नेकपा एमाले नेपालको दोस्रो ठूलो दल हो । आफूलाई लोकतान्त्रिक मान्ने दलको नेतृत्वमा छन् केपी शर्मा ओली । २०७८ मा महाधिवेशन गरी दोस्रोपटक अध्यक्ष बनेका ओली आफ्नो पार्टी तहसनहस बन्दै जाँदा पनि थप स्वेच्छचारी बन्दै गएका छन् । हुन त ओलीले नेपाली कम्युनिस्ट पार्टीको इतिहास रच्ने कामसमेत गरे नेकपा गठन गरेर । यद्यपि नेकपा फुटेपछि ओली मैमत्त बन्न थाले । संविधानलाई बेवास्ता गर्दै आफू कमजोर बनेको झोंकमा प्रतिनिधिसभा विघटन गरे । पार्टी छाडेर एकीकृत समाजवादी गठन गरेका माधवकुमार नेपाल र झलनाथ खनाललाई पार्टीबाट निष्काशनसम्मको कारबाही गरे ।
त्यसपछि कमजोर मानिएको एमाले २०७९ को निर्वाचनमा भने कांग्रेस माओवादी गठबन्धनसँग एक्लै प्रतिस्पर्धामा उत्रियो । पार्टी फुटको चोटमा पनि एमाले दोस्रो पार्टी भने भयो । त्यतिबेला ओलीले भीम रावललाई नेतृत्वमा आफ्नो प्रतिस्पर्धी पाएको थियो । ओलीको एकल राज चल्दा रावलले एमालेको आन्तरिक लोकतन्त्र जोगाएका थिए । उनै रावललाई ओलीले पार्टीको संगठित सदस्यबाटै निष्कासन गरिदिएका छन् ।
रावललाई यसरी निष्कासन गर्नुको पछाडि विविध कारण होला, तर पछिल्लो कारण भने भाटभटेनीका सञ्चालक मीनबहादुर गुरुङबाट कीर्तिपुरमा जग्गा दान पाउनु बन्यो । योे झोंकमा रावलमात्र परेनन् पार्टीका महिला नेताद्वय विन्दा पाण्डे र उषाकिरण तिम्सिना पनि परे । दुई महिला नेता छ महिनाका लागि पार्टीबाट निष्कासनमा परेका छन् ।
तीन नेतालाई कारबाही गर्ने मुख्य नेतृत्वकर्ता ओली हुन् । उनले कारबाहीको माइन्युट लेखाउँदा चुपचाप सुनिरहने स्थायी कमिटी सदस्यहरु पनि यस्तो स्वेच्छचारीको अनुमोदन गराउनेहरु हुन् । कुनै बेला फ्रान्सका राजा लुई चौधौं भन्ने गर्थे, ‘आइ एम दि स्टेट ।’ अर्थात् राज्य नै म हुँ । यही शैलीमा ओली एमालेमा मैमत्त अघि बढेका छन् । पार्टीमा लामो समय योगदान गरेका वामदेव गौतम अहिले राजनीतिक स्पेसको खोजीमा छन् । राधाकृष्ण मैनाली, सिपी मैनालीहरु ओलीकै कारण पार्टीको किनारामा परेका छन् ।
पार्टीलाई ओलीले पुँजीपतिहरुको हातमा सुम्पेसँगै दैनिकी चलाउन मुस्किल कर्याकर्ता छायामा परेका छन् ।आफूमाथि प्रश्न गर्नेलाई माथिका नेताहरुको हालत देखाउँदै नेताहरुलाई ओली सतर्क गराउँछन् । यसरी पार्टीभित्रको लोकतन्त्रलाई ओलीले कैद गर्न थालेका छन् । के एमाले यसरी नै चल्ने हो ? दोस्रो पुस्ताका नेताहरु बोल्न सुरु गरौं ।
