सरकारको छायाँमा लेखा समिति भनेर पनि प्रश्न उठिरहेको छ । तपाईंकै दलको सरकार छ । तपाईं नै सभापति हुनुहुन्छ । मार्गप्रसस्त गरेको राम्रो ।
अमनलाल मोदी
सांसद, माओवादी केन्द्र
काठमाडौं– प्रतिनिधिसभाको सार्वजनिक लेखा समितिको नेतृत्वमा विवादित व्यक्ति बसिरहन नमिल्ने भन्दै समितिका सदस्यहरुले सभापति ऋषिकेष पोखरेलमाथि प्रश्न उठाएका छन् । सोमबारको समिति बैठकमा नेकपा माओवादी केन्द्रका सांसद अमनलाल मोदीले विवादित व्यक्तिले राजीनामा दिएर मार्गप्रसस्त गर्न सुझाए ।
सहकारीको रकम अपचलन गरेको विषयमा परिवारका सदस्यमाथि प्रश्न उठेकाले पोखरेलले सभापतिबाट राजीनामा दिनुपर्ने मोदीको माग थियो । ‘सभापतिबारे पनि प्रश्न उठिरहेको छ । कहीँ न कहीँ तपाईंको परिवार र तपाईंसँग जोडिन्छ,’ मोदीले बैठकमा भने, ‘सरकारको छायाँमा लेखा समिति भनेर पनि प्रश्न उठिरहेको छ । तपाईंकै दलको सरकार छ । तपाईं नै सभापति हुनुहुन्छ । मार्गप्रसस्त गरेको राम्रो ।’
एमालेका सांसदसमेत रहेका सभापति पोखरेलकी पत्नी अञ्जला कोइरालासहित २६ जनाविरुद्ध मोरङको धनपालथान गाउँपालिका–३ स्थित उमागौरी कृषि सहकारी संस्थाको रकम अपचलनमा संलग्न आरोपमा मुद्दा दायर गरिएको छ । जबकि यस्तै मुद्दामा राष्ट्रिय स्वतन्त्र पार्टीका सभापति रवि लामिछानेमाथि लामो समय अनुसन्धानपछि यो विषय अदालतमा प्रवेश गरेको छ । यसैकारण लामिछानेको सांसद पदसमेत निलम्बनमा परेको छ ।
यस्तै विषयको मुद्दामा नेपाली कांग्रेसका उपसभापति धनराज गुरुङले सहकारीको रकम तिरेको भन्दै उन्मुक्ति पाइसकेका छन् । सहकारीको रकम अपचलनको प्रश्न उठेपछि सभापति पोखरेलले जवाफ दिनुपर्ने माग सत्तारुढ दल नेकपा एमालेकै सांसद योगेश भट्टराईले गरे । ‘सभापतिज्यूको बारेमा कुरा उठेको छ । सुशासनको चेक एण्ड ब्यालेन्स समितिमा बसेपछि त्यसको जवाफ दिनुपर्छ,’ भट्टराईले भने, ‘ती कुरा उठेको छ, स्पष्टीकरण दिने फोरम हैन तर पनि यसमा जवाफ दिएर स्पष्ट दिनूस् ।’
उहाँको परिवारको नाम आयो भने अपराधी नै सभापति हो भनेजस्तो सभापतिलाई हमला नगरौं । आरोप लाग्दैमा राजीनामा किन ?
गोकुल बास्कोटा
सांसद, नेकपा एमाले
सत्तापक्षकै सांसदले प्रश्न उठाएपछि पोखरेल डिफेन्समा उत्रिएका थिए । उनले आफू जुनसुकै परीक्षामा सहभागी हुन तयार रहेको उल्लेख गर्दै दलको निर्णय मान्न तयार रहेको तर्क गरे । ‘म सबै परीक्षामा सहभागी हुन तयार छु । नेपालको कानुन प्रशासनमा विश्वास गर्छु,’ पोखरेलले भने, ‘दलका सांसद भइसकेपछि दलहरूले जे निर्णय गर्ने हो त्यसैलाई मान्ने हो ।’
पोखरेलको विषयमा सत्तारुढ दल एमालेका सांसद गोकुल बास्कोटा भने बचाउमा उत्रिए । आरोप लाग्दैमा राजीनामा दिनु नपर्ने र सभापतिलाई हमला गर्न ठीक नहुने बास्कोटाको तर्क थियो । ‘उहाँको परिवारको नाम आयो भने अपराधी नै सभापति हो भनेजस्तो सभापतिलाई हमला नगरौं । आरोप लाग्दैमा राजीनामा किन ?’ बास्कोटाले प्रश्न गरे । पोखरेललेझैं बास्कोटाले पनि कानुन नै अन्तिम सत्य भएको तर्क गरे ।
‘तनावको कुरा भएन तथ्य र सत्यले पुष्टि गर्छ भने राजीनामा गर्नुपर्छ । प्रतिशोध र पूर्वाग्रह कानुनी राजको गुण हैन, कानुन अन्तिम सत्य हो,’ उनले भने, ‘यहाँ सरकारमा नगएको को छ ? यहाँ आरोप नलागेको को छ ? आरोप लाग्यो भनेर सरकारमा नगएको को छ ?’कांग्रेस सांसद राजन केसीले पनि पोखरेलको श्रीमतीलाई पक्राउ पुर्जी जारी भएको तर्क गर्दै उनलाई मुछ्न ठीक नहुने तर्क गरे । ‘सभापतिको श्रीमतीलाई पक्राउ जारी भएको हो, सभापतिलाई हैन होला । सभापतिलाई यसमा मुछ्नु राम्रो हैन,’ केसीले भने ।
सभापतिकी श्रीमतीलाई पक्राउ जारी भएको हो, सभापतिलाई हैन होला । सभापतिलाई यसमा मुछ्नु राम्रो हैन ।
राजन केसी
सांसद, नेपाली कांग्रेस
लेखा समिति सभापति पोखरेलकी पत्नी कोइराला उमागौरी सहकारीको पूर्वसञ्चालक हुन् । सहकारी संकटमा परेपछि उनले २०७८ माघ ८ गते सहकारीबाट राजीनामा दिएकी थिइन् । प्रहरी अनुसन्धानका आधारमा मंसिर २७ गते कोइरालासहित २६ जनाविरुद्ध मुद्दा दायर गरिएको थियो । समितिका सभापति पोखरेलपत्नी कोइराला हाल फरार छिन् । उनीसहित अदालतमा उपस्थित नभएकाविरुद्ध पुस ३ गते जिल्ला अदालतले ३५ दिने म्याद जारी गरेको छ । उमागौरीले विभिन्न वित्तीय संस्थाबाट ११ करोड ५६ लाख ७८ हजार रुपैयाँ ऋण लिएको देखिन्छ । १८ करोड ४० लाख कुल पुँजीमा देखाएको सहकारीको वासलात रिपोर्टमा १७ करोड ८७ लाख ४२ हजार कर्जा तथा सापट लगानी रहेको उल्लेख छ ।
उमागौरी विराटनगरको शान्तिचोक बस्दै आएका शम्भुप्रसाद रौनियारले खोलेका थिए । उक्त सहकारी एमाले नेतासमेत रहेको समितिका सभापति पोखरेलको सुझावमा चल्ने गरेको स्थानीय बताउँछन् । सहकारीको रकम अपचलन भएपछि प्रहरीको फन्दामा पर्ने डरले पोखरेलकै योजनामा उनकी श्रीमती फरार भएको उनीहरुको आरोप छ ।
-1745656903.jpeg)