काठमाडाैं - बौद्ध दर्शन प्रवर्द्धन तथा गुम्बा विकास समितिद्वारा आयोजित गुम्बा व्यवस्थापन सम्बन्धी विशेष तालिम सफलतापूर्वक सम्पन्न भएको छ । गुम्बाहरूको उचित व्यवस्थापन, संरक्षण तथा धार्मिक गतिविधिहरूको प्रभावकारी समन्वयका लागि आवश्यक सीप र ज्ञान प्रदान गर्न काठमाडौंको होटेल रोयल एयरपोर्टमा दुई दिने तालिम समितिले गरेकाे हाे ।
संचालित तालिममा देशभरका करिब ४४ गुम्बा स्थानीय गुम्बा व्यवस्थापक, धार्मिक गुरुहरू र प्रतिनिधिहरू सहभागिता रहेको थियो।तालिममा समितिका कार्यकारी निर्देशक होम दोङले गुम्बाबाट आएका ज्ञानलाई समुदायसँग जोडिनुसँगै आ-आफ्नो गुम्बाको आन्तरिक व्यवस्थापन चुस्त र दुरुस्त गर्नुपर्ने बताएका थिए ।तालिममा रामबाबु सापकोटा, विनिता भण्डारी, सन्जिवकुमार लामा, गंगाकुमारी गुरुङ र योजना अधिकृत सन्जु योङ्ग्याले गुम्बा व्यवस्थापनमा आइपरेका समस्या र गतिविधिहरुबारे प्रशिक्षण दिएका थिए ।
तालिममा गुम्बाको ऐतिहासिक, सांस्कृतिक र धार्मिक महत्त्वबारे प्रकाश पार्दै गुम्बा व्यवस्थापनको चुनौतीहरूबारे जानकारी दिएका थिए। यस्तै तालिमले गुम्बा सञ्चालनका लागि आवश्यक स्रोतसाधनको व्यवस्थापन, आर्थिक पारदर्शिता तथा धार्मिक गतिविधिहरूको व्यवस्थापनमा विशेष जोड दिएको थियो।
कार्यक्रममा सहभागीहरूले गुम्बाको दैनिक प्रशासनिक काम, संरचनागत मर्मत, धार्मिक गतिविधिहरूको समय तालिका र सामुदायिक सहभागिताबारे विस्तृत छलफल गरेका थिए। साथै, सहभागीहरूले गुम्बा व्यवस्थापनमा देखापरेका समस्याहरूको समाधानका लागि विभिन्न उपायहरूको प्रस्ताव गरेका थिए।
तालिमका प्रमुख प्रशिक्षक सन्जु योङ्ग्याले गुम्बा केवल धार्मिक स्थल मात्र नभई सांस्कृतिक धरोहर पनि हो। यसको सही व्यवस्थापनले हाम्रो धार्मिक र सांस्कृतिक पहिचानलाई जोगाउन महत्वपूर्ण योगदान पुर्याउँछ।”
तालिमको समापनमा सहभागीहरूले तालिमद्वारा प्राप्त ज्ञान र सीपहरूलाई गुम्बा व्यवस्थापनमा लागू गर्ने प्रतिवद्धता व्यक्त गरे।तालिमको समापनमा विभिन्न जिल्लाका गुम्बाहरुबाट सहभागी प्रमुख लामा, अध्यक्षहरुलाई प्रमाण पत्र प्रदान गरेका थिए । त्यस्तै प्रशिक्षकहरुलाई पनि कदर पत्र प्रदान गरेका थिए ।
