- माओवादी, नेकपा एस, नेकपा र नेसपापछि सत्ता नेतृत्व दल एमाले राजावादी गतिविधिको विरुद्ध आन्दोलनमा
- देशभर ११ चैतमा एमाले जनप्रदर्शन, गणतन्त्रवादी शक्तिसँग कार्यगत एकतादेखि आन्दोलनमा सहकार्यसम्म
- कांग्रेस र रास्वपाको छैन राजावादीविरोधी कार्यक्रम
काठमाडौं– प्रधानमन्त्री केपी शर्मा ओलीको दल नेकपा एमालेले राजावादीको बढ्दो गतिविधिविरुद्ध शक्ति प्रदर्शन गर्ने भएको छ । देशभरका सबै वडामा एमालेले शक्ति प्रदर्शन गर्ने निर्णय गरेको हो ।
प्रमुख विपक्षी दल नेकपा माओवादी केन्द्र, नेकपा एकीकृत समाजवादी, नेपाल कम्युनिस्ट पार्टी (नेकपा) र नेपाल समाजवादी पार्टी (नेसपा)ले राजावादीको गतिविधिलाई निस्तेज पार्नेगरी आन्दोलन घोषणा गरिसकेको पृष्ठभूमिमा एमालेले पनि प्रतिरोधी आन्दोलन घोषणा गरेको हो ।
पार्टी महासचिव शंकर पोखरेलका अनुसार यही ११ चैतमा देशभरका सबै वडामा एमालेको जनप्रदर्शन हुनेछ । हाल जारी जरा अभियानलाई नै जनपरिचालनमा रुपान्तरण गर्न निर्देशन दिइएको पोखरेलले बताए ।
उनले भने, ‘जरा अभियानका कार्यक्रमहरू अब परिचालनतिर केन्द्रित हुनेछ ।’प्रमुख विपक्षी माओवादीसहितका समाजवादी धाराका शक्तिहरूले राजावादीविरुद्ध काठमाडौंमा यही १५ चैतमा शक्ति प्रदर्शन गर्ने तयारी गरेका छन् । त्यही दिनदेखि राजावादीहरू निरन्तर आन्दोलनमा जाने भएका छन् । यस्तो अवस्थामा एमालेले भने चार दिनअघि (११ चैत)देखि नै शक्ति प्रदर्शन थाल्ने भएको हो ।
यसअघि संसद्देखि राजावादीको गतिविधिलाई एमाले सांसदहरू प्रतिवाद गर्थे । बिहीबार पनि एमाले सांसद सरस्वती सुब्बाले वर्तमान नेपालको संविधानले राजा नचिन्ने र फेरि राजा फर्केर आउने नसोच्न राजावादीहरूलाई चेतावनी दिएकी थिइन् । नेपाली जनताको बलिदानीपूर्ण सङ्घर्षको बलमा शाहवंशीय अन्तिम राजा ज्ञानेन्द्र शाहले घुँडा टेकेको भन्दै २१औँ शताब्दिमा कसैले रैती बन्न नचाहेको बताइन् । यसअघि एमाले सांसदहरू रघुजी पन्त, प्रमुख सचेतक महेश बर्तौलालगायत सांसदहरूले संसददेखि प्रतिवाद गरेका थिए ।
अब भने सडकमा पनि एमाले प्रतिवादमा उत्रिने भएको हो । १८ चैतमा जिल्ला–जिल्लामा एमालेले जनप्रदर्शन गर्ने भएको छ । सोही दिन काठमाडौं उपत्यका, कैलाली, सुर्खेत, रूपन्देही, पर्सा र झापामा भने मोटरसाइकल ¥याली निकालिने महासचिव पोखरेलले जानकारी दिए । उनका अनुसार जनपरिचालनको तेस्रो कार्यक्रम प्रदेश स्तरीय हुनेछ । २४ देखि ३० चैतसम्म धनगढी, सुर्खेत, बुटवल, पोखरा, वीरगञ्ज र दमकमा विशेष सभा हुनेछ । राजधानी उपत्यकामा पनि सभा हुने भएको छ । तर, मिति भने टुंगो लगाएको छैन ।
यससँगै राजावादी गतिविधिको प्रतिवादमा एमालेले गणतन्त्र पक्षधरको ध्रुवीकरण–एकतालाई दोस्रो कार्यक्रमका रूपमा अगाडि सारेको छ । त्यसका लागि विपक्षीमा रहेका नेताहरूसँग संवाद गरिने भएको एमाले नेता डा. राजन भट्टराईले जानकारी दिए । तर, ओली–दाहाल सम्बन्ध सुदृढ छैन । यद्यपि, राजावादीको गतिविधिविरुद्ध कार्यगत एकता गर्न पनि ओली तयार रहेको भट्टराई बताउँछन् ।
‘थुप्रै मुद्दामा सत्ता पक्ष र विपक्षबीच बेमेल होलान् तर व्यवस्था जोगाउने सन्दर्भमा हामी एक ठाउँ उभिएर प्रतिक्रियावादी शक्तिहरूलाई परास्त गर्नैपर्छ । त्यसका लागि सबै गणतन्त्रवादीहरूबीच सहकार्य आवश्यक छ, त्यसका लागि प्रचण्डसँग संवाद अघि बढाउन सम्माननीय प्रधानमन्त्रीज्यूले चाहनुभएको छ,’ उनले भने ।
उनले माओवादी, नेकपा एस, नेकपासँगै नेसपाले गर्ने गणतन्त्र रक्षार्थको प्रदर्शनलाई एमालेको सहयोग हुने बताए । विगतमा पनि तत्कालीन राजाको निरङ्कुशताविरुद्ध मिलेरै लडाइँ लडेको र अहिले पनि त्यसरी नै सडकदेखि सदनसम्मै प्रस्तुत भएर राजावादीविरुद्ध सशक्त प्रतिवाद गर्ने उनको भनाइ छ ।
यसबाहेक एमालेले बुद्धिजिवी र नागरिक समाजसँग अन्तर–संवाद गर्ने भएको छ ।राजावादीले राजतन्त्र र हिन्दुराष्ट्र पुनःस्थापनासँगै प्रदेश खारेजीको एजेन्डा अघि सारेको छ । गत ७ फागुनमा पूर्वराजा ज्ञानेन्द्रले एक भिडियो सन्देश जारी गर्दै देश संकटमा रहेको र अब साथ दिन आग्रह गरेका थिए । त्यसपछि २५ फागुनमा काठमाडौं आउने क्रममा उनको स्वागतमा हजारौँ राजावादी सडकमा निस्किएका थिए । गणतन्त्र पक्षधरहरू पनि झस्किएका थिए ।
यहीबीच ज्ञानेन्द्रको चाहनाअनुसार पूर्वपञ्च नवराज सुवेदीको नेतृत्वमा राजावादीहरू आन्दोलनमा जाने भएका छन् । तर, राजावादी मूल शक्ति राप्रपाका अध्यक्ष राजेन्द्र लिङ्देन समर्थ छैनन् । पूर्वपञ्च केशरबहादुर विष्टले पनि सुवेदीले पनि असहयोग गर्ने भएका छन् । यद्यपि, राजावादीहरूले आन्दोलन गर्ने भएका छन् । राजावादीको आन्दोलनविरुद्ध नै सत्तारुढ एमालेसँगै विपक्षी समाजवादी मोर्चा जाने भएका हुन् ।
तर, कांग्रेस र रास्वपाको शंकास्पद मौनता छ । दुवै दलले राजावादीको आन्दोलनविरुद्ध कुनै प्रतिरोध कार्यक्रम सार्वजनिक गरेका छैनन् । कांग्रेसका केही सांसदहरूले राजतन्त्रको विरोध त गरेका छन् तर संस्थागत रूपमा पार्टीले राजावादीको गतिविधि उभिने निर्णयसम्म गरेको छैन । रास्वपा सांसदहरूले त विरोधसम्म गरेका छैनन् ।
-1745656903.jpeg)
