थाइल्याण्डको टेर्डथाइ क्रिकेट मैदानमा इन्दु बर्माको कप्तानीमा रहेको नेपाली महिला क्रिकेट टोलीले सोमबार इतिहास रचेको छ । नेपालले संयुक्त अरब इमिरेट्स (युएई)लाई पाँच विकेटले हराउँदै आइसिसी महिला टी–२० विश्वकपको ग्लोबल छनोटका लागि ठाउँ सुरक्षित गर्दै इतिहास रचेको हो ।
एसिया छनोटअन्तर्गत सुपर–३ को शीर्ष दुईमा स्थान बनाउँदै नेपालले उक्त सफलता प्राप्त गरेको हो । नेपाल यसरी ग्लोबल छनोटमा पुगेको पहिलोपटक हो । अब नेपालले यसै वर्ष महिला टी–२० विश्वकपको ग्लोबल छनोट प्रतियोगिता खेल्ने छ । ग्लोबल छनोटमा नेपालसहित १० टोली सहभागी हुने छन् । उक्त प्रतियोगितामा शीर्ष चार स्थानबनाउने टोलीले सन् २०२६ मा इंग्ल्याण्डमा हुने आइसिसी महिला टी–२० विश्वकप क्रिकेट प्रतियोगिता खेल्ने छन् ।
अब नेपालले सुपर–३ को अन्तिम खेल मंगलबार थाइल्याण्डसँग खेल्ने छ । उक्त खेल जिते नेपाल एसिया छनोटको विजेता बन्ने छ ।
नेपाली महिला क्रिकेटले व्यावसायिक खेल सुरु गरेको धेरै भएको छैन । सन् २००७ बाट अहिलेसम्म पुरुष टोलीले वाहवाही कमाइसकेको छ । यसअघि महिला यु–१९ टोलीले विश्वकप खेलिसकेको छ । तर महिला सिनियर टोली भने एसिया छनोटमै सीमित थियो । सन् २०१६ देखि विश्वकप छनोटमा भिड्न थालेको नेपाल उक्त वर्ष थाइल्याण्डसँग पराजित भएसँगै ग्लोबल छनोटमा पर्न सकेन ।
सन् २०१७ को एसिया छनोटमा तेस्रो हुँदा विश्वकप यात्रामा ‘ब्रेक’ लागेको थियो । सन् २०१९ मा थाइल्याण्ड तथा सन् २०२१ मा हङकङ र युएईसँग पराजित हुँदा ग्लोबल छनोटमा पर्न सकेन । सन् २०२३ को एसिया छनोटअन्तर्गत सेमिफाइनलमा थाइल्याण्डसँगै पराजित हुँदा ग्लोबल छनोटको यात्रा तय गर्न सकेको थिएन । यसपटक भने नेपाली महिला क्रिकेट टोलीले अथक मिहेनत गरेको देखिन्छ ।
नेपालमा खेल क्षेत्रमा लागेर के हुन्छ ? भन्ने एक किसिमको भाष्य निर्माण भइरहेको छ । देशको आर्थिक अवस्था निरन्तर ओरालो लागिरहँदा खेल क्षेत्र पनि यसबाट अछुतो छैन । खेलाडीहरु विदेश पलायन हुने क्रम उस्तै छ । सरकारले रोजगारीको बन्दोबस्ती गर्न नसक्दा र खेल क्षेत्रलाई चलयमान बनाउन नसक्दा यस्ता निराशा सिर्जना भएका हुन् । यस्तो अवस्थामा पनि महिला क्रिकेट टोलीले उज्यालो यात्रा तय गरेको छ । यो लामो समयदेखिको प्रतीक्षा थियो । विश्वकप खेल्ने नेपालको सपना थियो । पक्कै पनि मिहेनत गरे सफल भइन्छ, यो यसपटक देखिएको छ । नेपाली महिला क्रिकेट टोलीलाई हार्दिक बधाइ तथा आगामी यात्राका लागि शुभकामना ।
-1745656903.jpeg)