काठमाडौं महानगरपछि अहिले धरान उपमहानगर चर्चामा छ । मंगलबार दिनभरजसो धरानका नगरप्रमुख हर्क साम्पाङ र उपप्रमुख आइन्द्रविक्रम बेघाबीचको विवाद चर्चामा छायो । कारण दुई पक्षबीच आरोपप्रत्यारोप । धरानका प्रमुख साम्पाङ श्रमदान अभियानका कारण चर्चामा छाइरहन्छन् । यद्यपि, उनले वडा नम्बर १६ मा जाली राख्ने काम श्रमदानबाट गरिए पनि डोर हाजिरा फाराम भराएर भुक्तानी मागिएको भन्दै उपप्रमुख बेघाले रोके । प्रक्रिया नमिलाई आएको बिलको भुक्तानी नगर्न बेघाका समर्थकले नाराबाजीसमेत गरे । त्यसपछि धरान तनावग्रस्त बन्यो ।
सामाजिक सञ्जालबाट आफूलाई पारदर्शी देखाउन सामाजिक सञ्जालमा ‘लाइभ’ आउने प्रमुख साम्पाङले विवादकै क्रममा कार्यालयमा पटक–पटक भन्दै थिए– बालेनलाई पेल्याजस्तो लाग्छ होला ! केही समयअघि काठमाडौं महानगरका प्रमुख बालेन्द्र (बालेन) साहविरुद्ध उपप्रमुख सुनिता डंगोलसहित वडाध्यक्षहरु एक भएर प्रमुख प्रशासकीय अधिकृत सरोज गुरागाईंलाई ताला फोडेर कार्यकक्षमा प्रवेश गराएका थिए । नगरप्रमुख साहको आदेशमा रोक्न खोज्ने प्रहरी प्रमुख राजु पाण्डे पनि गुरागाईं र डंगोलको बलबुतामा निलम्बित भए । यसरी बालेनलाई एक्लाएको उदाहरण पेस गर्दै साम्पाङले यस्तो बताएका हुन् ।
यद्यपि, काठमाडौंको प्रसंग कर्मचारीले तलब नपाएको थियो भने धरानको श्रमदानमा गएकाहरुले ज्याला । झण्डै उस्तै प्रकृतिका जनप्रतिनिधिको यसखालको कामलाई धेरैले सामाजिक सञ्जालमा राम्रो भनेका छन् भने कतिले लफडा गरेकोमा आलोचना पनि गरेका छन् । भोलिका दिनमा विवादित पक्षबीच के कसरी मिलेमतो र सहमति हुने हो त्यो हेर्न बाँकी नै छ ।
तर संघीय सरकारमाझैं स्थानीय सरकारमा पनि यसरी पारदर्शी तरिकाले विरोध हुनु जनताका लागि फाइदाकै विषय हो । साँठगाँठ गरी कागजी परियोजना बनाएर सरकारी रकम हजम गर्ने नेतादेखि सरकारी कर्मचारीको पुरानै बानी हो । देशभरका ७५३ स्थानीय तहमा फाट्टफुट्टबाहेक यस्तो बेमेल देखिन्न । यसको मतलब ती स्थानीय तहमा सबैमा सतप्रतिशत भ्रष्टाचार नै हुन्छ र अनियमितता नै हुन्छ भन्ने पनि हैन ।
लोकतान्त्रिक व्यवस्थामा बलियो प्रतिपक्षी हुनु भनेको प्रमुखलाई मनलागी गर्न नदिनु पनि हो । यसैले काठमाडौं होस् या धरान, गौशाला नगरपालिका होस् या धनगढी, हरेक ठाउँमा प्रतिपक्षी आवाज बुलन्द हुनैपर्छ । ताकि कुनै ठाउँमा हुन लागेको अनियमितता रोकियोस् । कुनै कामले नामी भएका जनप्रतिनिधिलाई चुक्न नदिन पनि यसखाले खबरदारी आवश्यक छ । यद्यपि हात हालाहाल वा मुख छाडाछाडको निकृष्ट तहमा भने ओर्लन हुन्न ।
