संसद्मा बोल्दा गगनजीले टेरामक्सलाई बढी उछालेर मलाई फसाउन खोजे । गगनजी, तपाईं सबै नेतालाई समाउन लगाउनुस्, अनि नेता बन्नुहुन्छ ।
मोहनबहादुर बस्नेत
केन्द्रीय सदस्य, नेपाली कांग्रेस
काठमाडौं– आफ्नै महामन्त्री गगन थापाविरुद्ध आक्रामक अभिव्यक्ति दिने मोहन बस्नेत बुधबारको केन्द्रीय समितिमा पनि उनीविरुद्ध खनिएका छन् । टेरामक्स प्रकरणमा २५ लाख रुपैयाँ धरौटी राखेर छुटेको चौथो दिनमा बस्नेत महामन्त्री थापामाथि खनिएका हुन् ।
कांग्रेस सभापति शेरबहादुर देउवाको अध्यक्षतामा जारी केन्द्रीय समितिमा बस्नेतले आफूलाई थापाले खेदो खनेको आरोप लगाएका हुन् । ‘संसद्मा बोल्दा गगनजीले टेरामक्सलाई बढी उछालेर मलाई फसाउन खोजे,’ बस्नेतले भने । यसैगरी सबै नेतालाई समाउन सके थापा निर्विरोध नेता बन्नेसमेत बस्नेतको भनाइ थियो ।
‘गगनजी, तपाईं सबै नेतालाई समाउन लगाउनुस्, अनि नेता बन्नुहुन्छ,’ बस्नेतले भने । बैठक चलिरहँदा गगन भने तरुण दलको असन्तुष्ट पक्षसँग वार्ता गर्न पुगेका थिए । बस्नेत बेलाबेला गगनविरुद्ध आक्रोश पोख्ने नेतामा पर्छन् । यसरी नै सबैलाई पक्राउ गर्दै जाने हो भने एक दिन गगनको पनि पालो आउने उनको दाबी थियो ।
टेरामक्स प्रविधि खरिद प्रकरणमा अनियमितता भएको अभियोगमा अख्तियार दुरुपयोग अनुसन्धान आयोगले बस्नेतसहति १६ जनाविरुद्ध तीन अर्ब २१ करोड ८३ लाख ७७ हजार रुपैयाँ बिगो कायम गरी जेठ १ गते भ्रष्टाचार मुद्दा दायर गरेको थियो । उक्त मुद्दामा विशेष अदालतले बस्नेतसँग पुर्पक्षका लागि २५ लाख रुपैयाँ धरौटी मागेर असार १५ गते छाडेको हो ।
म तरुण दलको अनशनरत साथीहरूको माग सम्बोधन गर्न वार्तामा थिएँ । तर बैठकभित्रै एक केन्द्रीय सदस्यले हुंकार मिश्रित धम्की दिनुभयो रे । त्यो नैतिक पतन हो ।
गगन थापा
महामन्त्री, नेपाली कांग्रेस
आफू बैठकमा नभएको मौका छोपी बस्नेतले लगाएको आरोप गम्भीर भन्दै महामन्त्री थापाले खारेज गरेका छन् । ‘गम्भीर, अराजनीतिक, अशिष्ट र अमर्यादित’ आरोप भन्दै त्यसलाई थापाले फोहोरको संज्ञा दिए । थापाले केन्द्रीय समिति बैठकमा बस्नेतले आफूमाथि लगाएको आरोपलाई खारेज गर्दै भनेका छन्– फोहोर चलाएर म फोहोरी बन्न चाहन्न ।
बस्नेतलाई फोहोरको संज्ञा दिँदै थापाले आफूले यस्तो फोहोर नचलाउनेसमेत बताए । ‘राजनीतिको तह र सभ्यताको सीमा नाघ्ने’ भन्दै जवाफ फर्काएका हुन् । उनले कुनै आरोपको प्रतिवाद गर्नुको सट्टा त्यसलाई खारेज गर्ने शैली अपनाउँदै भनेका छन्, ‘बाले भन्नुहुन्थ्यो, कसैले आरोप लगाए दिइहाल्नुपर्छ जवाफ । आमाले भन्नुहुन्थ्यो, फोहोर नचलाउनू– फोहोर चलाए आफैं फोहोरी भइन्छ । आज म आमाको कुरा सुन्छु ।’
थापाले सभापति देउवालाई प्रत्यक्ष सम्बोधन गर्दै, आफ्नो अनुपस्थितिमा केन्द्रीय समितिको बैठकमा धम्कीपूर्ण भाषा र अभद्र व्यवहार देखाउने प्रवृत्तिको आलोचना गरे । उनले भने, ‘म तरुण दलको अनशनरत साथीहरूको माग सम्बोधन गर्न वार्तामा थिएँ । तर बैठकभित्रै एक केन्द्रीय सदस्यले हुंकार मिश्रित धम्की दिनुभयो रे । त्यो नैतिक पतन हो ।’
तरुण दलको अधिवेशन मंसिरमा
नेपाल तरूण दलको महाधिवेशन आगामी मंसिर २६–२८ गते हुने भएको छ । निर्देशन समितिको प्रस्तावअनुरूप उक्त मितिमा अनिवार्य सम्पन्न गर्नेगरी त्यही मितिसम्मका लागि तरुण दलको केन्द्रीय समितिको पदावधि थप गर्ने निर्णय गरिएको कांग्रेसले जनाएको छ ।
साथै तयारी र व्यवस्थापन सहजीकरणका लागि तरूण दलको मौजुदा कार्यसमिति भित्रैबाट सानो व्यवस्थापन समिति बनाइने कांग्रेस मुख्यसचिव कृष्णप्रसाद पौडेलले जानकारी दिए । महाधिवेशन सम्पन्न गर्न निर्देशन समितिलाई पार्टीकोतर्फबाट सम्पूर्ण जिम्मेवारी प्रदान गरिएको छ ।
त्यसैगरी, तोकिएको समयमै महाधिवेशन गर्नुपर्ने माग गर्दै पार्टी केन्द्रीय कार्यालय सानेपामा सुरू गरिएको ८० घण्टे आमरण अनसन उपसभापति पूर्णबहादुर खड्का र महामन्त्री गगनकुमार थापाबाट आजै तोडिएको छ । कांग्रेस केन्द्रीय कार्यसमितिको बैठक असार १६ देखि जारी छ ।
सभापति देउवाको सभापतित्वमा भएको बैठकमा बुधबार केन्द्रीय सदस्यहरू श्यामकुमार घिमिरे, मोहनबहादुर बस्नेत, शिवप्रसाद हुमागाईं, कर्णबहादुर बुढा, गोविन्दबहादुर शाह, राजेन्द्रकुमार केसी, मोहन आचार्य, रंगमती शाही, कान्तिका सेजुवाल, विद्यादेवी तिमिल्सिना, आमन्त्रित प्रदेश सभापतिहरू उद्धव थापा (कोशी), कृष्णप्रसाद यादव (मधेस), इन्द्रबहादुर बानियाँ (बागमती), अमरसिंह पुन (लुम्बिनी), ललितजंग शाही (कर्णाली) र वीरबहादुर बलायर (सुदूरपश्चिम) ले आ–आफ्नो धारणा राखेका थिए ।
विभिन्न प्रस्तावमा धारणा राख्नेक्रम जारी रहेकाले कार्यसमितिको बैठक आज (बिहीबार) दिउँसो १२ः३० मा पार्टी केन्द्रीय कार्यालयमा पुनःबस्ने मुख्यसचिव पौडेलले जानकारी दिए ।
