भारतको जम्मु–कश्मीरमा बन्दुकधारीहरुको आक्रमणमा परी कयौं पर्यटकको मृत्यु भएको छ । मंगलबार दिउँसो बन्दुकधारीहरुलाई गोली ताकीताकी हानेर पर्यटकको हत्या गरेको भारतीय मिडियाहरुले जनाएका छन् । भारतको ‘स्वीजरल्याण्ड’का रुपमा चिनिएको पाहलगाममा भएको यो घटनामा परी कम्तीमा २८ जनाको मृत्यु भएको पछिल्लो समाचारहरुमा उल्लेख छ ।
दैनिक भास्करको हिन्दी संस्करणका अनुसार सन् २०१९ पछि यहाँ यो नै सबैभन्दा डरलाग्दो आक्रामण भएको हो । बन्दुकधारीको आक्रामणमा परी ज्यान गुमाउनेमा एक जना नेपालीसमेत रहेको बताइएको छ । त्यसैगरी युएईका एक पर्यटक पनि घटनामा मारिएका छन् । धेरैका नाम र देश खुल्न सकेको छैन । घटनाको जिम्मा लस्कर ए तोइबाले लिएको जनाइएको छ । उनीहरुले पर्यटकलाई नाम सोधीसोधी आक्रमण गरेको बताइएको छ । सन् २०१९ को फेब्रुअरीमा यहाँ आत्मघाती आक्रमणमा परी ४० जनाको मृत्यु भएको थियो । त्यसैगरी सन् २०१६ को सेप्टेम्बरमा उरी आक्रमणमा परी १९ जना सेनाले ज्यान गुमाएका थिए ।
पाहलगाम श्रीनगरबाट करिब ९० किलोमिटर टाढा पर्छ, जुन पर्यटकहरूबीच लोकप्रिय गन्तव्यस्थल हो । पर्यटकीय क्षेत्रमा यसरी आक्रमण हुनु निन्दनीय हो । यस विषयमा जम्मु कश्मीरको प्रदेश सरकार भारत सरकार गम्भीर बन्नैपर्छ । कश्मीर क्षेत्रमा सन् १९८९ देखि चलिरहेको विद्रोहमा लडाकुहरू भारतबाट स्वतन्त्रता वा पाकिस्तानसँगको मिलनको पक्षमा छन् । साउदी अरेबिया उडेका भारतीय प्रधानमन्त्री नरेन्द्र मोदीले घटनाको निन्दा जनाएका छन् ।
गृहमन्त्री अमित शाहले दोषीलाई कडा सजाय दिने चेतावनी दिएका छन् । अनन्तनागस्थित अस्पतालमा केही घाइतेहरू पु¥याइएको छ, जसमा दुई जनालाई गोली लागेको र एक जनाको घाँटीमा गोली लागेको उल्लेख गरिएको छ । विपक्षी नेता राहुल गान्धीले यो घटनालाई ‘हृदयविदारक’ भन्दै संघीय सरकारले उत्तरदायित्व लिनुपर्ने माग गरेका छन् । भारत सरकारले पछिल्ला वर्षहरूमा कश्मीरलाई पर्यटन केन्द्रको रूपमा प्रवद्र्धन गर्दै आएको छ । सन् २०२४ मा झण्डै ३५ लाख पर्यटकले कश्मीर भ्रमण गरेका थिए ।
भारतले पाकिस्तानमाथि यस्ता आक्रमणमा सहयोग पु¥याएको आरोप लगाउने गरेको छ भने पाकिस्तानले कश्मीरको आत्मनिर्णयको अधिकारको समर्थनमात्र गर्ने बताउँदै आएको छ । जे जस्तो भए पनि यसरी पर्यटकीय क्षेत्रमा आक्रमण गर्नु निन्दनीय हो । यस्तो कार्यको घोर विरोध हुनुपर्छ ।
-1755862759.jpeg)
