अहिले त पदाधिकारीदेखि संसदीय दलमा पनि टुंग्याएर जाऔं भन्ने छ । त्यसले एकता घोषणा मिति तोक्न सकेका छैनौं ।
अब्दुल खान
उपाध्यक्ष, जनमत पार्टी
काठमाडौं– मधेस र पश्चिम तराई आधारभूमि रहेको जनमत पार्टी र नागरिक उन्मुक्ति पार्टी (नाउपा)को एकता घोषणा अनिश्चित भएको छ । दुवै दलका नेताहरू संवादमा बसेर फेरि पार्टी एकता घोषणा मिति तोक्न अक्षम देखिएका छन् ।
यसअघि यही १७ वैशाखमा एकता घोषणासभा राखिएको थियो । त्यसैदिन नाउपा संरक्षक रेशमलाल चौधरी पक्राउ परे । साढे पाँच घण्टा थुनामा बसेर रिहा भए । यसरी उनको अप्रत्यासित पक्राउ र रिहाले दुई पार्टीको एकता भाँडियो ।
त्यसैदिन अबेर नयाँ बानेश्वरको एक होटलमा दुवै पार्टीका शीर्षस्थ नेताहरू छलफलमा जुटे । तर, फेरि एकता घोषणासभाको मिति तोक्न असफल भए । हालसम्म मिति तोकिएको छैन । जनमतका उपाध्यक्ष अब्दुल खानका अनुसार पार्टी एकताअघि प्याकेजमै नेतृत्व, सचिवालय, पदाधिकारी, केन्द्रीय कार्यकारिणीदेखि संसदीय दलमा जिम्मेवारी बाँडफाँट गर्नुपर्ने आवाज दुवै पार्टीमा उठेको छ । यसअघि पार्टीको सैद्धान्तिक पाटोदेखि पार्टी नाम र नेतृत्वदायी जिम्मेवारीमा रहने तीन नेताको पदमा टुंगो लागेको थियो । अन्य नेताको जिम्मेवारीबारे छलफल भएको थियो । यतिबेला पनि त्यो विषय उठेको उपाध्यक्ष खानले बताए । त्यसो हुँदा एकता घोषणा मिति छिटो तोकेर अघि बढ्न नसकिएको बताए ।
हामीले जे–जे गर्न बाँकी छ, गरिरहेका छौं । तपाईंहरूले यही महिना पार्टी मिलेको देख्न पाउनुहुन्छ ।
ठाकुरसिंह थारु
महासचिव, नाउपा
‘अस्ति पार्टी नाम के हुने ? संरक्षक, कार्यकारी अध्यक्ष र सहअध्यक्ष को–को हुने ? त्यसमा सहमति जुटेको थियो र एकता घोषणासभा आयोजना ग¥यौं तर त्यसदिन हाम्रो नेता रेशमलाल चौधरीको पक्राउले एकता घोषणा गर्नै पाएनौं,’ उनले प्रभावसँग भने, ‘अहिले त पदाधिकारीदेखि संसदीय दलमा पनि टुंग्याएर जाऔं भन्ने छ । त्यसले एकता घोषणा मिति तोक्न सकेका छैनौं ।’
दुई पार्टीबीच एकता भएपछि नाम नागरिक जनमत पार्टी हुने भएको छ । यसमा दुवै पार्टीको एकता कार्यदलले सहमति जुटाएको हो । पार्टी संरक्षक रेशम नै हुने भएका छन् । कार्यकारी अध्यक्ष डा. सिके राउत र सहअध्यक्ष रञ्जिता श्रेष्ठ रहने भएकी छन् । सचिवालय, पदाधिकारी, केन्द्रीय कार्यकारिणी कति जना रहने ? त्यही विषयमा सहमति जुटेको छैन ।
हाल बहसको क्रममा जनमत पक्षका नेताहरूले पदाधिकारी ३० भन्दा बढी हुनसक्ने बताएका छन् । नाउपा पक्षले बढीमा २५ जना हुनुपर्ने भन्दै आएको छ । केन्द्रीय समितिको आकारलाई लिएर पनि दुवै दलबीच मतभिन्नता छ । जनमतका नेताहरूले केन्द्रीय समितिमा ४०० भन्दा बढी हुनुपर्ने राय राख्दै आएका छन् । नाउपाका नेताहरूले दुवै पक्षबाट १७५÷१७५ गरी ३५० जनाभन्दा बढी हुन नहुने भन्दै आएका छन् । यी दुईवटा पार्टीको कमिटीमै संख्यालाई लिएर मतभेद कायम रहँदा एकता घोषणा झन अनिश्चयतिर धकेलिएको हो ।
संसदीय दलको नेता डा. राउत हुने देखिएको छ । उनी पार्टी अध्यक्ष हुनाले दलको नेताको सम्भावना देखिएको हो । प्रमुख सचेतक र सचेतक भने कुन दलबाट को हुने ? टुंगिएको छैन । हाल प्रतिनिधिसभामा जनमत पार्टीका छ जना सांसद छन् । नाउपाका चार जना सांसद छन् । प्रदेशमा जनमतको १६ जना र नाउपाको १२ जना सांसद छन् । संसदीय गणितमा नाउपाभन्दा जनमत अगाडि देखिन्छ । अब संसदीय दलदेखि पार्टी सचिवालय, पदाधिकारीदेखि केन्द्रीय समितिसम्मै सहमति जुटाएर एकता घोषणा गर्नुपर्ने अवस्थामा आइपुगेको नाउपा महासचिव ठाकुरसिंह थारुले बताए । उनको दाबीअनुसार यही महिनाभित्र एकता घोषणा हुन्छ ।
‘हामीले जे–जे गर्न बाँकी छ, गरिरहेका छौं । तपाईंहरूले यही महिना पार्टी मिलेको देख्न पाउनुहुन्छ,’ उनले भने । पार्टीको चुनाव चिह्नबारे भने सहमति जुटेको छ । सहमतिमा चुनाव चिह्न ‘ढकिया’ हुने भनिएको छ । पार्टी संगठन पनि भूगोलका आधारमा बाँडफाँट भएको छ । चितवन पूर्व डा. राउत र चितवन पश्चिम श्रेष्ठले हेर्ने भनिएको छ ।
दुई दलबीच एकताका लागि लामो समय कार्यदल तहमा छलफल भएको थियो । कार्यदलले नै मधेसमा बलियो राजनीतिक शक्ति निर्माणको रुपरेखा तयार गरेको थियो । हुन पनि एकता भएको अवस्थामा संसद्को छैटौं ठूलो दल नाजपा बन्छ । सत्तामा मोलमोलाइ गर्ने क्षमता बढ्छ ।
जबकि, यतिबेला मधेस आन्दोलनको मूल शक्ति जनता समाजवादी पार्टी (जसपा) नेपाल भने सानो दलमा खुम्चिएको छ । यो दलको अध्यक्ष मधेसमा विद्रोहको नेतृत्व रहेका उपेन्द्र यादव छन् । यही दलबाट विभाजित हुँदै अशोक राईले गठन गरेको दल जसपा भने अझ ठूलो छ । तर, दुई दलबीच एकता भएर नाजपा भने मधेसबाट संघीय संसद्मा प्रतिनिधित्व गर्ने महŒवपूर्ण शक्ति हुने सम्भावना छ ।
