बुधबार अर्घाखाँचीमा बस दुर्घटना हुँदा चार जनाको मृत्यु भयो भने २६ जना घाइते भए । नवलपरासीको बर्दघाटबाट अर्घाखाँचीको सुपादेउराली दर्शनका लागि गएको लु २ ख ३०३ नम्बरको बस मन्दिरबाट फर्किने क्रममा शितगंगा नगरपालिका–२ भुवनपाटाको गोरूसिंगे–सन्धिखर्क सडकखण्डमा दुर्घटनामा परेको थियो । आइतबारमात्रै चितवनबाट काठमाडौं आउँदै गरेको हाइस नागढुंगामा दुर्घटना हुँदा एक जनाको मृत्यु, नौ जना घाइते भएका थिए । सोमबार देशका विभिन्न ठाउँमा सडक दुर्घटनाका कारण सात जनाको मृत्यु भयो ।
सडक सुरक्षा जाँचमा कडाइ गर्दा पनि दुर्घटना भने घटेको देखिँदैन । बरु सडक दुर्घटनामै ज्यान गुमाउनेको संख्या पछिल्लोपटक बढ्दो छ । सवारी दुर्घटनामा परी तनहुँमा नौ महिनामा ४८ जनाको मृत्यु भएको तथ्यांक छ । त्यहाँ चालु आर्थिक वर्षको फागुनसम्ममा भएका ४४ वटा सवारी दुर्घटनामा ४८ जनाले ज्यान गुमाएका हुन् । ती दुर्घटनामा ८१ जना घाइते भए ।
लुम्बिनी प्रदेशमा पनि यस्तो घटनाहरु बढ्दो छ । ट्राफिक नियम उल्लंघन तथा सडक दुरावस्थाकै कारण सवारीसाधन दुर्घटना हुँदा देशभर दैनिक सात जनाभन्दा बढीले ज्यान गुमाउँदै आएको विकराल तथ्यांक छ । सवारी दुर्घटना हुने सबैभन्दा ठूलो कारण चालकको लापरवाही तथा कमजोरी देखाइन्छ । यद्यपि मापदण्डविपरीतका सवारीसाधन, कमजोर पूर्वाधारहरु प्रमुख कारण भएको देखिन्छ ।
सडकमा साइडबार नहुँदा काठमाडौंको धोबीखोलामै कार खसेको थियो । पूर्वाधार कमजोर भएसँगै दुर्घटनाको जोखिम अति उच्च हुन्छ । यसैगरी केही दिनअघि युवाहरुले टोखामा तीव्र गतिमा मोटरसाइकल चलाएका कारण एकजनाको घटनास्थलमै मृत्यु भयो ।
तीव्र गति, लाइसेन्स वितरणमा अनियमितता, ट्राफिक लाइट तथा संकेतको अभाव, साइटबारको अभाव पनि दुर्घटना बढ्नुको प्रमुख कारण हो । सरकारले दुर्घटना न्यूनीकरणका लागि बर्सेनि करोडौं खचिर्ने गरेको छ । सहरी क्षेत्रमा एकै ठाउँमा ट्राफिक संकेत, ट्राफिक लाइट, ट्राफिक प्रहरी र ठूलाठूला ट्राफिक जनचेतनाका फ्लेक्स राखे पनि बाह्य क्षेत्रमा खासै ध्यान दिएको पाइन्न ।
यसैले ट्राफिक अनुशासनको कमी, नियमन अभाव हुँदा ती क्षेत्रमा दुर्घटना बढिरहेको छ । बर्सेनि सडक दुर्घटना न्यूनीकरणका लागि सचेतना अभियानहरु चलाइने पनि ती अभियान दुर्घटना न्यूनीकरणमा भने पर्याप्त नभएको प्रस्टै देखिन्छ । यसैले अबका दिनमा नियमन र पूर्वाधारमा विशेष ध्यान दिऔं, मापदण्डविपरीतका सवारीसाधन चलाउन निषेध गरौं । अनिमात्र दुर्घटना न्यूनीकरण प्रभावकारी हुने छ ।
