यो सदनमा केही माननीय सदस्यहरुले केही स्कार्फ लगाएर आउनुभएको छ । भोलि कोही हाफ पाइन्ट लाएर आउन थाले यसलाई संसद्को मर्यादाभित्र राख्ने कि नराख्ने ?
श्याम घिमिरे
प्रमुख सचेतक, नेपाली कांग्रेस
- मंगलबार नीलो सल लगाएर सदनमा उपस्थित रास्वपा सांसदहरुले यो मानव तस्करविरुद्धको सांकेतिक विरोध भएको बताए
- यसअघि रास्वपाका सांसदहरु नेपाली क्रिकेट टोलीको समर्थनमा प्रतिनिधिसभामै क्रिकेट जर्सी लगाएर उपस्थित भएका थिए
- ‘ड्रेस कोड’बारे सांसद सुमना श्रेष्ठ पनि पटक–पटक चर्चामा छाएकी छन्
काठमाडौं– सधैंझैं राष्ट्रिय स्वतन्त्र पार्टी (रास्वपा)ले मंगलबारको सदनमा पनि गृहमन्त्री रमेश लेखकको राजीनामा माग्दै विरोध जनायो । सभामुख देवराज घिमिरेले सदन सुरु हुनासाथ रास्वपाकी सांसद चन्दा कार्कीलाई आफ्नो भनाइ राख्न समय दिए । कार्कीले बोल्दै गर्दा उनको गलामा नीलो स्कार्फ देखियो । ‘भिजिट भिसा’मा हुँदै आएको मानव तस्करीको जालो तोड्न सुझाउँदै कार्की बोल्दै गर्दा रास्वपाका सबै सांसदको गलामा उस्तै नीलो स्कार्फ देखियो ।
त्यसपछि सत्तारुढ दल नेपाली कांग्रेसका प्रमुख सचेतक श्याम घिमिरेले यसबारे प्रश्न उठाए । प्रतिनिधिसभा नियमावलीमा पोसाकसम्बन्धी व्यवस्था भएको उल्लेख गर्दै घिमिरेले सभामुख घिमिरेले सचेत बनाउनुपर्ने धारणा राखे । ‘मर्यादित पोसाकमा आउनुपर्ने व्यवस्था गरिएको छ । यो सदनमा केही माननीय सदस्यहरुले केही स्कार्फ लगाएर आउनुभएको छ । यो मर्यादित पोसाकमा भोलि कोही हाफ पाइन्ट लाएर आउन थाले यसलाई संसद्को मर्यादाभित्र राख्ने कि नराख्ने ?,’ घिमिरेले भने ।
सचेत नमान्नेलाई बैठक कक्षाबाटै निष्कासन गर्न सक्ने व्यवस्थासमेत भएको घिमिरेको भनाइ थियो । उनले प्रश्न गर्दा सत्तारुढ दलका सांसदहरुले ताली ठोके, रास्वपाका सांसदहरुले भने होहल्ला गरे । त्यसपछि आधा घण्टाका लागि स्थगित गरेको बैठक सूचना टाँसेर बिहीबार बस्ने जानकारी दिइएको छ ।
मानव तस्करीविरुद्धको आन्दोलनका लागि नीलो रिबन लगाएका हौं । यो शान्तिपूर्ण आन्दोलन हो । नीलो क्रान्तिका रुपमा बुझिदिनुपर्यो । नीलो सल लगाउँदा हामी कसरी असभ्य भयौं ?
डा. तोसिमा कार्की
प्रतिनिधिसभा सदस्य, रास्वपा
कतिपयले रास्वपाको यो शैलीको प्रशंसा गरेका छन् । पछिल्लोपटक नीलो बस प्रयोग गरेको रास्वपाले प्रयोग गरेको यो रिबन विश्व प्रोस्टेट क्यान्सरविरुद्धको सांकेतिक विरोध भएको बताइएको छ । तर, रास्वपाले आधिकारिकरुपमा यसरी विरोध गरेको स्वीकारेको छैन । ‘मानव तस्करीविरुद्धको आन्दोलनका लागि नीलो रिबन लगाएका हौं । यो यसैका विरुद्ध लगाएका हौं,’ सदन स्थगित भएपछि रास्वपा सांसद डा. तोसिमा कार्कीले भनिन् । कार्कीले यसलाई नीलो क्रान्तिका रुपमा बुझिदिनसमेत आग्रह गरिन् । ‘यो शान्तिपूर्ण आन्दोलन हो । नीलो क्रान्तिका रुपमा बुझिदिनुपर्यो,’ कार्कीले भनिन्, ‘नीलो सल लगाउँदा हामी कसरी असभ्य भयौं
’
दुई वर्षअघि रास्वपाकी सांसद सुमना श्रेष्ठ संसद् बैठकमा सहभागी हुँदा जिन्स पाइन्टमाथि टिसर्ट र त्यसमाथि कोट लगाएको तस्बिर भाइरल भएको थियो । त्यसपछि संसदीय समितिमा उनले मिनीस्कर्ट लगाएको भन्दै आलोचना भएको थियो । त्यसपछि सदनमा श्रेष्ठले यसलाई युवा पुस्तामाथिको रणनीतिक हमला भएको बताएकी थिइन् । ‘चाकडीवाजबाट टाढिएर, पहिरनको मर्यादाबाट निस्किएर, कर्तव्य र जिम्मेवारीमा मर्यादा खोजेर, राजनीतिक प्रवचनमासमेत जवाफदेहीताको प्रस्ट प्रश्न सोधेर अगाडि बढेका नयाँ पुस्तामाथि यो रणनीतिक हमला हो,’ २०८० जेठ १ गतेको सदनमा श्रेष्ठले भनेकी थिइन्, ‘यसको रास्वपा विरोध गर्छ । सचेत रहनुहोस् । तपाईंले हामीले रोक्न सक्नुहुन्न । समय निकै भएकैले होला टिसर्ट र जिन्समा अड्किनुभएको । यहाँहरुको प्राथमिकता के हो ? नैतिक प्रहरी बन्ने कि संसदीय समितिहरुको बैठक तय गर्ने ?’
यसपछि शिक्षामन्त्री भएको बेला पनि सुमना चर्चामा आइन् । सरकारको नीति तथा कार्यक्रम प्रस्तुत भएको दिन उनी ‘कलेज गर्ल’को शैलीमा झोला बोकेर आइपुगेकी थिइन् । संसद् सचिवालयले ड्रेस कोड तोक्दासमेत उनी भने कलेज गर्ल शैलीमा आइपुगेकी थिइन् ।
यतिमात्र हैन रास्वपाका सांसदहरु अघिल्लो वर्षको जेठ २२ गते नेपाली क्रिकेट टिमको जर्सी लगाएरै संसद्भित्र प्रवेश गरेका थिए । उनीहरुले संसद्भित्रै तस्बिर पनि खिचेर आफूहरु क्रिकेटको समर्थक भएको भन्दै प्रचार गरेका थिए । त्यतिबेला पनि कांग्रेसले रास्वपाको सांसदहरुको पोसाकमाथि प्रश्न गरेका थिए ।
नेपाली कांग्रेसकी सांसद ईश्वरीदेवी न्यौपानेले गत वर्षको जेठ २२ गते आकस्मिक समयमा प्रश्न गरेकी थिइन् । ‘यो संसद्मा मर्यादित ड्रेस लगाएर आउने हामी कति जना छौं ? हामी साडीमा आउँछौं कि ? कोट, पाइन्ट, टाई लगाएर आउँछौं कि ? आफ्नो मौलिक पोसाक लगाएर आउँछौं कि ? आज यो संसद्मा कोही फ्रक लगाएर आउनुभएको छ,’ न्यौपानेले प्रश्न गरेकी थिइन्, ‘कोही टिसर्ट र पाइन्ट लगाएर आउनुभएको छ । कोही जम्पर लगाएर आउनुभएको छ । हामीलाई चाहिँ सबै छुट ?’
प्रतिनिधिसभाले संसद् बैठकमा सहभागी हुँदा सांसदहरुले लगाउने पोसाक २०८० वैशाख ३१ गते तय गरेको थियो । उक्त दिन बसेको कार्यव्यवस्था परामर्श समितिको बैठकको निर्णयअनुसार सभामुख घिमिरेले सांसदहरुको पोसाक तोकेका थिए । प्रतिनिधिसभा नियमावली २०७९ को नियम २४२ मा पोसाक र प्रतीक चिह्नसम्बन्धी व्यवस्था रहेको छ । कस्तो पोसाक मर्यादित भन्ने विषयमा भने नियमावली प्रस्ट देखिँदैन ।
