- रविलाई रातारात अड्डासार गरिएको विषयमा प्रहरी र सरकारको चौतर्फी आलोचना
- मानवअधिकार आयोगले सोधपुछका लागि बोलाउँदा गएनन् एआइजी कुँवर
- सोमबार रविलाई पुर्याइयो पर्साको वीरगञ्ज
- वीरगञ्जमा हाम्रो साइनो पाइला सहकारी संस्थाको बचत रकम अपलचनबारे रविसँग वयान लिइने
काठमाडौं– सहकारी ठगी आरोपी राष्ट्रिय स्वतन्त्र पार्टी (रास्वपा) का सभापति रवि लामिछानेको प्रहरी हिरासतमा मानवअधिकार हनन् भएको भन्ने विषयले मुलुकको राजनीति गर्माएको छ । यही विषयलाई लिएर सत्तापक्ष र प्रतिपक्षी दलहरूबीच छेडछाड चलिरहेको छ । अस्वस्थ भएकै बेला चितवनदेखि पोखरामा सुत्न पनि नदिएर रातारात अड्डासार गरिएको र ‘मातेका प्रहरी’हरूले दुव्र्यवहार गरेर मानवअधिकार हनन् गरेको रविको दल रास्वपाको टिप्पणी छ । चितवनको प्रहरी प्रशासनले भने उक्त आरोपलाई खारेज गरिदिएको छ ।
तर, यहीबेला प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहालले रविको बचाउ गर्दै सरकारको आलोचना गरेका छन् । उनले सोमबार भने, ‘अदालतबाट दोषी ठहर नभएका, अत्यधिक जनमतद्वारा निर्वाचित रास्वपा सभापति माननीय रवि लामिछानेमाथि सरकारले जुन निरंकुश, अलोकतान्त्रिक, अमानवीय र प्रतिशोधपूर्ण व्यवहार गरिरहेको छ त्यसको निन्दा गर्दछु । त्यसप्रकारको व्यवहार रोक्न गम्भीर आग्रह गर्दछु,’ दाहालले सामाजिक सञ्जाल फेसबुकमा लेखेका छन् ।
दाहालले सरकारलाई रविको मामिलामा प्रतिशोधी भएको भनेपछि रास्वपा खुसी भएको छ । यसैलाई लिएर रास्वपाका प्रवक्ता मनिष झाले माओवादी अध्यक्ष दाहाललाई धन्यवाद दिएका छन् । सामाजिक सञ्जाल एक्समा दाहालले रविलाई गरेको समर्थनको विवरण सार्वजनिक गर्दै झाले भनेका छन्, ‘धन्यवाद प्रचण्ड, राजनीतिक प्रतिशोधविरुद्धको यो संघर्षमा हाम्रो साथमा उभिनुभएकोमा हामी आभारी छौं ।’
रवि सहकारी ठगी प्रकरणमा गत कात्तिक २ गते पक्राउ परेका हुन् । उनलाई सोमबार नै पोखरादेखि काठमाडौंहुँदै पर्साको वीरगञ्जमा लगिएको छ । त्यहाँ रहेको सानो पाइला सहकारीमा भएको ठगीबारे रविको बयान हुने भएको छ । यसरी प्रहरी अनुसन्धान जारी रहँदा गृहजिल्ला झापा पुगेर प्रधानमन्त्री केपी शर्मा ओलीले कडा शब्दमा रविको आलोचना गरेका छन् । उनले भने, ‘देश चलाउन सिद्धान्त, नीति, संकल्प र अठोट चाहिन्छ, सहकारी ठगेजस्तो सजिलो कहाँ छ ?,’ ओलीले भने । ओली लामिछानेविरुद्ध बारम्बार आक्रामक बन्दै आएका छन् । उनले यसअघि लामिछानेलाई अपराध कर्म गरिए सोहीअनुसारको फल पाउने अभिव्यक्ति दिएका थिए ।
दोषी ठहर नभएका, अत्यधिक जनमतद्वारा निर्वाचित रास्वपा सभापति माननीय रवि लामिछानेमाथि सरकारले जुन निरंकुश, अलोकतान्त्रिक, अमानवीय र प्रतिशोधपूर्ण व्यवहार गरिरहेको छ, त्यसको निन्दा गर्दछु ।
पुष्पकमल दाहाल
अध्यक्ष, नेकपा माओवादी केन्द्र
तर, यस विषयमा कांग्रेस केन्द्रीय कार्य सम्पादन समिति बैठकमा लामिछानेको मानवअधिकार हनन्बारे सोमबार उठेको छ । देउवानिवास बूढानीलकण्ठमा भएको छलफलमा नेताहरू कृष्णप्रसाद सिटौला, अर्जुननरसिंह केसीलगायतले रविको मानवअधिकार सुरक्षा निकायबाट हनन् हुन नहुने बताएका थिए । तर, बैठकमा गृहमन्त्री रमेश लेखक थिएनन् । कारण गृहमन्त्री लेखक सुरक्षा गोष्ठीका लागि आइतबार नै वीरेन्द्रनगर गएका थिए ।
त्यही भएर कांग्रेस केन्द्रीय सम्पादन समिति बैठकमा उनले स्पष्ट पार्ने मौका पाएनन् । तर, सरकारमै रहेको कांग्रेसको फरक विचार समूहका अर्का नेता डा. शेखर कोइरालाले भने लामिछानेको मानवअधिकार कायम राख्ने सन्दर्भमा बोलेका थिए । ‘यो रविजीको मात्रै कुरा होइन । कसैलाई पनि गर्नुहुन्न । हाम्रो देश लोकतान्त्रिक देश हो । सुरक्षा दिन गाह्रो भयो भनेर उम्कन पाइँदैन । त्यो विल्कुल गलत हो,’ उनले भनेका थिए ।
चितवनबाट पोखरा पुर्याइएको घटनामा सोधपुछ गर्न प्रहरी महानिरीक्षक (एआइजी) वसन्तबहादुर कुँवरलाई राष्ट्रिय मानवअधिकार आयोगले सोमबार बोलाएको थियो । तर, उनी गएनन् । आयोगका प्रवक्ता टीकाराम पोखरेलका अनुसार कुँवर आफू उपस्थित नभएर अपराध अनुसन्धान विभागका एआइजी टेकप्रसाद तामाङ, सचिवालयका डिआइजी दानबहादुर कार्की र प्रहरीकै मानवअधिकार शाखाका एसपी मोहनकुमार थापालाई आयोगको कार्यालयमा पठाएका थिए ।
सभापति लामिछानेलाई २० मंसिरको राति चितवनबाट प्रहरीले पोखरा पुर्याएको थियो । त्यस क्रममा उनको मानवअधिकार उल्लंघन भएको हुनसक्ने आयोगले जनाएको छ । यसअघि रास्वपाले मानवअधिकार आयोगमा उजुरी दिएको थियो । उजुरीमा सरकारी कार्यलाई रास्वपाले अमानवीय, अपमानजनक तथा गैरन्यायिक चाल भएको जनाएको छ । सरकारको यो कर्मले नागरिकको नैसर्गिक मानवअधिकार हनन हुन पुगेको आयोगमा दिइएको उजुरीमा छ ।
सहकारीको रकम अपचलन आरोपमा २ कात्तिकमा पक्राउ परेका लामिछानेलाई छ पटकसम्म म्याद थपिएको छ । उनीविरुद्ध पक्राउ पुर्जी जारी भएका स्थान पोखरा, काठमाडौं, बुटवल, नारायणगढमा बयान दिएका छन् । सोमबार लामिछानेलाई पक्राउ पुर्जी जारी भएको स्थान पर्सामा बयानका लागि पुर्याएको छ ।
लामिछानेमाथि सहकारी ठगी, संगठित अपराध र सम्पत्ति शुद्धीकरणसम्बन्धी तीनवटा मुद्दा बोकेर अघि बढेको छ । यस्तो बेला प्रहरीले कास्की, बुटवल, काठमाडौं र चितवन हुँदै बयानका लागि अन्ततः सानो पाइला सहकारीमा रविलाई लागिएको हो ।
लामिछानेसँगै गोर्खा मिडिया नेटवर्कका अर्का सञ्चालक पूर्वडिआइजी छविलाल जोशीलाई भने पोखराबाटै सडकमार्ग हुँदै वीरगञ्ज पुर्याएको प्रहरीले जनाएको छ ।हाम्रो साइनो पाइला सहकारी संस्थाको ३३ करोड ५० लाख ७० हजार रुपैयाँ ठगी भएको उजुरी परेको छ । गत मंसिर १९ गते लामिछानेसहित १४ जनाविरुद्ध पक्राउ पुर्जी जारी भएको थियो ।
