काठमाडौं- नेपाल तामाङ घेदुङले शंखरापुर नगरपालिकाको बोझेनीस्थित स्थानीयलाई पक्राउ गरिएको घटनाप्रति आपत्ति जनाएको छ । नेपाल विद्युत् प्राधिकरणले स्थानीयको सहमतिविपरीत सबस्टेसन निर्माण गरिरहेको विरोधमा बिहीबार शान्तिपूर्ण प्रदर्शनमा उत्रिएका करिब डेढ दर्जन स्थानीयलाई प्रहरीले पक्राउ गरेपछि घेदुङले विरोध जनाएको हो ।
पक्राउ पर्नेमा शंखरापुर नगरपालिका–३ बोझेनीका स्थानीय आइते तामाङ, माइते वाइबा, चित्रबहादुर पाख्रिन, काइला तामाङ, आइते पाख्रिन, नीरमाया तामाङ, लक्ष्मी तामाङ, सन्त पाख्रिन, जुनुमाया तामाङ, मंगली तामाङ, मियमाया तामाङ, फूलमाया तामाङ, तिउकी तामाङ, ठूलीमाया घिसिङ, कान्छी तामाङलगायत रहेका घेदुङद्वारा बिहीबार जारी विज्ञप्तिमा जनाइएको छ ।
‘स्थानीय समुदायको सहमति नलिई मानवबस्ती क्षेत्रमा निर्माण भइरहेको लप्सीफेदी-चाँगुनारायण सबस्टेसन निर्माण आयोजनाले पार्ने असरको विरुद्धमा वर्षौंदेखि निरन्तर खबरदारी आन्दोलन गर्दै आएको र यसक्रममा आज प्रहरीले शान्तिपूर्ण विरोधमा रहेका करिब डेढ दर्जन स्थानीय तामाङ समुदायका व्यक्तिहरूलाई गिरफ्तारी गरेको घटनाप्रति हाम्रो गम्भीर ध्यानाकर्षण भएको छ,’ घेदुङका महासचिव जगतमान लामा दोङले जारी गरेको विज्ञप्तिमा भनिएको छ, ‘वृद्धवृद्धा, महिला, अशक्त बिरामीसमेतको मानवीय सम्वेदनशीलताको कुनै पर्वाह नगरी निर्मम दमन र गिरफ्तारी गरिनु आफैंमा निन्दनीय तथा मानवअधिकार विरोधी क्रियाकलाप हो भन्ने हाम्रो ठहर रहेको छ ।’
घेदुङले स्थानीय समुदायको शान्तिपूर्ण आन्दोलनमाथि भइरहेको अनावश्यक बल प्रयोग बन्द गर्न माग गरेको छ । पक्राउ परेकाहरूलाई विनासर्त तत्काल रिहाइ गर्न र वार्तामार्फत समस्याको दीर्घकालीन समाधान खोज्नसमेत घेदुङले माग गरेको छ ।
बोझेनीका यहाँका स्थानीय लामो समयदेखि आन्दोलनरत रहे पनि प्राधिकरणले माग सुनुवाइ गरेको छैन । सुरक्षाकर्मी परिचालन गरी जबरजस्ती काम अगाडि बढाएपछि स्थानीय थप आक्रोशित बनेका हुन् ।
