काठमाडौं महानगरपालिकाका मेयर बालेन्द्र (बालेन) साह साँच्चै नै चमत्कारी नै छन् । बहुदलीय प्रजातन्त्रको अभ्यासमा पनि काठमाडौं जस्तो राजनीतिको चरम भड्खालोमा स्वतन्त्ररुपमा निर्वाचित भइदिए । आफूलाई ठूलो दल भन्नेहरुको हैसियत देखाइदिन जनताले पनि युवा पुस्तालाई रोजे । जसको परिणाम बालेनको रजगज काठमाडौंमा अहिले चलिरहेको छ ।
मुलुकको प्रधानमन्त्री र एउटा स्थानीय तहको मेयर बालेनबीच टकराव हुन्छ सामाजिक सञ्जालमा । तिनै प्रधानमन्त्रीको दलबाट उपप्रमुखसहित धेरै वडाध्यक्षहरु बालेनको नेतृत्वका काम गरिरहेका छन् । तर ती सबैलाई निरीह बनाउन सफल भएका छन् बालेन । त्यसकारण पनि उनी चमत्कारी देखिएका हुन् । काठमाडौ महानगरपालिकाको मेयर बालेन (निर्दल) एकातिर र कांग्रेस–एमालेबाट निर्वाचित भएका जनप्रतिनिधि (बहुदलीय) अर्को तिर हुन्छन् भन्ने धेरैको अनुमानलाई बालेनले विफल नै बनाइदिएका छन् ।
चाहे त्यो कार्यपालिका बैठकमा होस् वा नगरसभा बैठकदेखि १६औं अधिवेशनसम्ममा पनि बालेनले दलबाट निर्वाचित भएका जनप्रतिनिधिहरुलाई निरीह जनप्रतिनिधिका रुपमा प्रमाणित नै गरिदिएका छन् । महानगरपालिकाको उपमेयरदेखि अन्य जनप्रतिनिधिहरुलाई बालेनले यसरी निरीह बनाइदिए कि बालेनले जे जस्तो प्रस्ताव राखे पनि मौनरुपमा सर्वसम्मत निर्णय हुने गरेको छ । त्यस्तो चमत्कारी काम गर्नका लागि मेयर बालेनको महत्वपूर्ण कडी भनेको उनले बैठकलाई सामाजिक सञ्जालमार्फत प्रत्यक्ष प्रसारण गर्नु नै हो ।
हुन महानगरपालिकाले बैठकमा उठाएका विषयहरु आमनागरिकसमक्ष पारदर्शीरुपमा प्रस्तुत गर्नका लागि प्रत्यक्ष प्रसारण महŒवपूर्ण हुने भए पनि अन्य जनप्रतिनिधि भो, बाहिर चर्का कुरा गरे पनि नगरसभा वा कार्यपालिका बैठकमा भने टुलुटुलु हेरेर ताली ठोक्ने काममात्र गर्दै आइरहेको देखिन्छ ।
आइतबार काठमाडौं महानगरपालिकाले १६औं अधिवेशन करिब डेढ घण्टामा सकियो । विगतको अभ्यासलाई हेर्ने हो भने पनि अधिवेशनमा विभिन्न प्रस्तावहरु छलफलपश्चात् स्वीकृत हुने गर्दथ्यो । तर १६औं अधिवेशन भने ऐतिहासिक भएको देखिन्छ । नगरसभा सदस्यहरुले अधिवेशनमा संशोधनका लागि प्रस्तावित विषयहरुमा आफ्नो भनाइ राख्ने काम गरेपछि विनासंशोधन नै पास भएको जस्तो देखियो ।
मेयर बालेनले प्रस्ताव पेश गरे । बजेटको संशोधिन विषय उपमेयरले बढेर सुनाइन् । अधिवेशनको अध्यक्षसमेत रहेका बालेनले प्रस्ताव स्वीकृतिका लागि नियमानुसार हुन्छ, हुन्न र तटस्थ भनेर सोधे । हुन्छ, हुन्न। तटस्था कुनैमा पनि आवाज आएन । तर मेयर बालेन सम्पूर्ण प्रस्तावहरु भारी मतले हुन्छ भन्ने आएकाले प्रस्ताव स्वीकृत भएको घोषणा गरे । अनि सभा विसर्जन गरेर फुत्तै निस्किए ।
न नगरसभा सदस्यहरुले उठाएका प्रश्नको जवाफ मेयरले दिए, न जनप्रतिनिधिहरुले आफ्ना मेयरसँग दोहोरो सम्वाद नै गर्न पाए । २६ अर्ब रुपैयाँको बजेट भएको काठमाडौं महानगरपालिकाको संशोधित बजेट विनाछलफल नै बालेनले नगरसभाबाट पास गराइदिए जादूको छडीजस्तै । त्यसैले त बालेन चमत्कारी बालेनका रुपमा स्थापित बने ।
