वैदेशिक रोजगारीमा जाने नेपालीहरुको प्रमुख रोजगार गन्तव्य खाडीका राष्ट्रहरु हुन् । जसमध्ये साउदी अरेबिया, संयुक्त अरब इमिरेट्स (युएई), कतार प्रमुख हुन् । यी मुलुकमा लाखौं संख्यामा नेपालीहरु कार्यरत छन् । खाडी मुलुकमा जाने नेपालीहरु विभिन्न समस्यामा पर्दै आएका छन् । त्यहाँको अत्यधिक गर्मी मौसम त्यतिकै पनि प्रतिकूल छ, नेपालीहरुका लागि । सोही कारण विभिन्न स्वास्थ्य समस्या भोग्न बाध्य छन् । अर्कोतर्फ कहिले तोकिएको सेवा सुविधा नपाउने, समयमा तलब नपाउने, कम्पनी परिवर्तन गर्न नपाउने, कम्पनी टाट पल्टिनेलगायतका समस्या नेपालीहरुले भोग्दै आइरहेका छन् । यस्तो समस्यामा परेका घटना नियमितजसो आइरहेका हुन्छन् । पछिल्लो समय साउदी अरेबियामा एक कम्पनी टाट पल्टिने अवस्थामा पुगेपछि त्यहाँ कार्यरत सयौं नेपालीहरु कामविहीन बनेको खबर बाहिर आएको छ ।
साउदीस्थित नेपाली राजदूतावासले त्यहाँको जुबेलस्थित सेन्दान इन्टरेनसनल कम्पनी टाट पल्टिने अवस्थामा पुगी ४६९ नेपाली नागरिक कामविहीन भएका जानकारी दिएको छ । उनीहरुमध्ये केहीले तलबभत्ता उपलब्ध गराउन र नेपाल फिर्ता तथा अन्य कम्पनीमा स्थानान्तरणका लागि पहल गरिदिन दूतावाससँग अनुरोध गरेका थिए । कामदारको अनुरोधपछि दूतावासले समस्या समाधानका लागि निरन्तर कूटनीतिक पहल गरिरहेको जनाएको छ ।
नेपाल फर्कन चाहनेको हकमा बहिर्गमन भिसाका लागि साउदी सरकारको सम्बन्धित श्रम कार्यालयलाई आवश्यक कागजातसमेत पठाइसकिएको नेपाली दूतावासले जनाएको छ । साउदी अरबबाट नेपाल जान इच्छुक नेपाली श्रमिकलाई र विशेषगरी सेन्दान इन्टरनेसनल कम्पनीमा कार्यरतलाई यथाशक्य बहिर्गमन भिसा जारी गरिदिन अनुरोध गर्दै आवश्यक पहल गरिसकिएको दूतावासले बिहीबार विज्ञप्तिमार्फत जनाएको छ ।
नेपाल फर्कन चाहनेको हकमा बाँकी सेवा सुविधा प्राप्त गर्ने कानुनी आधार पूरा गरी फर्काउने तथा साउदी अरबका अन्य कम्पनीमा स्थानान्तरण भई रोजगार गर्न चाहनेका लागि आवश्यक प्रक्रियालाई सहजीकरण गर्न साउदी सरकारको श्रम मन्त्रालय र सम्बन्धित अन्य निकायहरूमा भएका वार्ता तथा छलफल सकारात्मक रूपमा अगाडि बढेको दूतावासको भनाइ छ । समस्यामा परेका नेपाली नागरिकलाई धैर्यताका साथ रहन तथा खाना, आवास र स्वास्थ्यसम्बन्धी समस्या परेमा दूतावासमा सम्पर्क गर्न आग्रह गरिएको छ ।
समस्यामा परेका कामदारहरुलाई नेपाल फर्काउन तथा उनीहरुले पाउनुपर्ने बाँकी तलब भत्ता दिलाउन दूतावासले थालेको पहल स्वागतयोग्य छ । नेपाली कामदारहरुलाई न्याय दिलाउन दूतावासको पहल प्रभावकारी बनाउन जरुरी छ । नेपाल फर्कन चाहनेलाई नेपाल फर्काउन तथा त्यहीँ अन्य रोजगारदाता कम्पनीसँग आबद्ध हुन चाहनेलाई त्यसका लागि सहजीकरण गर्ने कार्य प्रभावकारी बनाउनुपर्छ । साथै, पटक–पटक दोहारिरहने यस्ता समस्याको दीर्घकालीन समाधानका लागि सरकारको तहबाटै पहल गर्न आवश्यक छ ।
