काठमाडौं- संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले प्रस्तावित संस्कृति नीति चाँडै मन्त्रीपरिषद्बाट पारित भई कार्यान्वयनमा ल्याइने बताएका छन्। काठमाडौंमा आयोजित ‘नेपाल–जापान संस्कृति आदानप्रदान कार्यक्रम’मा बोल्दै मन्त्री पाण्डेले सरकारले संस्कृति संरक्षण र प्रवद्र्धनका लागि स्पष्ट नीति तयार पारेको र सो नीति चाँडै स्वीकृत हुने विश्वास व्यक्त गरे।
कार्यक्रममा मन्त्री पाण्डेले भने, “प्रत्येक संस्कृतिले आफ्नै सभ्यता र पहिचान बोकेको हुन्छ। नेपालको मौलिक संस्कृतिलाई अब अन्तर्राष्ट्रिय स्तरमा प्रस्तुत गर्न आवश्यक छ।”उनले नेपाल–जापानबीचको सांस्कृतिक सम्बन्धलाई अझ सशक्त बनाउने यस्ता कार्यक्रमहरूले द्विपक्षीय सम्बन्धमा थप गहिराइ ल्याउने उल्लेख गरे। साथै, संस्कृति प्रवद्र्धनमा निजी क्षेत्रको सक्रियता आवश्यक रहेकोमा पनि जोड दिए।
मन्त्री पाण्डेले भने, “संस्कृति कुनै पनि समाजको आत्मा हो, जसले राष्ट्रको अस्तित्व र पहिचान जोगाइराख्छ।” उनले जापानको अनुशासित, मर्यादित र सुसंस्कृत जीवनशैलीको प्रशंसा गर्दै नेपालले त्यहाँबाट प्रेरणा लिन सक्ने धारणा व्यक्त गरे।“हामी जापानबाट सम्मानजनक सुसंस्कृति ग्रहण गर्न चाहन्छौं,” मन्त्री पाण्डेले भने, “जापानी नागरिकहरूलाई नेपालको सांस्कृतिक विविधता नजिकबाट अनुभव गर्न हार्दिक निमन्त्रणा दिन्छौं।”
उनले सरकारले बनाएको संस्कृति नीति नीतिगत तहमा केन्द्रित हुने र त्यसको सफल कार्यान्वयनमा निजी क्षेत्रको भूमिका अपरिहार्य रहेको पनि स्पष्ट पारे। कार्यक्रममा जापानबाट आमन्त्रित कलाकारहरू, नेपाली सांस्कृतिक क्षेत्रका विज्ञ र कलाकारहरू, निजी क्षेत्रका प्रतिनिधिहरू तथा विविध विशिष्ट अतिथिहरूको सहभागिता रहेको थियो।
