- प्रधानमन्त्री ओलीलाई न्युयोर्कबाट आँखा नसन्काउन लामिछानेको चेतावनी
- न्युयोर्कमा ओलीलाई विरोध उनको कर्मको फल भएको दाबी
- विदेशमा रहेका नेपाली युवालाई नेपाल फर्क भन्ने नैतिक धरातल नभएको दाबी
काठमाडौं– सरकारले सहकारी ठगीसम्बन्धी संसदीय छानबिन विशेष समितिको प्रतिवेदन कार्यान्वयनका लागि नेपाल प्रहरीलाई निर्देशन दिएसँगै राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउ पर्ने हल्ला आइतबार सनसनीपूर्ण फैलियो । गोरखा मिडिया नेटवर्कका एक जना संस्थापक पूर्वडिआइजी छविलाल जोशी पक्राउ परेपछि लामिछानेलाई समेत पक्राउ गर्न लागिएको हल्ला चलेको हो ।
प्रतिवेदनमा लामिछानेसहित गोरखा मिडिया नेटवर्कका अध्यक्ष गितेन्द्रबहादुर (जिबी) राई, पूर्वडिआइजी जोशीलगायतलाई दोषी ठहर गरेको छ । सोहीअनुसार सरकारले कारबाही अगाडि बढाएको हो । तर, जोशी पक्राउलगत्तै रास्वपा सभापति लामिछाने भने हतासमा देखिए । सभापति लामिछाने आफूलाई षड्यन्त्रपूर्वक पक्राउ गर्न लागिएको भन्दै हतासमा देखिएका हुन् ।
उनीसहित रास्वपाका नेता कार्यकर्ता प्रधानमन्त्री केपी शर्मा ओलीविरुद्ध खनिएका छन् । प्रधानमन्त्री ओली भने संयुक्त राष्ट्रसंघको महासभामा भाग लिन यतिबेला अमेरिकामा छन् ।सभापति लामिछानेले सोमबार पनि अबेरसम्म पार्टी कार्यालय वनस्थलीमै ठूलो संख्यामा भेला भएका नेता कार्यकर्तासँगै बिताए । सोमबार लामिछानेकै पूर्वव्यावसायिक साझेदार जोशीलाई थप अनुसन्धानका लागि जिल्ला अदालत कास्कीले पाँच दिन हिरासतमा राख्न म्याद थप अनुमति दिएको छ । जोशी पक्राउपछि आफू पनि पक्राउ पर्ने भय लामिछानेमा छ । सोही कारण सभापति लामिछानेसँगै उनका दलका नेताहरू प्रधानमन्त्री ओलीविरुद्ध क्रुद्ध भएका हुन् । उनीहरूले ओलीको सक्दो आलोचना गरिरहेका छन् ।
लामिछानेले प्रधानमन्त्री ओलीलाई अमेरिकाको न्युयोर्कबाट आँखा नसन्काउन भन्दै चेतावनी दिएका छन् । ‘न्युयोर्कबाट आँखा नसन्काउनूस् प्रधानमन्त्रीज्यू,’ लामिछानेले फेसबुकमा लेखेका छन् । उनले आफूलाई पक्राउ गरिए राजनीतिक प्रतिवाद गर्ने चेतावनी दिए ।लामिछानेपछि पार्टीका अन्य नेताहरू प्रधानमन्त्री ओलीविरुद्ध क्रुद्ध भएका छन् । उपसभापति डोलप्रसाद (डिपी) अर्यालले अमेरिकामा ओली सहभागी हुने तय भएको कार्यक्रम सुरक्षा संवदेनशीलतालाई देखाउँदै स्थगित भएको प्रसंग जोड्दै त्यसलाई ‘कर्मको फल’को रुपमा अथ्र्याएका छन् ।
त्यसबारे अर्यालले पार्टी कार्यालयमा सञ्चारकर्मीहरूसँग कुरा गर्दै भने, ‘नेपाल सरकारको लेटरप्याडमा के लेखिएको छ, उहाँहरू असुरक्षित हुनुभयो रे अमेरिकामा । अचम्म लाग्छ मलाई । त्यो उहाँको कर्मको फल हो । शुभकामना छ उहाँलाई ।’उनले सहकारी प्रकरणमा छानबिन समितिले टिओआरभन्दा बाहिर गएर कारबाही सिफारिस गरेर गलत गरेको दाबी गरे । प्रतिवेदनले ८७ अर्बको कुरा ल्याउँदा पनि लामिछानेविरुद्ध सबै लागिरहेको उपसभापति अर्यालको गुनासो थियो ।
सोही दलकी सांसद तथा पूर्वशिक्षामन्त्री सुमना श्रेष्ठले पनि अमेरिका भ्रमणमा रहेका प्रधानमन्त्री ओलीप्रति कटाक्ष गरिन् । उनले अमेरिका पुगेर ओलीले नेपालीलाई ‘देशमा फर्क’ भन्ने नैतिक नभएको बताइन् । ‘विदेशमा रहेका नेपाली युवालाई कुन नैतिक धरातलबाट नेपाल फर्क भन्ने हो,’ प्रधानमन्त्री ओलीलाई उनको प्रश्न छ ।
प्रधानमन्त्री ओलीले हार्वर्ड र कोलम्बिया विश्वविद्यालयमा सम्बोधन गर्ने भएकाले न्युयोर्क र बोस्टनमा रहेका नेपाली युवा विद्यार्थीलाई प्रधानमन्त्रीको सम्बोधन सुन्न अनुरोध गर्दै पूर्वशिक्षामन्त्री श्रेष्ठले आफ्नो प्रश्न गरिदिन पनि आग्रह गरेकी छन् । उनले लेखेकी छन्, ‘नेपालको विश्वविद्यालयमा विद्यार्थीलाई दलगत राजनीतिमा आबद्ध गराउन शपथ खाएर उता हार्वर्ड र कोलम्बिया विश्वविद्यालयमा हाम्रा प्रधानमन्त्री ओलीज्यू सम्बोधन दिन लाग्नुभएको छ । न्युयोर्क र बोस्टनमा हुनुहुने सबैले गएर सुन्नुहोला है, अनि मेरोतर्फबाट एउटा प्रश्न पनि सोधिदिनु होला– नेपाल फर्किएर आएका युवालाई तुच्छ व्यवहार गर्ने, देशलाई पुरुषको मात्र हो, महिलाको त माइत हो भन्ने व्यक्तिले कुन नैतिक धरातलमा फर्क भन्ने हो ?’
सभापति लामिछानेलाई सहकारी प्रकरणमा पक्राउ पर्ने डर छ । किनभने उनलाई सूर्यबहादुर थापा संयोजक रहेको संसदीय छानबिन विशेष समितिले बुझाएको प्रतिदेनमा कारबाही सिफारिस गरिएको छ । कारबाही प्रचलित कानुनअनुसार गर्न भनिएको छ । उनीसँगै कारबाही सिफारिस भएका पूर्वडिआइजी जोशी आइतबार काठमाडौंको शंखमुलबाट पक्राउ परे । त्यसपछि भने रविमा आफू पक्राउ प भय सिर्जना भएको देखिएको छ ।नेपाल प्रहरीका केन्द्रीय प्रवक्ता दानबहादुर कार्कीले अहिले लामिछानेलाई पक्राउ गर्ने कुनै योजना नभएको बताएका छन् । अनुसन्धानका क्रममा आवश्यक पर्दा पक्राउका लागि कुनै तयारी गर्ने भन्ने नहुने पनि बताए ।
उनले प्रभावसँग भने, ‘उहाँसित बुझ्नुपर्ने विषय बन्यो भनेचाहिँ कुरा अगाडि बढ्छ । अहिले त्यो अवस्था बनेको छैन ।’सर्वसाधारण निक्षेपकर्ताले विभिन्न सहकारी संस्थामा जम्मा गरेको रकम अपचलनमा लामिछाने पनि जिम्मेवार रहेको ठहर गर्दै गत साता संसदीय छानबिन विशेष समितिले उनीसहितका व्यक्तिहरूलाई कारबाही गर्न सिफारिस गरेको थियो । लामिछानेको सन्दर्भमा अनुसन्धान गर्ने एकाइले अहिले त्यसबारे केही नभनेको प्रहरी प्रवक्ता कार्कीले बताए । लामिछाने पक्राउ पर्न लागेको चर्चा चलेपछि चीन भ्रमणमा गएका रास्वपाका नेताहरू स्वदेश फर्किन लागेको बताइएको छ । यद्यपि, लामिछानेले भने सहकारीकाण्डमा सफाइ पाएको दाबी गर्दैै आएका छन् ।
संसदीय छानबिन समितिको प्रतिवेदनको परिच्छेद–१८ मा रहेको सुझाव तथा सिफारिससम्बन्धी विवरणमा लामिछानेका सम्बन्धमा केही विषयहरू उल्लेख गरिएको छ र उनलाई कानुनअनुसार कारबाही गर्न सिफारिस गरिएको छ । प्रतिवेदनअनुसार गोरखा मिडिया नेटवर्क कम्पनीका सञ्चालकहरु संस्थामा मुख्य जिम्मेवार हुन्छन् । सेयर सदस्य, सञ्चालक सदस्य र प्रबन्ध निर्देशकको भूमिका र जिम्मेवारीमा रहेका पात्रहरूले कम्पनीमा प्राप्त हुने रकमप्रति जिम्मेवारी र दायित्वबोध गर्नबाट पन्छिन मिल्दैन ।
‘खातावाला हस्ताक्षरकर्ताहरू, जसले खाता सञ्चालन अर्थात् वित्त परिचालनमा सहभागी हुन्छन्, त्यसबापत दायित्व ग्रहण गर्नुपर्दछ,’ उक्त प्रतिवेदनमा भनिएको छ ।प्रतिवदन कार्यान्वयन गर्न आइतबार गृहमन्त्री रमेश लेखकले प्रहरीलाई निर्देशन दिएका थिए । लगत्तै जोशी पक्राउ परे । लामिछानेलाई पनि आफू पक्राउ गर्ने डर पैदा भएको हो ।
