वासिङ्टन–विश्वका विभिन्न देशमा समेत गरी कोरोना भाइरसका सङ्क्रमितको सङ्ख्या एक लाख नाघेको शनिबार प्राप्त एक समाचारमा जनाइएको छ ।
संयुक्त राज्य अमेरिकाको जोन हप्किन्स विश्वविद्यालयले प्रकाशन गरेको तथ्याङ्कअनुसार यस भाइरसको प्रकोपबाट सङ्क्रमित हुने व्यक्तिको सङ्ख्या एक लाख ११३ पुगेको छ ।
उक्त विश्वविद्यालयको तथ्याङ्कअनुसार यस प्रकोपबाट सङ्क्रमितमध्ये अधिकांश चीनमा नै रहेको बताइएको छ । चीनमा मात्र यसका सङ्क्रमित करिब ८० हजार जना रहेको उक्त विश्वविद्यालयले प्रकाशन गरेको पछिल्लो तथ्याङ्कमा उल्लेख गरिएको छ ।
विश्वभर हाल कोरोना सङ्क्रमितहरू एक लाखभन्दा बढी पुगेको समाचार विभिन्न सञ्चारमाध्यमले दिएका छन् । गत डिसेम्बरको अन्त्यबाट चीनको हुबेई प्रान्तको उहान शहरबाट शुरु भएको यस कोरोना भाइरस सङ्क्रमणबाट चीनमा मात्र तीन हजारभन्दा बढीको मृत्यु भएको छ । अधिकारीहरूले विभिन्न देशबाट जारी गरेका सूचनाहरूको अध्ययनमा यस भाइरसको सङ्क्रमणबाट ज्यान जाने व्यक्तिको सङ्ख्या शनिबारसम्म तीन हजार ५०० नाघेको छ । यस भाइरसको सङ्क्रमण ९२ वटा देशमा फैलिएको छ ।
कोरोनाकै कारण दक्षिण कोरियामा हालसम्म ४४ जनाको मृत्यु भइसकेको छ । त्यसैगरी ६ हजार ७६७ जनामा कोरोना सङ्क्रमण देखिएको शनिबार जनाइएको छ ।
कोरोना भाइरसबाट इटालीमा १९७ जनाको ज्यान गएको शनिबार प्राप्त एक समाचारमा जनाइएको छ । त्यहाँ बिहीबार र शुक्रबार गरी करिब ९० जनाको मृत्यु भएपछि मृतकको सङ्ख्या बढेर १९७ पुगेको बताइएको छ । त्यसैगरी गरी इटालीमा तीन हजार ९१६ जनामा यस रोगको सङ्क्रमण भएको पाइएको छ ।
इटालीका विभिन्न २२ वटा शहरमा यसको प्रकोप देखिएको छ । इटालीले देशैभरिका विद्यालय, विश्वविद्यालय बन्द गराएको छ । सरकारले यो भाइरसको नियन्त्रणका विभिन्न कार्यक्रम घोषणा गरी कार्यान्वयन गराएको छ ।
उता संयुक्तराज्य अमेरिकाको फ्लोरिडामा यस प्राणघातक कोरोना जीवाणु (भाइरस) का कारण दुई व्यक्तिको मृत्यु भएपछि यहाँ पनि यस भाइरसबाट शिकार हुनेको सङ्ख्या १६ पुगेको बताइएको छ । संयुक्त राज्य अमेरिकामा २०० सयभन्दा बढी व्यक्तिमा यस भाइरसको सङ्क्रमण देखिएको छ ।
यस भाइरसको प्रकोपबाट स्पेनमा पनि पाँच जनाको ज्यान गएको छ । शुक्रबार प्राप्त भएको एक समाचारमा त्यहाँ पाँचको मृत्यु भएको हो । शुक्रबार प्राप्त भएको एक समाचारमा त्यहाँ यस प्रकोपबाट एकजनाको ज्यान गएको र त्यससँगै यसबाट ज्यान जानेको सङ्ख्या पाँच पुगेको हो ।
स्पेनका स्वास्थ्य अधिकारीहरूले यस भाइरसबाट सङ्क्रमित हुने व्यक्तिको सङ्ख्या ३६५ पुगेको छ । यहाँ पनि दिन प्रतिदिन यसका सङ्क्रमितहरूको सङ्ख्या बढ्दै गएको छ ।
स्पेनको म्याड्रिड शहरमा नै यसका सङ्क्रमित भेटिएका छन् । स्पेनका स्वास्थ्य अधिकारीहरूले बिहीबार मात्र त्यहाँ १०२ जना नयाँ सङ्क्रमित भेटिएका हुन् । राजधानी म्याड्रिड शहरमा शुक्रबारसम्म १३७ वटा यस भाइरसका सङ्क्रमितहरू उपचारमा रहेका छन् । उक्त शहरमा गएरातिसम्म २४ घण्टाभित्रै दुई जनाको ज्यान गएको छ । ती दुईमध्ये एकजना ९९ वर्षीया महिला र अर्का ७६ वर्षीय वृद्ध रहेका छन् । यहाँका अधिकारीहरूले पनि यो भाइरसले बढीजसो वृद्धवृद्धाहरूलाई शिकार बनाउने गरेको अनुभव बताएका छन् ।
यसैगरी प्राप्त समाचारमा यो भाइरसको सङ्क्रमण नेदरल्यान्डसमा पनि देखिएको छ । नेदरल्यान्डसमा यसको प्रकोपबाट एकजना वृद्धको ज्यान गएको त्यहाँका स्वास्थ्य अधिकारीहरूले जानकारी दिएका छन् ।
उनीहरूका अनुसार शुक्रबार मात्र नेदरल्यान्डसमा यस भाइरसबाट एकजना ८६ वर्षीय वृद्धको ज्यान गएको छ । रोटेड्यामस्थित इकाजेआ अस्पतालमा उपचार गराइरहेका उनको शुक्रबार मृत्यु भएको अधिकारीहरूले जानकारी दिएका छन् ।
नेदरल्यान्डसमा यो भाइरसको प्रकोपबाट ज्यान जानेमा उनी नै पहिलो व्यक्ति भएको अधिकारीहरूले जानकारी दिएका छन् ।
शुक्रबार मात्र यहाँ ८२ जना कोरोना भइरसका सङ्क्रमित रहेको पाइएकामा त्यो सङ्ख्या बढेर शनिबार नै १२८ पुगेको पनि बताइएको छ । यसका कारण यहाँको सरकारले विशेष सतर्कता अपनाएको पनि जनाएको छ ।
यसैबीच इरानबाट प्राप्त भएको पछिल्लो समाचारमा त्यहाँ यसको प्रकोपबाट मृत्यु हुनेको सङ्ख्या १२४ पुगेको छ । इरानी सरकारले शुक्रबार मात्र १७ जनाको ज्यान गएको घोषणा गरेको हो । योसँगै यस भाइरसबाट मृत्यु हुनेको सङ्ख्या १२४ पुगेको हो ।
इरानको स्वास्थ्य मन्त्रालयका प्रवक्ताले यो सङ्क्रमणबाट शुक्रबार साँझसम्ममा चार हजार ७४४ जना संङ्क्रमित रहेका छन् । यहाँ हरेक दिन नयाँ नयाँ सङ्क्रमित थपिँदै गएका बताइएको छ । यहाँको स्वास्थ्य मन्त्रालयले दिएको जानकारीअनुसार केही दिनमात्र यता यहाँ एक हजार २३४ जना नयाँ सङ्क्रमित थपिएका छन् । नयाँ सङ्क्रमितहरू ठूलो सङ्ख्यामा थपिँदै गएकाले अवस्था बडो चिन्ताजनक रहेको पाइएको समाचारमा जनाइएको छ । (रासस÷एएफपी)
