विश्व अहिले प्रविधिमैत्री बन्दै गएको छ । जसका कारण उपभोक्ता सचेत बन्दै गएका छन् । कुनै पनि सामानको उपभोग्य मूल्य कति हो सहजै गुगल गरेर थाहा पाउँछन् । अझ व्यवसायी पनि यति पारदर्शी बन्दै गएका छन् कि सेवाग्राहीलाई आफूतिर तान्न सक्दो सस्तो सेवा प्रदान गर्न तयार हुँदै छन् ।
यसरी नै अहिले विभिन्न अनलाइन प्लेटफर्म भित्रिँदै छ नेपालमा । विकसित देशले धेरै अघि स्वीकार गरिसकेको यस्तो प्लेटफर्म नेपालीलाई भने अझै स्वीकार्न मुस्किल भइरहेको छ । निश्चित क्षेत्रमा आफ्नै मनोमानी, सिण्डिकेट कायम राखिरहेका परम्परागत व्यवसायी र व्यापारी नयाँ व्यापारी र व्यवसायीलाई डिम्कन दिँदैनन् । कुनै समय यस्तो थियो अरनिको यातायातको सवारीसाधन सञ्चालन हुने स्थानमा माइक्रो बस व्यवसायी पस्नै पाउँदैनथे । माइक्रो बस चलाउँदा भिरबाट गुल्टाइदिन्थे । नियमित चल्ने बसभन्दा छिटो गन्तव्यमा पु¥याउनेगरी सुरू गरिएको यस्ता माइक्रो अरनिको यातायातको शत्रु किन बन्यो ? कारण एउटै थियो, उसको बेथिति, कमजोरी र ठगी उपभोक्ताले थाहा पाउँदै गए ।
अहिले गण्डकी सरकारले सर्वसाधारण यात्रीलाई सजिलो हुनेगरी राइड सेयरिङसम्बन्धी नियमावली ल्यायो । पर्यटकीय क्षेत्र पोखराका लागि यो निकै सुखद् विषय थियो । लग्जरी, भरपर्दो र सहज सवारीले पर्यटकमा सही सन्देश पनि जान्छ । अझ राइड सेयरिङ एपले पर्यटकलाई सुलभ मूल्यमा सेवा पनि दिन्छ । यद्यपि, राइड सेयरिङ एप भएका सवारीबाहकले पनि बदमासी भने नगरेका हैनन् ।
उनीहरु ‘अफलाइन’मा बस्ने, बार्गेनिङ गरी चर्को भाडा असुल्न पनि पछि पर्दैनन् । सार्वजनिक यातायात नपुग्ने ठाउँमा राइड सेयरिङ एप प्रयोगकर्ताले यस्तो बदमासी गर्छन् । यस्तो अवस्थामा पर्यटक होस् या सर्वसाधारण सार्वजनिक यातायात नै प्रयोग गर्छन् । तर सार्वजनिक यातायात व्यवसायीले आफूले निर्धारण गरेको रुटबाटै यात्रु हिँड्नपर्ने, आफूले तोकेको शुल्क नै तिनुपर्ने शैलीमा अहिले जुन किसिमको विरोध गरिरहेको छ यो विल्कुलै समयानुकूल छैन ।
स्वतन्त्र बजारमा जोसुकैले व्यवसाय गर्न पाउँछ । रातो नम्बर प्लेटको सवारीसाधनलाई राइड सेयरिङको अधिकार दिनुअघि पनि रिजर्भमा यात्रु बोक्ने र व्यवसाय गर्दै आएको सबैलाई जगजाहेरै छ । बरु यसखाले अधिकार र अनुमतिले रातो प्लेट पनि राजस्वको दायरामा आउने छ र सार्वजनिक यातायात व्यवसायीसँग स्वच्छ प्रतिस्पर्धा हुने छ । त्यसैले यातायात व्यवसायीले प्रविधि र स्वच्छ प्रतिस्पर्धा स्वीकार्दै आन्दोलन फिर्ता लिनु जायज हुन्छ । सर्वसाधारणलाई दुःख दिएर यही माग राख्दै आन्दोलनमा उत्रनु उल्टो बुद्धि सिवाय अरू केही हुन्न ।
