कोरोना संक्रमण देखिएका एक बिरामीको विराटनगरमा मंगलबार मृत्यु भयो । पछिल्लो समय पूर्वका जिल्लाहरुमा आठ जनामा कोरोना संक्रमण देखिएको छ । पश्चिममा पनि कोरोना संक्रमणका बिरामी देखिन थालेका छन् । गृह मन्त्रालयअन्तर्गतको नेपाल कोभिड–१९ ड्यासबोर्डका अनुसार अहिले कोरोना लागेका सातजना बिरामी उपचाररत छन् । क्वारेन्टिन, आइसोलेसनमा बसेकाहरुको संख्या शून्य छ । अहिले भाइरल फ्लु भन्दै कतिपय बिरामी कोरोनाको जाँच गर्दैनन् । यसको मुख्य कारण त्रास वा समाजमा हुने छिछि दुरदुर नै हो । अहिले पनि कार्यालय वा समाजमा कोरोना संक्रमणलाई राम्रा मानिँदैन । तर मौसम परिवर्तनसँगै कोरोना भाइरसका लक्षण भएका बिरामी भित्रभित्रै फैलिएका छन् । मौसम परिवर्तनसँगै मानिसमा रुघाखोकी, ज्वरो, फ्लुजस्ता संक्रमण देखिन थालेको हो ।
इपिडिमियोलोजी तथा सरुवा रोग नियन्त्रण महाशाखाका अनुसार भारतको सीमा क्षेत्रमा कोरोना भाइरसको संक्रमण देखिन थालेको छ । कञ्चनपुरमा पनि भारतबाट आउनेमा संक्रमण देखिएको थियो । असारको पहिलो हप्ता ५४ संक्रमण देखिएको थियो । भारतमा कोरोना संक्रमणको संख्या पछिल्लो हप्ता बढेको तथ्यांक छ । त्यहाँ बुधबारसम्ममा छ हजारबाट कोरोना संक्रमितको संख्या चार हजारमा झरेको भारत सरकारको कोभिड–१९ ड्यासबोर्डमा उल्लेख छ । यो अवधिमा त्यहाँ तीन जनाको मृत्यु भइसकेको छ ।
भारतसँग नेपालको खुला सीमाना छ । पहिले क्वारेन्टिनदेखि परीक्षण प्रणाली भए पनि अहिले त्यो छैन । त्यसैले पनि कोरोना फैलन नदिन सरकारले परीक्षण गर्नुपर्छ । कोरोना संक्रमित देखिएको ठाउँमा सरकारले एन्टिजेन पाइसकेको जनाएको छ । तर शुक्रराज ट्रपिकल तथा सरुवा रोग अस्पतालमा पनि यसखाले बिरामी बढ्न थालेका छन् । कोरोना भाइरसविरुद्धको खोप नलगाएका व्यक्ति, दीर्घरोगी र ज्येष्ठ नागरिकमा यो रोग लाग्दा निकै जोखिम हुने गर्छ । यस्तो अवस्था भएकोले सरकारले पूर्वतयारीमा ध्यान दिनुपर्ने देखिन्छ ।
सरकारी अधिकारीहरुले भारतमा संक्रमण देखिएसँगै नेपालमा पनि यस्तो संक्रमण देखिन थालेको बताएका छन् । स्वास्थ्य मन्त्रालयले अहिले यस विषयमा विशेष चनाखो राख्नुपर्छ । देशभरका अस्पतालमा एन्टिजेन पु¥याउने, यसको मात्र बढाउने र परीक्षणमा पनि सरकारले ध्यान दिनुपर्छ । यसैगरी यसबाट निम्तिन सक्ने त्रास कम गराउन चेतनामूलक कार्यक्रम, मानसिक परामर्श कार्यक्रम पनि स्वास्थ्य मन्त्रालयले अघि बढाउनुपर्छ । यसैगरी स्थानीय तहलाई यस कार्यमा बढी जिम्मेवार बनाउनुपर्छ । नागरिकका तर्फबाट पनि कोरोना संक्रमण फैलन नदिने विशेष सावधानी अपनाउन जरुरी छ ।
