर सम्मेलनमा भाग लिने इयुले शुक्रबार बताएपछि यो बयान आएको हो ।
कोस्टा र भोन डेर लेयनले चिनियाँ राष्ट्रपति सी जिनपिङसँग भेट गर्नेछन् । सीसँग उनीहरूले इयु–चीन सम्बन्ध र युक्रेनमा रुसको युद्ध लगायत वर्तमान भू–राजनीतिक चुनौतीहरूबारे छलफल गर्ने इयुको विज्ञप्तिमा उल्लेख छ । ब्लकका अनुसार चिनियाँ प्रधानमन्त्री ली कियाङसँग उहाँहरूले सम्बन्धको व्यापारिक र आर्थिक पक्षहरूलाई विस्तृत रूपमा समेट्नेछन् ।
“यो शिखर सम्मेलन चीनसँग उच्च स्तरमा संलग्न हुने र हामी दुवैका लागि महत्त्वपूर्ण मुद्दाहरूमा स्पष्ट, रचनात्मक छलफल गर्ने अवसर हो”, कोस्टाले भने, “हामी संवाद, वास्तविक संलग्नता र ठोस प्रगति चाहन्छौँ । हामी दुवै पक्षका लागि निष्पक्ष, सन्तुलित सम्बन्धको लक्ष्य राख्छौँ ।”
व्यापारिक तनावले बैठकको तयारीमा छाया पारेको छ । ब्लुमबर्ग न्युजले यस महिना चीनले मूलतः दुई दिने शिखर सम्मेलनको एक भाग रद्द गर्ने रिपोर्ट गरेको छ । दुवै पक्षले निष्पक्ष व्यापारको सिद्धान्तको उल्लङ्घनका रूपमा देखेका कुराहरूका लागि एकअर्काको आलोचना गरेका छन् ।
भोन डेर लेयनले यस महिना इयुले बेइजिङसँगको आफ्नो व्यापक व्यापार घाटालाई सम्बोधन गर्न खोजेको बताए । यो व्यापार घाटा गत वर्ष तीन खर्ब ५७ अर्ब डलर थियो । उनले ब्रसेल्सले पनि चीनसँग युरोपेली कम्पनीहरूका लागि बजार पहुँच सजिलो बनाउन र रणनीतिक रूपमा महत्त्वपूर्ण दुर्लभ खनिज तत्वहरूमा निर्यात नियन्त्रणहरू खुकुलो बनाउन माग गर्ने बताए ।
आफ्नो तर्फबाट बेइजिङले इयुले आफ्नो मानसिकता परिवर्तन गर्नुपर्ने र ‘मतभेद र घर्षणहरूलाई उचित रूपमा सम्हाल्नुपर्छ’ भनेको छ । तनावलाई बढाउँदै इयुको डाटा गोपनीयता प्रहरीमा सहयोग गर्ने एक आइरिस नियामकले यस महिना उसले चीनमा सर्भरहरूमा युरोपेली प्रयोगकर्ताहरूको व्यक्तिगत डाटाको भण्डारण गरेको कथित आरोपमा टिकटक विरुद्ध अनुसन्धान सुरु गरेको बताएको छ ।
डाटा संरक्षण आयोगले पहिले नै टिकटकलाई मे महिनामा चीनमा व्यक्तिगत डाटा पठाएका कारण ५३ करोड युरो (६२ करोड डलर) जरिवाना गरिसकेको छ । टिकटकको मूल कम्पनी बाइटडान्स चिनियाँ कम्पनी हो । टिकटकले जरिवानामा अपिल गर्ने योजना रहेको बताएको छ र बेइजिङले चिनियाँ फर्महरूलाई प्रयोगकर्ताहरूको व्यक्तिगत डाटा ‘अवैध रूपमा’ सङ्कलन र भण्डारण गर्न आग्रह गरेको कुरा अस्वीकार गरेको छ ।
बेइजिङको औद्योगिक अनुदानले युरोपेली प्रतिस्पर्धीहरूलाई अनुचित रूपमा कम गरिरहेको भन्दै इयुले चीनबाट आयात हुने विद्युतीय सवारी साधनहरूमा पनि भारी भन्सार शुल्क लगाएको छ । बेइजिङले त्यो दाबीलाई पनि अस्वीकार गरेको छ र आयातित युरोपेली सुँगुरको मासु, ब्रान्डी र डेरी उत्पादनहरूमा व्यापक रूपमा प्रतिशोधात्मक जाँचका रूपमा हेरिएको घोषणा गरेको छ ।
यसैबीच युक्रेनको युद्ध अर्को विवादको विषय भएको छ । इयुले चीनले रुसको आक्रमणलाई मौन समर्थन गरिरहेको धारणा बनाएको छ । इयुको उक्त आरोपलाई बेइजिङले अस्वीकार गरेको छ । गत हप्ता ब्रसेल्सले रुसको तेल राजस्व, बैंकिङ क्षेत्र र सैन्य क्षमताहरूलाई अवरुद्ध लक्ष्य राखेको नयाँ प्रतिबन्धको प्याकेज घोषणा गरेको थियो ।
यसमा केही चिनियाँ कम्पनी र वित्तीय संस्थानहरू पनि समावेश थिए । बेइजिङको वाणिज्य मन्त्रालयले सोमबार यस कदमको कडा आलोचना गर्दै भन्यो, “यसले चीन–इयु आर्थिक र व्यापारिक सम्बन्धहरूमा गम्भीर नकारात्मक प्रभाव पारेको छ ।”
-1752335779.jpg)
