वर्तमान सरकारको नेतृत्वमा छन् एमाले अध्यक्ष केपी शर्मा ओली । ओली बालुवाटार पुगेपछि केही न केही ‘अफवाह’ सिर्जना गरेर जनतालाई रणभुल्ल पार्दिन्थे । ओली बेलाबेला नेताद्वेषी अभिव्यक्ति दिन्थे । बेलाबेला उटपट्याङ र मजाक गर्न पनि पछि पर्दैनथे । यही कारणले कतिपयले ओलीको उपनाम राखिदिए– टुक्के । उखान टुक्का सुनाएर मक्ख पार्न माहिर ओली अफवाह सिर्जनामा पनि काबिल मानिन्थे ।
अहिले भने ओली आफूभन्दा चौगुणा अफवाह फैलाउनेहरुको निशानामा परेका छन् । उनकै मन्त्र सायद अरुले नै ‘हाइज्याक’ गरेर होला अफवाहको इपिसेन्टर सरेर अहिले सामाजिक सञ्जालमा पुगेको छ । कसैले नजानीनजानी त कसैले जानीजानी ओलीमाथि थरिथरि आरोप लगाउन थालेका छन् । ओलीको जीवनमाथि हदैसम्म तल ओर्लेर आलोचना गर्नेहरु पनि निस्किएका छन् । यस्तो किन भयो, कसरी भयो भन्ने विषयमा सरकारले सबैलाई सचेत पार्ने अभियान चलाउनुपर्छ । यतिमात्र हैन बेलाबेला नेतृत्व तहबाट गल्तीहरुको सुधार, आत्मसमीक्षा र आत्मआलोचना हुनुपर्दछ ।
तर ओली यसरी पछाडि हट्ने पक्षमा देखिन्न । बरु कार्याकर्तालाई दुख दिएर सडकमा ओरालेर अरु शक्तिलाई तर्साउनेतिर उद्धत देखिन्छ । मंसिर ७ मा जसरी सरकार प्रमुखको हैसियतमा रहेको ओलीले सडकमा परेड खेल्न थालेका छन् । यो उदेकलाग्दो छ । अहिले अर्थतन्त्रको मेलो नराम्ररी बिग्रेको छ ।
अर्थमन्त्रीको नामोनिशाना सुनिन्न । समृद्ध नेपालको नारा उछालेर अगाडि बढेको ओलीले चुलाचुलामा ग्यास र रेलका कुरा बिर्सिसकेका छन् । चुनावी अभियानका बेला उनले राखेका महात्वकांक्षी योजना राम्रा थिए । तर उनले यो योजना पूरा गर्न सकेनन् । यसको मुख्य कारण देशको अर्थतन्त्र पनि हो ।
हाम्रो नेतृत्वले अहिलेको अवस्थामा आएर के बुझाउन सक्नुपर्छ भने देश अर्थतन्त्रको ट्र्यापमा फसेको छ । ऋणको ब्याज तिर्न ऋणकै सहारा लिनुपर्ने अवस्थामा पुगेको छ । यस्तो अवस्थामा सामाजिक सुरक्षाका कार्यक्रमहरु बढाएर सरकारले थप जोखिम मोल्नु हुन्न । बरु, जनतासँग यस विषयमा प्रस्ट भन्न सक्नुपर्छ । अफवाहलाई मलजल पुग्ने गरी टेडामेडा जवाफ दिनुको साटो प्रधानमन्त्री तहबाट पारदर्शी कुरा राख्नुपर्छ ।
अहिले जनता दुःखमा छन् । सरकारको आफ्नै दुःख छ । दुःख साझा गरे जनता पनि सरकारसँगै कामका लागि हातेमालो गर्न आउँछन् । यसले उज्वल भविष्यको मार्ग तयार हुन्छ । आफैं सत्तामा बसेर शक्ति प्रदर्शनको नाममा सडक कब्जा गर्नु अस्वाभाविक त छ नै, एमालेले गर्न लागेको ‘बेमौसमी’ प्रदर्शनको कुनै अर्थ छ्रैन ।
