गृहमन्त्री रमेश लेखक यतिबेला आफू कसरी निर्दोष छु भन्ने प्रमाण देखाउनमा तल्लीन् छन् । लेखकले आफूनिकटका सबैलाई आफ्नो पक्षमा बोल्नसमेत बाध्य बनाएका छन् । रोजगारीको सिलसिलामा विदेश हिँडेकाबाट हजारौं असुलेर आफ्नो खल्ती बलियो पार्ने थलो बनेको अध्यागमन विभागलाई गृहमन्त्रीको रजाइँ गर्ने ठाउँका रुपमा हेरिन्छ ।
यही ठाउँका हाकिम गत बुधबार अख्तियारको फन्दामा परे । गृहमन्त्री लेखककै तजविजमा अध्यागमनको हाकिम बनेका तीर्थराज भट्टराईले पक्राउ परेसँगै गृहमन्त्रीलाई पनि असुल गरेको रकम बुझाउनुपर्ने बयान दिइसकेका छन् । यस्तो अवस्थामा गृहमन्त्री लेखक भने मन्त्रालयमा हजारौं कर्मचारी हुने र एकजना पक्राउ पर्दैमा आफूले राजीनामा दिनुनपर्ने दाबी गर्दै आएका छन् ।
कानुनका जानकार लेखक यसअघि गृहमन्त्री रहेका राष्ट्रिय स्वतन्त्र पार्टीका सभापति रवि लामिछानेलाई नैतिकताको पाठ सिकाउँथे । तर अहिले आफू भने कुनै पनि हालतमा पद नछाड्ने मुडमा देखिन्छन् । लेखक अहिले कांग्रेस सभापति शेरबहादुर देउवाका दाहिने हुन् । हुन त कांग्रेस सरकारमा प्रकाशमान सिंहको नेतृत्वमा सहभागी छ । तर देउवाले उनैलाई सम्पूर्ण जिम्मेवारी छाडेका छन् सरकारको ।
यस्तो अवस्थामा लेखक बलिया देखिन्छन् । त्यसैले आफू निर्दोष छु भन्दै बच्न खोजिरहेका छन् । तर विमानस्थलमा केही कमाउन हिँडेका नागरिकलाई यसरी दैनिक लुटिँदा गृहमन्त्रीले के हेरिरहेका थिए ? विमानस्थलमा मात्र हैन हरेक दिन विभिन्न बाहनामा नागरिक लुटिएका छन् । यस्तो अवस्थामा गृहमन्त्री लेखक के हेरिरहेका थिए ? गत असोजमा काठमाडौं, काभ्रे क्षेत्रमा बाढी आउँदा पनि गृहमन्त्री लेखकको अक्षमता प्रस्ट भइसकेको थियो ।
तर शक्तिमा पुगेका व्यक्तिलाई धेरैले पूजा गर्न थाले । वाहवाही पाउँदा गृहमन्त्री उन्मुक्त हुँदै गए । अहिले आफैंले पठाएको हाकिमले लाखौं कुम्ल्याउने खुलेपछि रातारात गृहमा तान्न मन्त्री लेखक आफैं लागेका थिए । तर उनको त्यो चाला थाहा पाएर अख्तियारले भट्टराईलाई नियन्त्रणमा लिइहाल्यो । यस्ता खालका तिकडम रचेर बच्न खोज्ने अनि अरुलाई नैतिकताको पाठ कहिलेसम्म सिकाइरहने गृहमन्त्रीज्यू ? प्रश्न उठेपछि आफूलाई स्वतन्त्र रुपमा अनुसन्धान अघि बढाउन मार्गप्रशस्त गराउनु बुद्धिमान कि पदमा टाँसिइरहनु बुद्धिमान ? दुईतिहाइको दम्भ देखाएर पद नछाड्ने अड्डी कसे यो भोलिका लागि भारी पर्न सक्छ । त्यसैले गृहमन्त्रीज्यू, आफूले सिकाएको पाठ आफैंमा पनि लागू गर्ने कि ?
