काठमाडौं - देशको अर्थतन्त्रमा रेमिट्यान्सको योगदान झनै बलियो बन्दै गएको छ । नेपाल राष्ट्र बैंकले मंगलबार सार्वजनिक गरेको तथ्यांक अनुसार, २०८२ साल वैशाख महिनामा १ खर्ब ६५ अर्ब ३० करोड रुपैयाँ रेमिट्यान्स भित्रिएको छ । यो अहिलेसम्मकै एक महिनामा भित्रिएको उच्च रकम हो ।
यो अवधिमा कुल रेमिट्यान्स रकम १३ खर्ब ५६ अर्ब ६१ करोड रुपैयाँ पुगेको राष्ट्र बैंकको तथ्यांक छ । यसअघि २०८१ सालको फागुनमा एक महिनामा भित्रिएको रेमिट्यान्सको रेकर्ड १ खर्ब ५१ अर्ब २० करोड रुपैयाँ थियो । यो अघिल्लो आर्थिक वर्षको सोही अवधिको तुलनामा १३.३ प्रतिशतले बढी हो । अघिल्लो वर्ष सोही अवधिमा रेमिट्यान्स वृद्धि दर १६.९ प्रतिशत थियो ।
रेमिट्यान्सको प्रवाह अमेरिकी डलरमा पनि उल्लेखनीय रुपमा बढेको छ । समीक्षावधिमा डलरमा विप्रेषण आप्रवाह १०.५ प्रतिशतले वृद्धि भई ९ अर्ब ९६ करोड पुगेको छ । अघिल्लो वर्ष सोही अवधिमा यो वृद्धि दर १४.८ प्रतिशत थियो । यस अवधिमा खुद ट्रान्सफर १४ खर्ब ७९ अर्ब ८ करोड रुपैयाँ पुगेको छ, जुन अघिल्लो वर्षको १३ खर्ब १ अर्ब ७५ करोडको तुलनामा धेरै हो ।
यो विनिमय सञ्चितिले १७.४ महिनाको वस्तु र १४.६ महिनाको वस्तु तथा सेवा आयात धान्न पर्याप्त पुग्ने देखिन्छ ।
