- प्रतिपक्षी सांसद राजेन्द्र पाण्डेले सरकारको समर्थन गर्दै दुई वर्षको ‘कुलिङ पिरियड’ हटाउन उच्च पदस्थका कर्मचारीले दबाब दिएकोमा खुट्टा नकमाउन आग्रह गरे
- बजेट जनमुखी नभएको र दैलेखलाई सम्बोधन नभएको भन्दै एकीकृत समाजवादीका सांसद अम्मरबहादुर थापाले किताबै च्याते
- चार घण्टा चलेको प्रतिनिधि सभाको बैठकमा राष्ट्रिय स्वतन्त्र पार्टीका सांसदहरु बैठकभर पलेटी कसेर अनसन बसे
- प्रतिनिधि सभामा थरीथरी विपक्षी
काठमाडौं– बिहीबार प्रतिनिधि सभामा बजेटमाथिको बहस जारी रहँदा सत्तापक्षदेखि प्रतिपक्षको प्रस्तुति रोचक देखियो । बिहान ११ बजेका लागि डाकेको बैठक दलहरुसँगको छलफलपछि करिब दिउँसो १ बजेबाटमात्र शुरु भयो । शुरुमै राष्ट्रिय स्वतन्त्र पार्टीले उठेर विरोध जनाएपछि सभामुख देवराज घिमिरेले सांसद हरि ढकाललाई बोल्न समय दिए ।
गृहमन्त्री रमेश लेखकले भुँईमान्छेको प्रश्नमा कटाक्ष गरेको भन्दै रास्वपा सांसद ढकालले यसको जवाफ माग गरे । जवाफ नआएसम्म आन्दोलन जारी रहने उनको भनाई थियो । ‘हाम्रो आन्दोलन जारी छ । हाम्रो दलले उठाएको माग पुरा नभएसम्म हाम्रो आन्दोलन जारी छ,’ ढकालले भने । उनले गृहमन्त्री लेखकको राजीनामा माग्दै गर्दा सभामुखे घिमिरेले माइक काटेर प्रमुख प्रतिपक्षी दलका प्रमुख सचेतक हितराज पाण्डेलाई समय दिए । पाण्डेले बोल्नसाथ रास्वपा भने रोस्टम अगाडि पुगेर विरोधमा उत्रियो ।
त्यसपछि राष्ट्रिय प्रजातन्त्र पार्टीका सचेतक ज्ञानेन्द्रबहादुर शाहीले बोल्ने समय पाए । उनले यसअघि २०६४ सालदेखिका १४ जना गृहमन्त्री भएका सबैको भिजिट भिसा प्रकरणमा छानबिन हुनुपर्ने माग राखे । शाहीले भिजिट भिसा प्रकरणमा छानबिन समिति नबनेसम्म र विरोध जारी रहेसम्म सदन चलाए बहिस्कार गरेर अघि बढ्ने चेतावनी दिए । लगत्तै सभामुख घिमिरेले शुन्य समय सकिएको घोषणा गरे पनि विपक्षीहरु उभिएपछि एकीकृत समाजवादीका सांसद राजेन्द्र पाण्डेले बोल्ने समय पाए ।
प्रतिपक्षी सांसद पाण्डेले दुई वर्षको ‘कुलिङ पिरियड’ हटाउन उच्च पदस्थका कर्मचारीले दबाब दिएकोमा सरकारलाई खुट्टा नकमाउन आग्रह गरे । यसको विरोधमा सचिवहरु देखिएको र उनीहरुले यसको विरोध गरे सहसचिवले देश सम्हाल्ने उनको भनाई थियो । ‘कुलिङ पिरियड खारेज गराउनको लागि संयुक्त राजीनामा दिन्छौँ भनेर धम्की दिँदै विधेयक ल्याउन रोकावट भएको सुन्नमा आएको छ । सरकारले खुट्टा नकमाओस्, तुरुन्त ल्याओस् । २५ जना सचिवले राजीनामा दिन्छन् भने नयाँ सहसचिवले काम पाउँछन् । नयाँ व्यक्तिले जिम्मेवारी पाउँछन्,’ पाण्डेले भने, ‘धम्कीका भरमा सरकार डराउन हुन्न ।’
बजेट जनमुखी नभएको र दैलेखलाई सम्बोधन नभएको भन्दै एकीकृत समाजवादीका सांसद अम्मरबहादुर थापाले किताबै च्याते । थापाले भने, ‘जनताबाट उठेको राजस्वबाट बनेको बजेट जनताप्रति उत्तरदायी छैन । यो नेता र मन्त्रीमुखी भयो । म यो किताब सदनभित्रै च्यात्ने अनुमति लिएर च्यात्छु ।’ थापाले बजेट किताब च्यात्दै गर्दा उनले पाएको एक मिनेट समय सकिसकेको थियो ।यता स्वतन्त्र सांसद अमरेशकुमार सिंहको वक्ताव्यमा सत्तारुढ दल नेपाली कांग्रेसकी सचेतक सुशीला थिङले नियमापत्ति जनाइन् । कानून मन्त्री अजयकुमार चौरसियालेले न्याय प्रभावित पार्न न्यायाधीशलाई फोन गर्ने गरेको आरोप लगाएपछि थिङले आपत्ति जनाएको हो ।
‘सदस्यले बोलेको कुरा सभाको तत्काल विचाराधीन रहेको विषयसँग सम्बन्धित हुनुपर्नेछ भनिएको छ । तर कानून मन्त्रीको कानून मन्त्रीको कल डिटेलको कुरा समद्दता भएन । त्यो रेकर्डबाट हटाइयोस्,’ उनले भनिन् । यद्यपि उनको मागमा सभामुखले कुनै सुनुवाई गरेनन् । सांसद सिंहले कानूनमन्त्री न्यायलाई प्रभावित पार्न न्यायाधीशलाई फोन गरेको आरोप प्रमाणित नभए आफू सांसद पद त्याग्न चुनौती दिँदै कल डिटेल सार्वजनिक गर्न माग गरेका थिए ।
उनले गृहमन्त्रीले विमानस्थलबाट मानव बेचबिखन ब्युरो किन हटाइयो ? जवाफ दिन नसकेको बताए । उनले विमानस्थलभित्रको अनुसन्धान गरेको, अनावश्यक कर्मचारी विमानस्थलमा थपेको, सचिवालयका कर्मचारीको सचिवालयको कर्मचारीको सरुवा, डीआईजीका सरुवालगायतको विषयमा उत्तर दिन नसकेको बताए ।यता सत्तापक्षसँग सहमति गरी गृहमन्त्रीको राजीनामाबाट पछि हटेको दल माओवादी केन्द्रले भने अवरोधका बीच सदन चलाउनु दुःखद भएको बताए ।
बजेटमाथि छलफल गर्न रोस्ट्रममै पुगेका माओवादी सांसद जनार्दन शर्माले भने, ‘सदनमा गम्भीर प्रश्न उठेको छ, अवरोध र विरोधको बीचमा त्यसको वेवास्ता गर्दै सदन चलाउनु दुखद हो । समस्याको समाधान गर्न किन सक्दैनौँ? नेतृत्वको काम भनेकै समस्याको समाधान गर्नु हो । शर्मा खर्च कटौतिको प्रस्तावमा झन्डै आधा घण्टा बोलेका थिए ।रास्वपा विरोधलाई निरन्तरता दिँदै बैठकभर चार घण्टा पलेटी कसेर विरोधमा बस्दा प्रतिनिधि सभाको सिट खाली देखिएको थियो । राष्ट्रिय प्रजातन्त्र पार्टीले भने बजेटमाथिको छलफल चलाएसँग बहिस्कार गरी हिँडेका थिए ।
