- प्रधानमन्त्री केपी शर्मा ओली शनिबारबाट स्पेन भ्रमणमा जाँदैछन्
- अहिले ऊर्जामन्त्री चीन भ्रमणमा छन् भने भौतिक मन्त्री टर्कीमा
- विदेश उडिरहने परराष्ट्रमन्त्री डा आरजु राणा देउवा आजै इटाली उड्दै
काठमाडौं– कृषिप्रधान देश भएकोले सर्वसाधारणलाई अहिले असारको चटारो लागेको छ । असार अर्थात् माना खाएर मुनी फलाउने महिनाको रुपमा समेत चिनिन्छ । तर सरकारलाई भने यतिबेला जनताको कामधन्दा भन्दा विदेश भ्रमणको असार लागेको छ ।अहिले मन्त्रिपरिषद्का अधिकांश सदस्यहरु फरकफरक देशमा दौडधुपमा लागेका छन् । कतिसम्म भने अहिले नियमित मन्त्रिपरिषद् बैठकमासमेत कोरम पु¥याउने हम्मे हुने गरेको प्रधानमन्त्री कार्यालयकै सचिवहरु बताउँछन् ।
प्रधानमन्त्री केपी शर्मा ओली शनिबार स्पेनको औपचारिक भ्रमणमा निस्कँदैछन् । असार १६ देखि १९ गतेसम्म आयोजना हुने ‘विकासका लागि वित्तसम्बन्धी चौथो अन्तरराष्ट्रिय सम्मेलन’मा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री ओली त्यसतर्फ जान लागेका हुन् । उक्त जम्बो टोलीमा खानेपानी मन्त्री प्रदीप यादव पनि सहभागी हुँदैछन् ।
पछिल्ला दिन सरकारको चर्को आलोचना जारी छ । बजेटको विषयमा सत्तारुढ दलकै नेताहरुले चित्त बुझाएका छैनन् । भिजिट भिसामा सर्वसाधारणबाट रकम असुली प्रकरणमा टालटुले छानबिन समिति गठन गरेर सरकारले विपक्षीको मुखमा बुझो लगाउने कोशिश गरेको छ । सरकारले खासै उपलब्धिमुलक काम गर्न नसकेपनि विदेश भ्रमणमा भने रेकर्ड नै राख्ने देखिन्छ ।
गत सोमबार मात्र उर्जा मन्त्री दीपक खड्का चीन उडेका छन् भने भौतिक मन्त्री देबेन्द्र दाहाल टर्की पुगेका छन् । सांघाई को–अपरेसन अर्गनाइजेसन (एससिओ)ले चीनको झेजियाङ प्रान्तको निङ्बो सहरमा आयोजना गरेको पाँचौं ऊर्जामन्त्रीस्तरीय बैठकमा भाग लिन खड्का चीन पुगेका हुन् । यता दाहाल भने असार १३ देखि १५ गतेसम्म टर्कीमा आयोजित ग्लोबल ट्रान्सपोर्ट कनेक्टिभिटी फोरममा सहभागी हुन त्यता पुगेका हुन् ।
यही जुन २३ देखि सुरु भएको बैठक जुन २७ तारिखसम्म सञ्चालन हुनेछ । असार ३ गते मात्र खेलकुद मन्त्री तेजुलाल चौधरी युएईको दुबई पुगेर फर्किएका छन् । चौधरी एसिया क्षेत्रस्तरीय दुई दिने एन्टी डोपिङ बैठकमा भाग लिन त्यता पुगेका हुन् । असार पहिलो साता स्वास्थ्य मन्त्री प्रदीप पौडेल बैंकक पुगेर फर्किएका छन् । असार ९ देखि १३ गतेसम्म बैंककमा भएको कार्यक्रममा भाग लिन त्यता पुगेका थिए ।
कृषि तथा पशुपंक्षीमन्त्री रामनाथ अधिकारी पनि असारको पहिलो हप्ता नै बैंकक पुगेर फर्किसकेका छन् । त्यसैगरी उपप्रधान तथा अर्थमन्त्ती विष्णु पौडेल असार १० बाट १२ गतेसम्म चीन पुगेर फर्केका छन् । एसियाली पूर्वाधार बैंकको बैठकमा भाग लिन पौडेल त्यता पुगेका हुन् ।
परराष्ट्र मन्त्री आरजु राणा विदेश उडिरहने मन्त्रीको पहिलो नम्बरमा पर्छिन् । कहिले जापान त कहिले दिल्ली पुगिरहने मन्त्री राणा इटालीको रोममा असार १३ देखि २९ सम्म हुने कार्यक्रमका लागि शुक्रबार उतै उड्ने कार्यक्रम रहेको छ । यता जर्मनीको बोनमा हुने नेपाल डेमा सहभागी हुन महिला मन्त्री नवल किशोर सुडीले उडान अनुमति पाएका छन् । यसैगरी सञ्चार तथा सूचना प्रविधिमन्त्री पृथ्वीसुब्बा गुरुङ स्वीट्जरल्यान्डको जेनेभा जाँदैछन् । उनी असार २३ देखि २७ गतेसम्म जेनेभामा हुने सूचना प्रविधिसम्बन्धी सम्मेलनमा भाग लिन जेनेभा जान लागेका हुन् ।
‘भ्रमण फजुल खर्चमात्र’
प्रधानमन्त्रीदेखि मन्त्रीहरु यसरी विदेश भ्रमणमा जाँदा कति खर्च हुन्छ ? मन्त्रिपरिषद्ले जनतालाई थाहा दिनुपर्ने हो । तर लर्को लागेर यसरी भ्रमणमा जाँदा हुने गरेका खर्च र उपलब्धिको कुनै विवरण उल्लेख गरेको पाइँदैन । आम जनता पार्टी (आजपा)का अध्यक्ष एवं पूर्व मन्त्री प्रभु साहले प्रधानमन्त्री केपी शर्मा ओलीको स्पेन भ्रमण मुलुकका लागि फजुल खर्चबाहेक अरू केही नभएको टिप्पणी गरेका छन् । वीरगञ्जमा बिहीबार आजपाले आयोजना गरेको पत्रकार सम्मेलनलाई सम्बोधन गर्दै साहले प्रधानमन्त्रीदेखि र मन्त्रीहरूको विदेश भ्रमणको कुनै उपलब्धि नभएकाले लावालस्कर लागेर यसरी हिँड्नु जनताको करको चरम दुरूपयोग भएको टिप्पणी गरे ।
‘प्रधानमन्त्रीको स्पेन भ्रमण फजुल खर्चबाहेक केही उपलब्धि हुँदैन । गत वर्ष पनि बाढी÷पहिरो आउने बेलामा उहाँ विदेशमा सयर गर्दै हुनुहुन्थ्यो, अहिले फेरि विदेश सयरमा निस्किँदै हुनुहुन्छ । प्रधानमन्त्री र मन्त्रीहरूको विदेश भ्रमणको कुनै उपलब्धि हुँदैन, लावालस्कर लागेर यसरी हिँड्नु जनताको करको चरम दुरूपयोग हो,’ आजपा अध्यक्ष साहले भने, ‘युद्धरत देशमा फसेका आफ्ना नागरिक उद्धार गर्न भारत गुहार्नुपरेको छ, अनि हाम्रा नेतालाई किन विदेश जान दिने ?’
बजेटको चरम दुरूपयोग गरिएको र जनताको करलाई नेताको भुँडी भराउने काम गरिएको समेत उनले बताए । सरकारपिच्छेको मनोमानी कर आतंकले नेपाली जनता, उद्योगी, व्यापारीको व्यापार व्यवसाय धराशायी बन्दै गइरहेको आजपा अध्यक्ष साहले बताए ।
