- बंगालको खाडीबाट प्रवाह भएको न्यूनचापीय प्रणालीको प्रभावका कारण मौसम बदली
- आजबाट देशभर लगातार चार दिन वर्षा हुने पूर्वानुमान
- तराईका केही स्थानमा हावाहुरीकोसमेत सम्भावना
काठमाडौं– मुख्य खाद्यन्नबाली धान पाक्ने समयमा देशका विभिन्न स्थानमा हावाहुरीसहित चार दिन लगातार वर्षा हुने भएको छ । जल तथा मौसम विज्ञान विभागअन्तर्गतको मौसम पूर्वानुमान महाशाखाले यस्तो पूर्वानुमान गरेको हो ।
महाशाखाले बुधबार विशेष मौसम बुलेटिन सार्वजनिक गर्दै मौसम बदलीका कारण आज (बिहीबार)बाट देशभर लगातार वर्षा हुने प्रक्षेपण गरेको छ । वर्षाबाट ५६ जिल्ला उच्च जोखिममा रहेको महाशाखाले जनाएको छ । बंगालको खाडीबाट प्रवाह भएको न्यूनचापीय प्रणालीको प्रभावका कारण मौसम बदली हुन लागेको हो ।
‘असोज १० गते बिहीबार दिउँसोदेखि असोज १३ सम्म देशभर साधारणतयादेखि पूर्णतया बदली रही अधिकांश स्थानमा मेघ गर्जन÷चट्याङसहित हल्कादेखि मध्यम वर्षा तथा कोशी प्रदेश, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरू तथा मधेस प्रदेश, कर्णाली प्रदेश र सुदूरपश्चिम प्रदेशका केही स्थानहरूमा भारीदेखि धेरै भारी वर्षाको सम्भावना रहेको छ,’ महाशाखाले जारी गरेको विशेष बुलेटिनमा उल्लेख छ ।
अघिल्ला वर्षाहरुमा सुदूरपश्चिमका कञ्चनपुर र कैलालीसहित लुम्बिनीका अधिकांश जिल्लामा धानबालीमा ठूलो क्षति पुगेको थियो । वर्षाले बर्सेनि क्षति पुर्याउँदा पनि सरकारसँग भने कुनै पूर्वतयारी छैन । तराईका केही स्थानमा हावाहुरीको सम्भावना रहेको जनाइएको छ । साथै गण्डकी प्रदेश र लुम्बिनी प्रदेशका थोरै स्थानहरू तथा कोशी प्रदेश, बागमती प्रदेश, मधेस प्रदेश, कर्णाली प्रदेश र सुदूरपश्चिम प्रदेशका एक–दुई स्थानमा अति भारी वर्षाको पनि सम्भावना रहेको महाशाखाले जनाएको छ ।
आज दिउँसोदेखि देशभर साधारणतयादेखि पूर्णतया बदली रही देशभर हल्कादेखि मध्यम वर्षाको सम्भावना रहेको र कोशी प्रदेश, बागमती प्रदेश, गण्डकी प्रदेश तथा लुम्बिनी प्रदेशका थोरै स्थानहरू तथा मधेस प्रदेशका एक–दुई स्थानमा मेघ गर्जन÷चट्याङसहित भारीदेखि धेरै भारी वर्षाको सम्भावना रहेको जनाइएको छ । साथै देशका तराई भू–भागका केही स्थानमा हावाहुरीकोसमेत सम्भावना रहेको छ ।
शुक्रबार देशभर साधारणतयादेखि पूर्णतया बदली रही देशभर हल्कादेखि मध्यम वर्षाको सम्भावना रहेको र कोशी प्रदेश, बागमती प्रदेशका, गण्डकी प्रदेश, लुम्बिनी प्रदेश, सुदूरपश्चिम प्रदेश तथा कर्णाली प्रदेशका केही स्थानमा तथा मधेस प्रदेशका थोरै मेघ गर्जन÷चट्याङसहित भारीदेखि धेरै भारी वर्षाको सम्भावना रहेको जनाइएको छ । साथै देशका तराई भू–भागका केही स्थानहरूमा हावाहुरीकोसमेत सम्भावना रहेको जनाइएको छ ।
साथै गण्डकी प्रदेश, लुम्बिनी प्रदेश, कर्णाली प्रदेश तथा सुदूरपश्चिम प्रदेशका एक–दुई स्थानमा मेघ गर्जन÷चट्याङसहित अति भारी वर्षाकोसमेत सम्भावना रहेको जनाइएको छ ।शनिबार देशभर साधारणतयादेखि पूर्णतया बदली रही देशका अधिकांश स्थानहरू हल्कादेखि मध्यम वर्षाको सम्भावना रहेको र बागमती प्रदेशका, गण्डकी प्रदेश, लुम्बिनी प्रदेश तथा कर्णाली प्रदेशका केही स्थानहरू र बाँकी प्रदेशका थोरै स्थानहरूमा मेघ गर्जन/चट्याङसहित भारीदेखि धेरै भारी वर्षाकोसमेत सम्भावना महाशाखाको पूर्वानुमान छ ।
साथै देशका लुम्बिनी प्रदेश, गण्डकी प्रदेश तथा कर्णाली प्रदेशका केही स्थानमा हावाहुरीकोसमेत सम्भावना रहेको महाशाखाले जानकारी दिएको छ । असोज १३ गते (आइतबार) देशभर आंशिकदेखि साधारणतया बदली रही देशभर हल्कादेखि मध्यम वर्षाको सम्भावना रहेको र गण्डकी प्रदेश, लुम्बिनी प्रदेश र कर्णाली प्रदेशका एक–दुई स्थानमा मेघ गर्जन÷चट्याङसहित भारी वर्षाको सम्भावना रहेको जनाइएको छ ।
यस प्रणालीको प्रभावले विशेषगरी वर्षाको कारण भू–क्षय, बाढी, पहिरो तथा गेग्रान बहावको जोखिम रहेको र मनसुनमा रातिको समयमा पानी पर्ने सम्भावना बढी हुने गरेकाले सहरी तथा तराई क्षेत्रहरूमा डुबानको जोखिम रहेको जनाइएको छ । महाशाखाले ठूला तथा साना नदी नाला र खोलामा पानीको सतह बढ्नसक्ने, दैनिक जनजीवन, कृषि, स्वास्थ्य, पर्यटन, नदी क्षेत्र आसपासका निर्माण कार्य, सडक तथा हवाई यातायातसमेत प्रभावित हुनसक्ने भएकाले आवश्यक सतर्कता तथा पूर्वतयारी अपनाउन सर्वसाधारण तथा सबै सरोकारवाला निकायमा अनुरोध गरेको छ । बालीनालीमा क्षति गर्ने भएकाले विशेष सावधानी अपनाउन अनुरोध गरिएको छ ।
‘रेड जोन’मा यी जिल्ला
जल तथा मौसम विज्ञान विभागले विभिन्न ५६ जिल्ला ‘रेड जोन’ अर्थात् भारी वर्ष हुने सूचीमा राखेको छ । विभागअन्तर्गतको मौसम पूर्वानुमान महाशाखाले ती जिल्ला उच्च जोखिममा रहेको भन्दै विशेष बुलेटिनमार्फत सावधानी अपनाउन अनुरोध गरेको छ ।
कोशी– झापा, सुनसरी, धनकुटा, तेह्रथुम, खोटाङ, ओखलढुंगा, उदयपुर, भोजपुर, इलाम, पाँचथर, मोरङ
मधेस– सिरहा, सप्तरी, पर्सा
बागमती– मकवानपुर, चितवन, धादिङ, नुवाकोट, रसुवा, काठमाडौं, ललितपुर, भक्तपुर, काभ्रेपलाञ्चोक, सिन्धुपाल्चोक, सिन्धुली, रामेछाप
गण्डकी– म्याग्दी, बागलुङ, तनहुँ, स्याङ्जा, नवलपरासी पूर्व, कास्की, पर्वत, लमजुङ, गोरखा, मनाङ
लुम्बिनी– रुकुमपूर्व, रोल्पा, गुल्मी, प्युठान, अर्घाखाँची, पाल्पा, दाङ, कपिलवस्तु, रुपन्देही, नवलपरासी पश्चिम, बाँके, बर्दिया
कर्णाली– जाजरकोट, रुकुमपश्चिम, दैलेख, सुर्खेत, सल्यान
सुदूरपश्चिम– डोटी, कैलाली, अछाम, मुगु र हुम्ला
महाशाखाले मुगु र हुम्लालाई निम्न जोखिमको सूचीमा राखेको छ । तप्लेजुङ, संखुवासभा, सोलुखुम्बु, बारा, धनुषा, रौतहट, सर्लाही, महोत्तरी, दोलखा, मुस्ताङ, डोल्पा, कालिकोट, जुम्ला, डडेलधुरा, कञ्चनपुर, बझाङ, बाजुरा, दार्चुला, बैतडी मध्यम जोखिममा पर्ने महाशाखाले जनाएको छ ।
