वैदेशिक रोजगारीका क्रममा बर्सेनि हजारौं युवाहरुले ज्यान गुमाइरहेका छन् । त्यसरी मृत्यु हुने कारणमध्ये पछिल्लो समय आत्महत्या गर्नेको संख्या बढ्दो देखिन्छ । वैदेशिक रोजगार बोर्डको तथ्यांकअनुसार श्रम गन्तव्य मुलुकहरुमा हरेक वर्ष आत्महत्या गर्ने नेपालीहरुको संख्या बढ्दै गइरहेको छ । यो निकै चिन्ताजनक र संवेदनशील विषय हो ।
यसरी विकराल बन्दै गएको यो विषयमा सरोकारवालाको ध्यान नपुगेको देखिन्छ । बोर्डको तथ्यांकअनुसार गत आर्थिक वर्ष २०८०/८१ मा वैदेशिक रोजगारीमा गएकाहरुमध्ये विभिन्न कारणबाट एक हजार ३७८ जनाले ज्यान गुमाएका थिए । जसमा १९० जनाले आत्महत्या गरेको उल्लेख गरिएको छ । अघिल्ला चार वर्षमा पनि अत्महत्या क्रमशः बढेको देखिएको छ । आर्थिक वर्ष २०७६/७७ मा ६७ जना, २०७७/७८ मा १४४ जना, २०७८/७९ मा १०७ जना र २०७९/८० मा १४७ जनाले आत्महत्या गरेको तथ्यांक छ ।
पछिल्लो पाँच वर्षको अवधिमा ६५५ जनाले रोजगारीका क्रममा विदेशमा आत्महत्या गरेको बोर्डले जनाएको छ।विदेशमा प्राकृतिक रुपमा मृत्यु हुनेको संख्या सबैभन्दा बढी छ। दोस्रोमा अन्य कारणबाट मृत्यु हुनेको संख्या छ भने तेस्रोमा आत्महत्यालाई लिइएको छ। वैदेशिक रोजगारीमा गएकाहरुले आत्महत्या गर्नुको कारणबारे कुनै अध्ययन गरिएको छैन । आत्महत्यालगायतका अन्य कारणबाट हुने मृत्युको रोकथामका लागि आवश्यक उपायहरु अवलम्बन गरिरहेको बताइए पनि सरकारले ठोस् कार्यक्रम अघि सारेको पाइँदैन । मुलुकमा रोजगारीको अवसर नहुँदा युवाहरु वैदेशिक रोजगारीमा जानुपर्ने बाध्यता छ ।
विभिन्न समस्या र सपना लिएर रोजगार गन्तव्यमा पुगेका युवाहरुले त्यहाँ अनेक प्रकारका हण्डर सहनुपर्छ । विदेशी भूमिमा दुःख गरेर भए पनि परिवारको सपना पूरा गर्ने उनीहरुको लक्ष्यमा अनेक बाधा आइपर्छन् । यताबाट म्यानपावर कम्पनीले भनेअनुसारको काम र सेवा सुविधा पाउँदैनन् । जसकारण उनीहरु मानसिक समस्यामा फस्छन् । जसले पछि आत्महत्यासम्मको अवस्थामा पु¥याउने गरेको जानकारहरु बताउँछन् ।
सरकारले आत्महत्यालगायत अन्य कारणबाट हुने मृत्युको न्यूनीकरण गर्न वीर अस्पतालसँगको सहकार्यमा टेलिमेडिसिन सेवा सञ्चालन गरिरहेको बताएको छ । अनलाइनबाटै स्वास्थ्य तथा मनोपरामर्श सेवा दिने लक्ष्यका साथ टेलिमेडिसिन सेवा सञ्चालनमा ल्याए पनि त्यसको प्रभावकारिता मूल्यांकन हुन बाँकी नै छ । आत्महत्याका घटना जुन रुपमा बढिरहेको छ, यो रोक्न सरकारले ठोस् कार्यक्रम ल्याउन ढिला गर्नु हुँदैन ।
