- देश निर्माणको मार्गचित्र ‘मिसन ब्लु प्रिन्ट’ रास्वपाले बनाउने
- उपसभापतिद्वयको नेतृत्वमा छ सदस्यीय कार्यदल गठन
- आगामी महाधिवेशनमा ‘मिसन ब्लु प्रिन्ट’ प्रस्तुत गरिने
काठमाडौं– देशको अवस्था बिग्रिएको हरेकजसोले टिप्पणी गर्छन् । बिग्रिएको कारण पनि सुनाउँछन् तर बनाउनेचाहिँ कसरी ?रवि लामिछाने नेतृत्वको राष्ट्रिय स्वतन्त्र पार्टी (रास्वपा)ले यससम्बन्धी स्पष्ट मार्गचित्र बनाउने भएको छ । मार्गचित्रलाई रास्वपाले ‘मिसन ब्लु प्रिन्ट’ भनेको छ । रास्वपा प्रवक्ता मनिष झाका अनुसार मिसन ब्लु प्रिन्ट समृद्ध नेपाल बनाउने व्यवस्थित योजना हुने छ ।
‘देश राम्ररी नचलेको त सबैले भनेका छन् । उसो भए देश चलाउने योजना त चाहियो होला नि त । अनि अहिलेको अवस्था र अभ्यास गलत हो भन्ने कुरा सबैले स्वीकारेका छन् तर सही के हो ?,’ उनले प्रभावसँग भने, ‘त्यसको खाका मिसन ब्लु प्रिन्ट हो र जुन समृद्ध नेपाल निर्माणको चित्र पनि हुने छ ।’
मिसन ब्लु प्रिन्ट तयार गर्न रास्वपाले कार्यदल गठन गरेको छ । सोमबार पार्टी केन्द्रीय कार्यालयमा बसेको केन्द्रीय समिति बैठकले उपसभापतिद्वय डोलप्रसाद अर्याल र डा. स्वर्णिम वाग्लेको संयोजकत्वमा छ सदस्यीय कार्यदल गठन गरेको हो ।
अहिलेको अवस्था र अभ्यास गलत हो भन्ने कुरा सबैले स्वीकारेका छन् तर सही के हो ? त्यसको समग्र खाका ‘मिसन ब्लु प्रिन्ट’ हो । त्यहाँ समृद्ध नेपाल निर्माणको चित्र हुने छ ।
मनिष झा
प्रवक्ता, रास्वपा
कार्यदलमा पूर्वमन्त्रीहरू सुमना श्रेष्ठ, शिशिर खनाल, विराजभक्त श्रेष्ठ र डा. तोसिमा कार्की सदस्य छन् । कार्यदलले विभिन्न विद्यागत क्षेत्रमा विशेषज्ञता हासिल गरेका सरोकारवाला व्यक्तिहरूसँग छलफल र संवाद गर्ने छ । उनीहरूबाट राय र सुझाव लिने छ । त्यस आधारमा मिसन ब्लु प्रिन्ट तयार गर्ने कार्याधिकार कार्यदललाई रहेको प्रवक्ता झाले बताए ।
उनले आगामी पार्टी महाधिवेशनमा मिसन ब्लु प्रिन्ट प्रस्तुत गर्नुपर्ने बताए । ‘हामीले २०८२ को वैशाखमा पार्टी महाधिवेशन गर्ने भनेका छौँ र त्यही महाधिवेशनमा मिसन ब्लु प्रिन्ट प्रस्तुत हुन्छ र छलफल गरी पारित गर्छौं,’ झाले भने, ‘त्यहीअुनसार कार्यदल तयारीमा जुट्छ ।’
रास्वपा देश बनाउने भन्दै उदाएको दल हो । देश बिग्रिएको, भ्रष्टाचारको दलदलमा फसेको र यसमा कांग्रेस, एमाले, माओवादीलगायतका नेताहरू जिम्मेवार रहेको रास्वपाको ठहर छ । गत आमचुनावमा रास्वपाको चुनावी एजेण्डा यही थियो । कांग्रेस सभापति शेरबहादुर देउवा, प्रधानमन्त्रीसमेत रहेका एमाले अध्यक्ष केपी शर्मा ओलीदेखि माओवादी अध्यक्ष पुष्पकमल दाहालले देशलाई बर्बादीतर्फ लगेको भन्दै उनीहरूविरुद्ध रास्वपाले ‘नो नट अगेन’ अभियान नै चलाए । तर, उनीहरू चुनाव जितेर संसद्मा आए । चुनावपछि देउवाबाहेक दाहाल र ओली प्रधानमन्त्री भइसके । दाहालको सरकारमा रविकै नेतृत्वमा रास्वपा दुईपटक सहभागी भयो । त्यति हुँदा पनि रास्वपा नेताहरूकै शब्दमा भन्दा बिग्रिएको देश बनेन ।
मतदाताहरूले पनि रास्वपाका नेताहरूलाई सोध्न थालेका छन्– ‘खोइ देश बनायाैँ त ?’ यो प्रश्न गएको चुनावमा रास्वपाबाट उम्मेदवार बनेकाहरूलाई मत दिने मतदाताहरूले सोध्दै आएका छन् । संसद्मा पुराना दलका नेताहरूले ‘हा हु...’ गरेर चुनाव जित्नेसँग देश बनाउने भिजन नै नभएको टिप्पणी गर्दै आएका छन् ।
यस्तोबेला रास्वपाले मिसन ब्लु प्रिन्ट नाम दिएर राष्ट्र निर्माणको खाका तयार गर्ने भएको हो । हालसम्म कुनै राजनीतिक दलले देश निर्माण गर्न खाका तयार गरेका छैनन् । यदि, रास्वपाले बनाएको अवस्थामा त्यो पहिलो हुने छ ।
रास्वपाले यसबाहेक लिडरसिप एकेडेमीलाई चलायमान गर्ने भएको छ । रास्वपाको लिडरसिप एकेडेमी अन्य पार्टीको स्कुल विभागजस्तै हो । पार्टी सहमहामन्त्रीद्वय सुमना श्रेष्ठ र विपिनकुमार आचार्यलाई एकेडेमी व्यवस्थित बनाउने जिम्मेवारी सोमबारको पार्टी बैठकले तोकेको छ ।
प्रवक्ता झाले भने, ‘हाम्रो पार्टीका कतिपय नेताहरूको क्षमता अभिवृद्धि गर्नुछ । विदेशतिर चाहिँ अर्को पुस्ता नेतृत्व तयार गर्न प्रशिक्षणमार्फत क्षमता अभिवृद्धि गर्ने गरिन्छ । त्यहीअनुसार हामी पनि क्षमता अभिवृद्धि गर्दै नेतृत्व जन्माउन चाहन्छौं, त्यो काम अब हुन्छ ।’रास्वपा बैठकले पार्टीको जनयात्रा कार्यक्रमको कार्यविधिलगायतको संयोजन जिम्मेवारी संसदीय दलका उपनेता विराजभक्त श्रेष्ठलाई तोकिएको छ । )
पाँच महिनापछि पार्टीको नेतृत्वमा फर्किए रवि
सहकारी ठगी प्रकरणसँग जोडिएर सम्पत्ति शुद्धीकरणकोसमेत मुद्दा सामना गर्नुपरेपछि सांसद पदबाट निलम्बित रास्वपा सभापति रवि लामिछाने पार्टी राजनीतिमा सक्रिय भएका छन् । उनले सोमबार पार्टीको चुनाव चिह्न घण्टी बजाएपछि राष्ट्रिय झण्डालाई तीनपटक ढोगेर पार्टी बैठकको सभापतित्व ग्रहण गरे । साढे पाँच महिनापछि पार्टी कार्यालयबाट उनी सरकारविरुद्ध चर्को सुनिए ।
‘मलाई लागेको थियो, म शान्त बसौंला तर टाउको माथि तरबार झुड्याइयो । तरबार राख्यो भने डराउँछ होला भन्ने लागेको थियो होला,’ उनले भने, ‘कुनै पनि बेला शिरमाथि राखेको तरबार खसाल, म थाप्न तयार हुन्छु, म लड्छु, जुनसुकै शक्तिसँग एक्लै लड्छु ।’
शरीरमा एक थोपा रगत रहुञ्जेलसम्म लोकतन्त्रको नाममा हुने लुटतन्त्रको विरोध गर्ने बताए । उनले सरकराले आफूलाई ज्युँदो छाडेको भन्दै त्यो आफ्नो जित भएको बताए । लामिछाने २ कात्तिकमा सहकारी ठगी प्रकरणमा पक्राउ परेका थिए । यसबीचमा उनलाई पोखरा, काठमाडौं, रुपन्देही र चितवन अदालतले धरौटीमा रिहा गरेका छन् । तर, मुद्दा भने विचाराधीन छ । विचाराधीन भएकै अवस्थामा उनी पार्टी राजनीतिमा सक्रिय भएका हुन् ।
