नेपाल सर्वभौमसत्ता सम्पन्न देश हो । यद्यपि यहाँको सरकार परिवर्तनमा छिमेकी मुलुकदेखि शक्तिशाली राष्ट्रहरुले भूमिका खेल्ने शंकाउपशंका गरिन्छ । कहिले भारतले त कहिले चीनले, कहिले अमेरिकाले त कहिले अरू नै देशले । यस्तै ‘कन्स्पिरेसी थ्यौरी’को हल्ला चलाइन्छ । पछिल्ला दिनमा वर्तमान प्रधानमन्त्री केपी शर्मा ओली नेतृत्वको सरकालाई भारतले नरुचाएको हल्ला चलेको धेरै भयो । गत असार मसान्तमा कांग्रेससँग मिलेर बनेको सरकारमा ओली प्रधानमन्त्री छन् ।
हुन त ओलीले अमेरिका र थाइल्याण्ड गरी दुईपटक भेटिसकेका छन् । तर भारतमा भने उनलाई मोदीले ‘रेड कार्पेट’ ओछ्याइदिएनन् । यसकारण पनि ओली नेतृत्वलाई भारतले नरुचाएको भन्दै बारम्बर समाचारको शीर्षक बन्दै आएको छ । यसबाट नेपाली मिडिया, नेपाली नेता भारत परस्त बन्दै गएको देखाउँछ ।
यसको पछिल्लो उदाहरण हो, पूर्वप्रधानमन्त्री डा. बाबुराम भट्टराईको अभिव्यक्ति । मंगलबारमात्र भारत भ्रमणबाट फर्केका बाबुरामले भारत नेपालको व्यवस्था नै उल्ट्याउने पक्षमा नरहेको बताए । राजावादी समूहको तारन्तर आन्दोलनबाट आत्तिएका सत्तापक्षधरलाई आड मिल्नेगरी बाबुरामले यस्तो बताएको देखिन्छ । किनभने पछिल्ला दिनमा संघीयता र गणतन्त्रमाथि प्रश्न उठेका छन् । यसको मूल कारण नेतातन्त्रले गर्दा हो । तर यसमा पनि नेताहरुले गणतन्त्र नचाहेको भन्दै भारतलाई नै दोष दिएर आफ्नो कमजोरी लुकाउने प्रयास गरिरहेका छन् ।
बाबुराममात्र हैनन् परराष्ट्रमन्त्री डा. आरजु राणा देउवाले पनि महिना दिनअघि भारतबाट फर्कने क्रममा यस्तै अभिव्यक्ति दिएकी थिइन् । चैत ७ गते भारतबाट फर्कने क्रममा आरजुले नेपालको व्यवस्था उल्ट्याउने वा सरकार नै परिवर्तन गर्ने पक्षमा भारत सरकार नरहेको बताएकी थिइन् । यसरी नेताहरुले निरन्तर भारतको चाहनाबारे भन्ने र मिडियाले यस्तै विषयलाई कन्टेन्ट बनाउँदा के प्रस्ट हुन्छ भने नेपाली नेताहरु भारतपरस्त भइरहेका छन् ।
काम आफू नगर्ने, आशा जगाउने खालका काम केही नगर्ने अनि दोषजति छिमेकी देशलाई लगाएर उम्किने ? यो नेताहरुको धूर्तता एकदम गलत भयो । यसरी जनतालाई झुक्याउने काम, ठग्ने काम गर्न हुन्न । दुई ठूला दल मिलेर सरकार बनेको सायदै इतिहास कमै छ । यस्तो अवस्थामा जोधाहा शैलीमा काम गर्नुपर्नेमा विकास र सुशासनमा पटक्कै ध्यान सरकारले पटक्कै ध्यान दिएको छैन । जनताको समस्या समाधान गर्नेतर्फ ध्यान दिएकै छैन । आफ्नो कमीकमजोरी लुकाउन गणतन्त्र जोखिममा परेको, छिमेकीले नचाहेको जस्ता विषय ओकल्नु र त्यस्तै पात्र प्रयोग गरेर बच्न खोज्नु दुर्भाग्यपूर्ण हो । कलान्तरमा यसले आफैंलाई हानि पुग्ने छ ।
-1745656903.jpeg)
