काठमाडौं- माध्यमिक शिक्षा परीक्षा (एसईई) २०८१ को नतिजा प्रकाशन प्रक्रिया अन्तिम चरणमा पुगेको राष्ट्रिय परीक्षा बोर्डले जनाएको छ। राष्ट्रिय परीक्षा बोर्डका परीक्षा नियन्त्रक डा. गणेश भट्टराईका अनुसार नतिजा तयारीको काम अन्तिम चरणमा पुगेको बताएका हुन्।
नतिजा प्रकाशनसम्बन्धी निर्णय लिन आजै बोर्ड बैठक बस्ने तयारी भइरहेको जानकारी उनले दिए।“नतिजा अन्तिम तयारीमा छौं,” डा. भट्टराईले भने, “तर प्रकाशित गर्ने निर्णय भने बाँकी छ। त्यसका लागि बोर्डको बैठक बस्नुपर्छ। सम्भवतः आजै बैठक बस्नेछ।”
बोर्डका सदस्य सचिव जंगबहादुर अर्यालले पनि नतिजा सम्बन्धी छलफल गर्न आज बोर्ड बैठक बस्ने भए पनि बैठकको समय निर्धारण नभइसकेको बताए।
यस वर्षको एसईई परीक्षा गत चैत ७ गतेदेखि सञ्चालन भएको थियो। परीक्षा बोर्डका अनुसार नियमिततर्फ ४ लाख ३१ हजार ४६६ र ग्रेड वृद्धितर्फ ६७ हजार ७१५ गरी कुल ४ लाख ९९ हजार १८३ विद्यार्थी सहभागी भएका थिए।
