भनिन्छ शिक्षालयमा चरम राजनीति भयो भने यहीबाट थिति बिग्रन सुरु हुन्छ । त्रिभुवन विश्वविद्यालय नेपालको प्रमुख शिक्षालय हो, तर यो संस्था चरम राजनीतिबाट थिलथिलो भइसकेको छ । यसको पछिल्लो उदाहरण हो यहाँका उपकुलपति प्रा.डा. केशरजंग बरालको राजीनामा । बहिर झट्ट हेर्दा रहरलाग्दो देखिने त्रिविमा सत्ताअनुकूलको डरलाग्दो राजनीति छ ।
पहिलोपटक खुला प्रतिस्पर्धाबाट उपकुलपति बनेका बराललाई धेरैले मेरिटोक्रेसीको आधारमा आएका व्यक्ति मानेका थिए । त्रिवि सुधारको योजनाहरु ल्याएका थिए उनले । २०८० फागुनमा प्रधानमन्त्री पुष्पकमल दाहालको पालामा त्रिविको उपकुलपति भएका उनलाई वर्तमान प्रधानमन्त्री केपी ओलीले हटाइछाड्ने योजना यसअघि नै बनाइसकेका थिए ।
यही योजनाअनुसार ओलीले मंसिरको त्रिविसभामा आफ्नो विद्यार्थी संगठनका नेताहरु लगाएर बरालविरुद्ध जथाभावी भन्न लगाएका थिए । जुनसुकै सरकार आउँदा पनि यहाँ नेपाली कांग्रेसको विद्यार्थी संगठन नेविसंघ, नेकपा एमालेको विद्यार्थी संगठन अनेरास्ववियुको रजगज चल्छ । उनीहरुले भनेअनुसार नभए यहाँ १२ महिनै तालाबन्दी हुन्छ भने प्राध्यापक कुटपिटमा उत्रन्छन् विद्यार्थी नेताहरु ।
राजनीतिक दलले विश्वविद्यालयलाई कार्यकर्ता भर्तीको थलो बनाएका छन् । पछिल्लोपटक अनेरास्ववियु र नेविसंघको दबाबमा करारका प्राध्यापक, कर्मचारी र चालकलाई स्थायी गर्न दबाब दिएको थियो । यी दबाव थेग्न बराल कति दिन त त्रिवि नै नगई बाहिरबाटै काम गर्न बाध्य भएका थिए । चर्को दबाब थेग्न नसकेपछि बरालले गत मंगलबार राजीनामा बुझाएका हुन् ।
चरम राजनीतिकै कारण त्रिविमा काम गर्न नसक्ने प्राध्यापकहरु बताउँछन् । यहाँ काम गर्न विद्यार्थी नेताहरुलाई रिझाउनुपर्ने बाध्यता रहेको छ । विद्यार्थी नेताहरु केन्द्रीय नेताहरुबाट परिचालित हुन्छन् । त्रिविमा सक्रिय स्वतन्त्र विद्यार्थी युनियन, राजनीतिक दलका विद्यार्थी संगठनको नेताहरुको ‘साँढे’ पनका कारण कैयनपटक विद्यार्थी नेताहरु जेलसमेत पुगेका छन् । कोही जेलजीवन नभोगी सेटिङमा पलायनसमेत भएका छन् ।
बराल अहिलेका पात्र हुन् । त्रिविमा यस्तो पात्र फेरिरहन्छन् तर राजनीतिक व्यवहार फेरिँदैन । शिक्षालयबाटै यस्तो बेथिति फैलिएपछि अरु क्षेत्रमा कस्तो असर पर्ला ? मुल नै फोहोर भएपछि खोला र नदी सफा कसरी होला ? यो विषयमा अहिलेको नागरिकको चेत गम्भीर हुनैपर्ने हो । तर विद्यार्थीदेखि प्राध्यापक रोजगारी र नाफाको लोभमा राजनीतिक दलको लगाममा साँढे बनेर हिँडेका छन् । यो प्रवृत्ति तत्काल रोकिनुपर्छ ।
