प्राकृतिक विपत्तिसँगै नागरिकले सडक दुर्घटनामा पनि दैनिक ज्यान गुमाइरहेका छन् । सडक दुर्घटना मानव सिर्जित दुर्घटना हो । यसमा प्रशासन, नागरिक, सवारीसाधन प्रयोगकर्ता, यात्रु सबैले सावधानी अपनाउन सकिन्छ ।तर, चाडपर्वको समयमा सुरक्षालाई ख्यालै नगरी सवारीसाधनमा क्षमताभन्दा बढी यात्रु चढाउँदा, सुरक्षित सडक प्रयोग नगर्दा, तीव्र गतिमा सवारी चलाउँदा दैनिक दुर्घटना बढ्दो छ । आइतबार यतामात्र दसैंका लागि घर पुग्ने तयारीका यात्रा गरेका पाँच जनाको विभिन्न स्थानमा मृत्यु भयो । ती दुर्घटनामा परी कैयन घाइते भएका छन् ।
पर्वको समयमा मादकपदार्थ सेवन, चालक आफैं तनावमा पर्नु, नयाँ रुटमा सवारीसाधन चलाउनुजस्ता विषयले पनि दुर्घटना बढ्दो छ । यस्तो विषयमा प्रशासनले नियमन गर्नु अति आवश्यक छ । नागरिकको जीउधनको रक्षाका लागि प्रहरी, सम्बन्धित निकायले जाँचमा कडाइ गर्नुपर्छ । जसरी पनि पुग्नैपर्छ भनेर यात्रीले पनि जबरजस्ती क्षमताभन्दा बस्नुहुन्न । पर्वमा केही रकम बढी कमाउने लोभमा बस व्यवसायी, कर्मचारीले यात्रीलाई जबरजस्ती टिकट भिडाउने तर अन्तिममा सिट क्षमताभन्दा बढी पु¥याएर उभ्याएरै लैजाने परीपाटीसमेत छ ।
यस्तो गर्दा एक त सवारीसाधनको सन्तुलन गुम्नसक्छ भने यात्रु आफैं पनि आरामसाथ गन्तव्यमा पुग्न पाउँदैन । अझ अर्को विषय सम्बन्धित निकायले चाडपर्वमा गुड्ने सवारीको अवस्था कस्तो छ कुनै नियमन गरेको हुँदैन । सवारीसाधनको अवस्था ठीकठाक छ वा मर्मत गर्नुपर्ने छ यसबारे न त ट्राफिक प्रहरीलाई चासो छ न त यात्रीलाई । विकसित देशमा बसमा यात्रा गर्दा बसको अवस्थाबारे जानकारी गराइन्छ भने निर्धारित गतिभन्दा बढी गतिमा गुडाउन दिइन्न । त्यसैगरी लामो दूरीको यात्रामा बीचमा गाडी र चालकसमेत परिवर्तन गर्छ । यस्तो गर्दा यात्रा सुरक्षित हुने र बस व्यवसायीलेसमेत विश्वास कमाउँछन् ।
तर, हडबडको काम गर्दा एक त दुर्घटना हुन्छ, अर्को आफ्नै साधनमा पनि क्षति पुग्छ । यस्तो अवस्थालाई मध्यनजर गर्दै अबका दिनमा बस व्यवसायीले भरपर्दो सेवा दिन जरुरी भइसकेको छ । यसैगरी यात्रीले पनि न्यूनतम मापदण्डमा बस सञ्चालन भइरहेको छ कि छैन ध्यान दिन जरुरी छ । अर्को मुख्य विषय नियमन गर्ने निकाय पनि आँखामा पट्टीमा बाँधेर नबसी यस्तो बेला सक्रिय बन्नुपर्छ ।
