न्युयोर्क - समाजसेवी इन्द्र तामाङको आत्मकथा लोकार्पण गरिएको छ। अमेरिकाको न्युयोर्कस्थित ज्याक्सनहाइटमा रहेको हिमालयन रेष्टुरेन्ट एण्ड बारमा आयोजित कार्यक्रममा तामाङको आत्मकथा 'माई क्युरियस इअर्स वीथ चार्ल्स हेनरीफोर्ड, द अटोबायोग्राफी अफ इन्द्र बी. तामाङ' लोकार्पण गरेका हुन् ।
स्थानीय समयअनुसार आइतबार साँझ वाणिज्यदुत विष्णुकुमारी अधिकारी र आचार्य लामा गुरु दावा साङमोले पुस्तक विमोचन गरेका हुन्। अक्टोबर ९ मा लेखकसँग हस्ताक्षर कार्यक्रमसमेत भएको थियो। लेखकले नेपालीलाई इमान्दार तथा संघर्षशिलका रुपमा विश्वमा चिनाउने काम गरेको उल्लेख गर्दै वाणिज्यदूत अधिकारीले पुस्तकले धेरैलाई प्रेरणा दिने बताइन्।
तामाङ सोसाइटी अफ अमेरिकाका पूर्व अध्यक्ष तथा सोसाइटी अफ अमेरिका सल्लाहकार राम तामाङले काठमाडौंदेखि अमेरिकासम्म बसाइका क्रममा इन्द्रका अनुभवहरु आत्मकथामा सँगालेको बताए। सामाजिक अभियन्ता शशांक लामाले लेखक इन्द्रले आफ्ना इच्छा र चाहनाहरुलाई दबाएर चार्ल्स हेनरीफोर्ड र चार्ल्सकी बहिनी नायिका, मोडल रुथलाई सेवा गर्नु ठुलो योगदान भएको बताए।
चार्ल्ससँगै विश्व भ्रमणका क्रममा तामाङले चित्रकला तथा फोटोग्राफी सिकेका थिए। इन्द्रको जीवन अनुभवलाई पुस्तकको रुपमा ल्याउन लेखक, गीतकार, सम्पादक रोमी एस्बीले साथ दिएका हुन्। टर्टल पोइन्ट प्रेसले बजारमा ल्याएको २ सय ६४ पेजको पुस्तकको मुल्य २४ अमेरिकी डलर रहेको छ। पुस्तक डिजिटल प्लेटफर्म अमाजोनमासमेत उपलब्ध रहेको प्रकाशकले जनाएको छ।
को हुन् इन्द्र तामाङ?
मकवानपुरको फाखेलका इन्द्र तामाङ सन् १९७४ मा २१ वर्षको उमेरमा अमेरिका पुगेका थिए। अमेरिकी लेखक, फोटोग्राफर तथा सिनेमा निर्देशक चार्ल्स हेनरी फोर्डको सहयोगीका रूपमा अमेरिका पुगेका इन्द्रको जन्म विसं २००९ मा फागेलमा भएको थियो।साथीहरू स्कुल जाँदा नौ वर्षको उमेरमा इन्द्र तरकारी,दाउरा बोकेर काठमाडौंमा बेच्न निस्कन्थे। गाउँकै अग्रजको सहयोगमा उनी न्युरोडस्थित खिचापोखरीमा रहेको पानोरामा होटेलमा जागिरे भए। त्यही उनले फोर्डसँग भेटे।
फोर्डको सहयोगीको रूपमा काम थाले। चर्ल्सको ग्रिसमा घर थियो, पेरिस र न्युयोर्कमा फ्लाइट। उनैको पछि लागेर अमेरिका आएका इन्द्रले चाल्र्सकै सिको गर्दै फुर्सदको समयमा चित्रकला र फोटोग्राफी सिके। सन् २००२ मा चाल्र्सको निधन भयो। चार्ल्सको निधनपछि लगभग सात वर्ष उनकी बहिनी चलचित्र अभिनेत्री रुथ फोर्डको हेरचाह पनि गर्नु पर्ने भयो। दुवै जनासँग बस्दा उनले तलब भने कहिल्यै पाएनन्।
चर्ल्सको बहिनीको निधनपछि मात्र इन्द्रलाई थाहा भयो, चाल्र्स र उनीकी बहिनीले आफ्नो नाममा भएको सबै सम्पत्ति इन्द्रको नाममा नामसारी गरी वकिललाई कागज थमाएका रहेछन्। अमेरिकाको सबै भन्दा महँगो क्षेत्र म्यानहाटनमा इन्द्रले सिङ्गो फ्लाइट पाएका छन्। अमेरिकामामात्र हैन नेपालमासमेत विभिन्न क्षेत्रमा तामाङले सहयोग गर्दै आएका छन्। लेखक तामाङ, तामाङ सासाइटी अफ अमेरिकाका पूर्व अध्यक्ष तथा तामाङ साँस्कृतिक तथा बुद्धिष्ट सेन्टरका संयोजक हुन्।
