देशमा रोजगारीको अवसर छैन । युवाहरु दैनिक रोजगारीको खोजीमा नयाँ–नयाँ मुलुकमा निस्कन्छन् । श्रम स्वीकृतिको झण्झटिलो प्रक्रियामा छिर्नुभन्दा उनीहरु दलाललाई केही बढी रकम तिरेर गन्तव्य मुलुक जान्छन् । यो प्रक्रियामा अध्यागमन कार्यालयका अधिकृतहरुको ‘सेटिङ’ देखिन्छ ।
यही प्रकरणका कारण विवादमा तानिएपछि अध्यागमन विभागका हाकिम तीर्थराज भट्टराईलाई रातारात गृह मन्त्रालयले गत जेठ पहिलो हप्ता हटाएको थियो । यो विषय अख्तियार दुरुपयोग अनुसन्धान आयोगले थाहा पाएपछि उनी छानबिनको दायरामा तानिए । भिजिट भिसामा रकम असुली प्रकरण पनि बाहिर आयो । बाहिर भिजिट भिसा प्रकरणमा रकम असुलीबारे छताछुल्ल भए पनि भित्र अध्यागमनका अधिकृतहरु भने सुध्रिने छाँट देखिँदैन । भट्टराईको ठाउँमा पठाएका विष्णुप्रसाद कोइरालाले दुई महिना हुन लाग्दा पनि त्यस विषयमा सुधार गर्न नसकेपछि उनलाई हटाएर गृहले नरहरि घिमिरेलाई पठाएको छ ।
कोइरालाको नेतृत्वमा पनि त्रिभुवन विमानस्थलमा खासै सुधार हुन नसकेको प्रस्टै देखिन्छ । उनी त्यहाँ गएपछि भिजिट भिसामा छल्दै भारतहुँदै त कतिपय सोझै श्रम गन्तव्यमा पुगेको देखिन्छ । यो विषय मिलेमतोमा हुने भएकोले बाहिर आउन सकेको छैन । सरकारमा सहभागी मन्त्रीदेखि नयाँ दलका सांसदहरुको समेत यसमा संलग्नता देखिएकाले अहिले मौन देखिन्छ सरकार ।
यता अध्यागमनका अधिकारीहरु भने ‘नानीदेखि लागेको बानी’ छोड्न नसकेझैं यस कार्यमा लागिरहेका छन् । त्यसैले पनि धेरैले अध्यागमनलाई मालदार कार्यालयको रुपमा चिनिन्छ । भिजिट भिसा प्रकरणमा रकम असुलीमा खासै सुधार नआएपछि गृह मन्त्रालयले अध्यागमन अधिकृतहरुलाई एकैसाथ सरुवा गर्ने तयारी पनि गरेको छ ।
सरकारले राहदानी बोकेकाहरुलाई सुरक्षाको निम्ति भन्दै जबसम्म छेकबार गरिरहन्छ यो समस्या समाधान हुन्न । भिजिट भिसामा हुने रकम असुली ‘ओपन सेक्रेट’ हुँदा पनि सरकारले शंकरदास बैरागी नेतृत्वको छानबिन समितिलाई तीन महिनाको समय दिएको छ । अझ यो समितिको सदस्य सचिवमा स्वार्थको द्वन्द्व मिल्नेगरी गृहकै सहसचिव प्रदीप कोइरालालाई राखिएको छ । यसले गर्दा गृहकै कर्मचारीले गर्ने बदनियत ढाकछोप हुने शंका सिर्जना भएको छ । यसरी नै ‘चोर पुलिस’को खेल खेल्दै जाने हो भने अध्यागमन सुध्रिदैन । यसका लागि पहिले त स्वतन्त्र व्यक्तिको नेतृत्वमा छानबिन समिति बन्नुपर्छ । अर्को विषय भनेको श्रम गन्तव्य मुलुक जानुपूर्व अपनाउनुपर्ने सरकारी मापदण्डमा सहज बनाउन सरकारले विशेष ध्यान दिनैपर्छ ।
-1752335779.jpg)
