नेपाली कांग्रेसको जारी केन्द्रीय समितिमा दुईवटा उदाहरणीय घटना तीन दिनमा देखिए । ती हुन् ‘धनतन्त्र’ र ‘डनतन्त्र’ । केन्द्रीय समितिको पहिलो दिन कांग्रेस संस्थापनइतरका नेता डा. शेखर कोइरालाले वैधानिकताको विषयलाई लिएर प्रश्न उठाएका थिए । उनको प्रश्न सोझिएको थियो डलर अर्बपति विनोद चौधरीमाथि । कांग्रेस विधानअनुसार कुनै पनि व्यक्ति कांग्रेस सदस्य बनेपछि केन्द्रीय सदस्यको उम्मेदवार बन्न १० वर्ष क्रियाशील सदस्य बन्नुपर्छ । तर अर्बपति चौधरी भने २०७४ सालमा कांग्रेस पसेर २०७८ मा सीधै केन्द्रीय सदस्य बने । हुन त धन भनेपछि महादेवको पनि त्रिनेत्र भन्ने उखान पहिलेबाटै चलेको हो । त्यतिबेला शेखरले पनि विधान पढेनन् वा के गरे उनै जानुन् । तर तिनै प्रश्न सोध्ने शेखरलाई अर्बपति चौधरीले उल्टै पाठ सिकाउन भ्याएका छन् ।
डलर अर्बपतिको दाबी थियो, आफूजस्तो शक्तिशाली मान्छेलाई रोक्नेगरी विधानको प्रश्न सोध्ने । खुरुक्क राख्नुपर्छ आफूजस्तो धनी मान्छेलाई । यसै शैलीमा विनोद प्रस्तुत हुँदा शेखरलाई साथ दिने कोही देखिएनन् केन्द्रीय समितिमा । तेस्रो दिन बुधबार अर्को रमाइलो के भयो भने ‘डनतन्त्र’ उदांगो भयो सानेपामा । सिन्धुपाल्चोकमा कार्यकर्तालाई धम्क्याउँदै तिघ्रा ठटाएर चुनाव जित्ने मोहन बस्नेत अहिले टेरामक्स प्रकरणमा मुछिएका छन् । विशेष अदालतले दही चिउरा खाने दिन पारेर उनलाई २५ लाख धरौटी राखेर तारेखमा छाडेको छ । उनै बस्नेतले महामन्त्री गगन थापालाई धम्की दिए बैठकमा । आफूलाई फसाउने गगन नै भएको दाबी यस्तै भए कोही नबच्ने शैलीमा बस्नेतले चेतावनी दिए ।
कांग्रेस लोकतान्त्रिक दल हो । कांग्रेसले जस्तो विचारलाई पनि प्रस्तुत गर्न खुला छाडिदिएको छ । खराब वा कमजोर विचारहरु आफैं हराएर जान्छन् भन्ने विश्वाय यो व्यवस्था स्वीकार गर्ने दलमा हुन्छ । यद्यपि, कांग्रेस केन्द्रीय समितिमा धेरैजसो नेताहरुले अनुशासन हराउँदै गएको र छाडापन बढ्दै गएको मंगलबारकै बैठकमा भनेका थिए । यद्यपि त्यो क्रम भने रोकिएको छैन । यसरी डनतन्त्र र धनतन्त्रको धक्कु लगाउनेहरु संस्थापन पक्ष अर्थात् सभापति शेरबहादुर देउवापक्षकै नेताहरु हुन् । धनको धक्कु देखाएर पार्टी छिरेका विनोदले शेखरलाई नैतिकताको पाठ सिकाउनु आफैंमा लज्जास्पद विषय हो । अर्को पार्टीलाई स्वच्छ राख्नका लागि हरसमय खबरदारी गरिरहने गगनविरुद्ध चेतावनी दिनु बस्नेतको हस्यास्पद तर्क हो ।
