इजरायल र इरानबीच पछिल्लो समय विकसित घटनाक्रमले मध्यपूर्वी क्षेत्रमा तनाव बढाएको छ । दुई देश एकअर्कामाथि खुलेर आक्रमणमा सक्रिय हुँदा सो क्षेत्रमा कार्यरत नेपालीहरुको सुरक्षा चिन्ताको विषय बनेको छ । इजरायल नेपालीहरुको आकर्षक रोजगार गन्तव्य हो । त्यहाँ सरकारले नै रोजगारीका लागि कामदार पठाउँदै आएको छ । इरानमा भने त्यति नेपाली छैनन् । यी दुई देशबाहेक मध्यपूर्वी देशहरु नेपालीहरुको प्रमुख रोजगार गन्तव्यको रुपमा रहेका छन् । त्यस क्षेत्रमा लाखौं नेपाली कार्यरत रहेका छन् ।
परराष्ट्र मन्त्रालयले आइतबार विज्ञप्ति जारी गरी त्यस क्षेत्रमा रहेका नेपाली नागरिकको सुरक्षाका विषयमा चासो व्यक्त गर्दै उच्च प्राथमिकतामा राखेर काम गर्न सम्बन्धित मुलुकका नेपाली राजदूतहरुलाई निर्देशन दिएको छ । परराष्ट्रमन्त्री डा. आरजु राणा देउवाले यस्तो निर्देशन जारी गरेकी हुन् । इजरायलको तेल अभिभ र कतारको दोहास्थित नेपाली राजदूतहरुलाई टेलिफोन सम्पर्क गरी नेपालीको सुरक्षालाई उच्च प्राथमिकतामा राखेर काम गर्न, निरन्तर सम्पर्कमा रहन र सम्बन्धित मुलुकले जारी गरेका सुरक्षा सतर्कतासम्बन्धी अद्यावधिक सूचना नियमित रुपमा प्रवाह गरी नेपालीलाई निरन्तर सुसूचित गर्न निर्देशन दिएको मन्त्रालयद्वारा जारी विज्ञप्तिमा उल्लेख छ ।
मन्त्रालयका अनुसार हाल इजरायलमा करिब पाँच हजार ५०० र इरानमा करिब १२ जना नेपाली रहेका छन् । उनीहरु सबैजना सुरक्षित रहेको जानकारी प्राप्त भएको मन्त्रालयले उल्लेख गरेको छ । दुई पक्षबीच आक्रमण तीव्र बन्दै जाँदा त्यहाँ जोखिम बढ्दै गएको प्रस्ट छ । त्यसैले सरकारले विज्ञप्ति र निर्देशनमा मात्रै सीमित नरही तत्काल जोखिम क्षेत्रबाट नेपालीहरुको उद्धार गर्नेतर्फ पहल गर्नुपर्छ ।
नेपालीहरुले इजरायलमा २०८० असोज २१ मा भोग्नुपरेको दुःखद् घटना ताजै छ । प्यालेस्टाइनी कट्टरपन्थी समूह हमासले इजरायलमा गरेको आक्रमणमा परी १० जना नेपालीको मृत्यु भएको थियो । ‘लर्न एण्ड अर्न’ कार्यक्रमअन्तर्गत इजरायल पुगेका विद्यार्थीहरु हमासको निसानामा परेको थियो । फेरि अर्को त्यस्तै दुःखद् खबर सुन्न नपरोस् । त्यसका लागि सरकारले तत्काल प्रभावकारी कदम चाल्नुपर्छ । हमास–इजरायल द्वन्द्वका कारण केही समय रोकिएको इजरायल रोजगारी एक वर्षअघि खुला गरिएको थियो । जसअनुसार नेपाली कामदार अझै पनि त्यहाँ गइरहेका छन् ।
आर्थिक हिसाबले आकर्षक भए पनि इजरायल प्रायः द्वन्द्वमै रहने हुँदा त्यस्तो मुलुकमा नेपाली कामदार पठाउनेबारे पुनर्विचार गर्न आवश्यक छ ।अहिले इजरायलमात्रै होइन, इरानसँग जोडिएका खाडी मुलुकहरुमा कार्यरत नेपालीहरुको सुरक्षामासमेत सतर्कता अपनाउनुपर्ने टड्कारो आवश्यकता देखिएको छ । बाध्यताले रोजगारीका लागि ती देशमा पुगेका नेपाली नागरिकको जीवनरक्षामा सरकार गम्भीर बन्नुपर्छ ।
