काठमाडौं महानगरपालिका पछिल्लो समय सुशासन व्यवस्थापनमा निकै कमजोर देखिएको छ । महानगर प्रमुखमा बालेन्द्र साह (बालेन) निर्वाचित भएर आएदेखि नै महानगरपालिकाको सेवाप्रवाह चुस्त हुन्छ भन्ने आँकलन गर्नेहरुका लागि अहिले मुखमा बुजो लागेको छ । निर्वाचन भएको करिब ३० महिना पुग्दै गर्दा प्रशासन हाँक्ने प्रमुख दायित्व बोकेको प्रमुख प्रशासकीय अधिकृत नै टिक्न सकेका छैनन् । निमित्तसहित यो तीन वर्षमा पाँच जनाले अपमानजनक ढंगले बहिर्गमन हुनुपरेको देखिन्छ ।
महानगर प्रमुख साहले प्रमुख प्रशासकीय अधिकृत वसन्त अधिकारीलाई गलहत्याएसँगै निमित्त प्रशासकीय प्रमुखले अघिल्लो वर्षको नगरसभा चलाए । ती निमित्त बनेका सिताराम कोइरालालाई पनि आर्थिक अनियमितताको आरोप लगाउँदै कारबाही गरियो । महानगरमा युवा कार्यकारी आएको निकै चर्चा गराइयो । प्रदीप परियार महानगरमा ‘रबर स्ट्याप्प’ प्रमुख प्रशासकीय अधिकृतका रुपमा बसे । थोरै समय बसेका उनले पनि प्रमुख साह र उनको सहयोगीका कारण महानगर छाडे । परियारको बहिर्गमन सहज भए पनि उनीपछि आएका सरोज गुरागाईंलाई महानगरप्रमुख साहले उनको प्रतिष्ठामाथि नै आँच पुग्नेगरी पत्रकार सम्मेलन गरेर काठमाडौं टावरको नक्सापास विवाद देखाएर कार्यालय प्रवेशमा रोक लगाए ।
त्यत्तिमात्र होइन उनले पाउने सुविधाहरुसमेत कटौती गरिदिएर अन्योलमा पारिदिएका छन् । अहिले निमित्त सम्हालेका शिक्षा विभागका प्रमुख गोविन्द शर्माले अवकाश पाउन १५ महिना बाँकी हुँदै जागिरबाट नै हात धुने प्रयास गरेका छन् । शर्माले राजीनामा दिए पनि त्यसलाई महानगरको नगर कार्यपालिका बैठकले अनुमोदन गर्नुपर्ने छ । उक्त प्रस्ताव महानगरको कार्यपालिका बैठकले विनाकारण प्रश्न नै टेवल टोकेर अनुमोदन गर्ने छ ।
काठमाडौं महानगरको पछिल्लो समयमा प्रशासन संयन्त्रको नेतृत्व नहुँदा सुशासन कुरामा मात्र सीमित हुने देखिन्छ । अहिले महानगरमा प्रशासनको नेतृत्व गर्ने प्रमुख प्रशासकीय प्रमुखविहीन छ । निमित्तले पनि राजीनामा दिएर बसिसकेका छन् भने सरकारले पनि गुरागाईंको सम्बन्धमा अहिलेसम्म मुख खोलेको छैन । महानगरको अहिलेको नेतृत्व प्रशासन संयन्त्र पूर्णरुपमा नै असफलजस्तै देखाउनेगरी लागेको छ । नीतिमा भन्दा पनि निर्देशनमा महानगरपालिकालाई चलाउने प्रयास भएपछि अहिलेको अवस्था सिर्जना भएको संकेत निमित्त प्रमुख प्रशासकीय प्रमुखको राजीनामाले छर्लंग बनाइदिएको छ ।
एकातिर प्रशासन प्रमुख, निमित्त प्रशासन प्रमुख छैनन् । त्यस्तै प्रशासन विभागका प्रमुख पनि बिदा लिएर बसेका छन् । त्यस्तै प्रमुख साहले नै ल्याएका सहरी योजना आयोगका उपाध्यक्ष पनि बिदामा बसेको देखिन्छ । प्रमुख साहलेभन्दा पनि उनको सचिवालयले महानगर हाँक्न खोजेको भन्दै महानगरका विभागीय प्रमुखहरु मात्र होइन साह आफैंले राखेका सल्लाहकारहरु पनि क्रमशः बाहिरिने क्रम जारी छ ।
महानगरको प्रशासन नेतृत्वविहीन बनाएर प्रमुख साह भने उनका सचिवालयका सहकर्मी सुनिल लम्साललाई लिएर बैंककमा घुमिरहेका छन् । ‘रोम जलिरहँदा निरो सुख र चैनले आरामसँग बाँसुरी बजाइरहेका थिए’ भन्ने भनाइ जस्तै काठमाडौं महानगरपालिका अस्तव्यस्त हुँदा महानगरप्रमुख साह भने घुमफिरमै रमाइरहेका छन् !
