चैत १५ गते राजावादी समूहले काठमाडौंमा गरेको प्रदर्शनमा प्रहरीले गरेको दमन र सरकारी रिपोर्टले प्रश्नमाथि प्रश्न उब्जेको छ । सुरक्षा संयन्त्र सम्हालेको तालुकदार निकाय हो गृहमन्त्रालय । गृहमन्त्रीमा अहिले कांग्रेस नेता रमेश लेखक छन् । सुझबुझपूर्ण जवाफमा उत्रने गृहमन्त्री लेखकको नेतृत्वमा रहेको सुरक्षा निकायले यो प्रदर्शनमा भने अनेकन प्रश्नहरु उब्जाएका छन् ।
यो प्रदर्शनको मुख्य योजनाकार र कमान्डर थिए दुर्गा प्रसाईं । मेडिकल व्यवसायी उनलाई उक्त दिन प्रहरीले नियन्त्रणमा लिइसकेको थियो । तर एकाएक प्रसाईं कार्यक्रम स्थल लैजाँदै गर्दा प्रहरीले तिनकुनेमै छाडिदिएको देखिन्छ । उनै प्रसाईंलाई अहिले प्रहरी प्रशासन धुईधुईती खोजिरहेको छ । प्रहरीले बुधबार सार्वजनिक गरेको भिडियोसहितको रिपोर्टमा प्रसाईंले सिंहदरबारदेखि संसद भवन कब्जा गर्नेसम्मका उक्साहटपूर्ण अभिव्यक्ति दिएको देखिन्छ । तर पक्राउ परिसकेको प्रसाईंलाई किन छाडे प्रहरीले ?
यतिमात्र हैन प्रहरीले उक्त प्रदर्शनमा सिनामंगल क्षेत्र र कोटेश्वरको भाटभटेनी क्षेत्रमा अनावश्यक गोली प्रहार गरेको पनि पुष्टि भएको छ । प्रहरीले ५८ राउन्ड गोली प्रहार गर्दा २० जना घाइते भएको प्रहरीको प्रेस ब्रिफिङपछि मात्र थाह भयो । प्रहरीले अन्धधुन्ध गोली चलाउने क्रममा त्यहाँ न त नागरिक समाजको उपस्थिति थियो न त मिडियाको । यसरी प्रदर्शनमा आएकामध्ये कति घाइते भए त्यसको सही प्रतिवेदनसमेत प्रहरीले लुकाएको देखिन्छ ।
यसैगरी प्रहरी प्रशासनले आफ्नो पक्षमा सेन्टिमेन्ट बटुल्न व्यक्तिगत सम्पत्तिमा भएको तोडफोड र आगजानी नियन्त्रणका लागि भने कुनै बल प्रयोग गरेको देखिन्न । सीमित प्रदर्शनकारी भएको ठाउँमा ताकीताकी गोली हान्ने तर धेरै भएको ठाउँबाट भइरहेको उदण्डता रोक्न केही नगर्ने कारण के हो ? यसैगरी कफ्र्यु जारी गरी सेना खटाएपछि पनि जडीबुटी क्षेत्रमा तोडफोड र आगजनी कसरी भयो ? तिनकुने घटनामा प्रहरीबाट यस्ता थुप्रै सन्देहपूर्ण घटना भएका छन् जसलाई स्वतन्त्र नागरिक समाजले प्रश्न उठाउनुपर्दछ ।
प्रदर्शनकारीबाट उद्दण्डताको हद नाघेको छ । उनीहरुलाई कारबाहीको दायरामा ल्याउनुपर्छ र कानुनअनुसार कारबाही हुनुपर्छ । तर सुरक्षा निकायले सही सूचना नदिने, उक्त क्षेत्रमा खटिएका प्रहरीहरुको कमजोर सूचना प्रणालीजस्तो विषयमा भने प्रश्न उठेको छ । यो विषयमा गृहमन्त्रालयले बेलैमा सही जवाफ देओस् । नभए सूचना लुकाएकै कारण जनआक्रोश बढेर जाने देखिन्छ ।
